ചെറുതോണി: വാഴത്തോപ്പ് കെഎസ്ഇബി കോളനിയില് വൈദ്യുതി സര്ക്യൂട്ടിലെ തകരാര് മൂലം ക്വാര്ട്ടേഴ്സ് കത്തിനശിച്ചു. ക്വാര്ട്ടേഴ്സില് ആളില്ലാത്തതിനാല് വന് ദുരന്തം ഒഴിവായി.
ഓളോമനകുന്നേല് ഷെജീറും കുടുംബവും താമസിച്ചു വന്നിരുന്ന ക്വാര്ട്ടേഴ്സാണ് പൂര്ണ്ണമായും കത്തിനശിച്ചത്. ഇന്നലെ ഉച്ചയ്ക്കാണ് അപകടം സംഭവിച്ചത്. തൊട്ടടുത്ത ക്വാര്ട്ടേഴ്സില് ആള്ക്കാരുണ്ടായിരുന്നെങ്കിലും വഴിയാത്രക്കാരാണ് ക്വാര്ട്ടേഴ്സില് നിന്നും പുക ഉയരുന്നത് കണ്ടത്. വന് ശബ്ദത്തോടെ മേല്ക്കൂരയിലെ ആസ്ബറ്റോസുകള് പൊട്ടിതെറിച്ചു. ക്വാര്ട്ടേഴ്സ് നമ്പര് എഫ് 25 ഡി യില് അടുക്കള ഭാഗത്തിരുന്ന ഗ്യാസ് സിലണ്ടറുകളിലേയ്ക്ക് തീ പടരാതിരുന്നത് വന് ദുരന്തം ഒഴിവായി. എ, ബി, സി, ഡി എന്നീ ക്രമത്തിലുള്ള ക്വാര്ട്ടേഴ്സില് എഫ്ടൈപ്പ് ക്വാര്ട്ടേഴ്സിലാണ് തീപിടുത്തമുണ്ടായത്. ലക്ഷങ്ങളുടെ വീട്ടുപകരണങ്ങള് നശിച്ചു. വീട്ടുകാര് സ്ഥലത്ത് എത്തിയപ്പോഴേയ്ക്കും നാട്ടുകാരുടെയും ഇടുക്കി അഗ്നിശമന സേനയുടെയും സഹായത്തോടെ തീയണച്ചു.
