കണ്ണൂര്: പള്ളിക്കുന്ന് ശ്രീപുരം ഇംഗ്ലീഷ് മീഡിയം ഹൈസ്കൂളില് ശ്രീപുരം എന്ട്രന്സ് അക്കാദമി പ്രവര്ത്തനം തുടങ്ങി. അക്കാദമിയുടെ ഔദ്യോഗിക ഉദ്ഘാടനം നാളെ രാവിലെ 10.30 ന് മുന് ഇന്ത്യന് അംബാസിഡര് ടി.പി.ശ്രീനിവാസന് നിര്വഹിക്കും. കോട്ടയം ബിഷപ് മാര് മാത്യു മൂലക്കാട്ട്, സഹായമെത്രാന് മാര് ജോസഫ് പണ്ടാരശ്ശേരില് എന്നിവര് ചടങ്ങില് പങ്കെടുക്കും.
മലബാര് മേഖലയിലെ വിദ്യാര്ഥികള്ക്കു മെഡിക്കല്, എന്ട്രന്സ് മികച്ച പരിശീലനം നല്കുകയെന്ന ലക്ഷ്യത്തോടെയാണ് എന്ട്രന്സ് അക്കാദമി ആരംഭിച്ചിരിക്കുന്നതെന്ന് സംഘാടകര് വാര്ത്താസമ്മേളത്തില് അറിയിച്ചു. മലബാര് മേഖലയില് അതിനൂതനമായ രീതിയിലുള്ള പരിശീലന കേന്ദ്രങ്ങള് കുറവാണ്. അതിനാല് മറ്റു തെക്കന് ജില്ലകളെയാണു മലബാര് മേഖലയിലെ വിദ്യാര്ഥികള് ആശ്രയിക്കുന്നത്. ഈ മേഖലയിലെ വിദ്യാര്ഥികള്ക്കു സൗകര്യപ്രദമാകുന്ന വിധത്തിലാണ് എന്ട്രന്സ് അക്കാദമിയില് ക്ലാസുകള് ക്രമീകരിച്ചിരിക്കുന്നതെന്നും സംഘാടകര് പറഞ്ഞു.
ഏഴാം ക്ലാസ് മുതല് 12-ാം ക്ലാസുവരെയുള്ള കുട്ടികള്ക്കാണു പ്രവേശനം. ദേശീയ പ്രവേശന പരീക്ഷയ്ക്ക് ഒരുക്കമായുള്ള പരിശീലനം പടിപടിയായി നല്കുകയാണു ലക്ഷ്യമിടുന്നത്. ഒഴിവുദിവസമായ ശനി, ഞായര് ദിവസങ്ങളിലാണു ക്ലാസുകള്. കോട്ടയം അതിരൂപതയുടെ ക്നാനായ മലബാര് കുടിയേറ്റ പ്ലാറ്റിനം ജൂബിലി സ്മാരകമായാണു ശ്രീപുരം എന്ട്രന്സ് അക്കാദമി സ്ഥാപിച്ചത്. 40 കുട്ടികള്ക്കാണു പ്രവേശനം. അടുത്തഘട്ടത്തില് സിവില് സര്വീസ്, പിഎസ് സി കോച്ചിംഗ് കൂടി നടത്തുമെന്നും സംഘാടകര് പറഞ്ഞു. വാര്ത്താസമ്മേളനത്തില് അക്കാദമി പ്രിന്സിപ്പല് ഫാ.ബിനു ചെറുകര, കോ-ഓര്ഡിനേറ്റര് ഡോ.ജോസ് ജെയിംസ്, ജോ.ഡയറക്ടര് ഫാ.ബിന്സ് ചേര്ത്തലില്, പിടിഎ പ്രസിഡന്റ് സി.കെ.കുര്യാച്ചന് എന്നിവര് പങ്കെടുത്തു. ഫോണ്: 0497 20701333, 2711233, 8547784154.
