കട്ടപ്പന: പുതിയ ബസ് സ്റ്റാന്ഡിന് സമീപം ആതിര ജങ്ഷനിലെ ഇരട്ട വൈദ്യുത ട്രാന്സ്ഫോര്മറുകള് ജനങ്ങള്ക്ക് ഭീഷണിയാകുന്നു. ബസ്റ്റാന്റിലേക്കുള്ള പ്രവേശന കവാടവും നഗരത്തിലെ ഏറ്റവും തിരക്കേറിയ നാല്ക്കവലയുമാണ് കട്ടപ്പന ആതിര ജങ്ഷന്.
ഇവിടെ സ്ഥിതി ചെയ്യുന്ന സംരക്ഷണ വേലിയില്ലാത്ത ട്രാന്സ്ഫോര്മറുകളാണ് ഭീഷണിയാകുന്നത്. യാതൊരു സുരക്ഷയും ഒരുക്കാതെ രണ്ട് ട്രാന്സ്ഫോര്മറുകളാണ് അപകട ഭീഷണി ഉയര്ത്തി ഇവിടെ സ്ഥിതി ചെയ്യുന്നത്. പുതിയ ബസ്റ്റാന്ഡിലേക്കുള്ള വഴിയായതിനാല് വിദ്യാര്ത്ഥികളടക്കം ആയിരക്കണക്കിനാളുകള് ദിനവും വന്ന് പോകുന്ന വഴിയാണിത്. ഇങ്ങോട്ടുള്ള റോഡിന്റെ വശങ്ങളടക്കം മറച്ച് മേഖലയില് സ്വകാര്യ സ്ഥാപനങ്ങള് സ്ഥാപിച്ചിരിക്കുന്ന ഫ്ളക്സ് ബോര്ഡുകളും അപകടങ്ങളുടെ സാധ്യത വര്ദ്ധിപ്പിക്കുകയാണ്. ബസുകള് പുതിയ സ്റ്റാന്ഡിലേക്ക് പ്രവേശിക്കാന് തിരിയുന്ന ഭാഗത്താണ് ട്രാന്സ്ഫോര്മറുകള് സ്ഥിതിചെയ്യുന്നത്. അതിനാല് പലപ്പോഴും കാല്നട യാത്രികരുടെ സഞ്ചാരം ദുഷ്കരമാകുകയാണ് ഇവിടെ. രണ്ട് വാഹനങ്ങള് എതിര് ദിശയിലൂടെ കടന്നു വന്നാല് ഇതുവഴി കടന്ന് പോകാനാവില്ല. തൊട്ടടുത്ത് ട്രാന്സ്ഫോര്മര് സ്ഥിതിചെയ്യുന്നതിനാല് വാഹനങ്ങള് കടന്നുപോകുമ്പോള് കാല് നടയാത്രികര്ക്ക് മാറിനില്ക്കാനും ഇവിടെ സൗകര്യങ്ങളില്ല.
മദ്യപന്മാര് ഉള്പ്പെടെയുള്ളവര് ട്രാന്സ്ഫോര്മറിന്റെ സമീപത്ത് വിശ്രമിക്കുന്നതും അപകടസാധ്യത വര്ദ്ധിപ്പിക്കുന്നുണ്ട്. തൊട്ടടുത്ത സ്വകാര്യ വ്യക്തിയുടെ പുരയിടത്തിലെ മരങ്ങള് വളര്ന്ന് ഇലക്ട്രിക്ക് ലൈനില് തൊട്ടു നില്ക്കുന്നത് വന് അപകടസാധ്യതയാണ് ഉണ്ടാക്കുന്നത്. ഇതുമൂലം തൊട്ടടുത്ത വ്യാപാരസ്ഥാപനങ്ങളില് ഉള്ളവരും ഭീതിയിലാണ്.
എത്രയും പെട്ടെന്ന് ഇവിടെ സ്ഥിതിചെയ്യുന്ന ട്രാന്സ്ഫോര്മറിന്്
സംരക്ഷണ ഭിത്തി നിര്മ്മിക്കുകയും സമീപത്തെ മരച്ചില്ലകള് നീക്കം ചെയ്യുകയും ചെയ്യാന് കെഎസ്ഇബി അധികൃതര് ഇടപെടണമെന്നാണ് നാട്ടുകാര് ആവശ്യപ്പെടുന്നത്.
