ഇറച്ചിക്കോഴി വില്‍പ്പന: സര്‍ക്കാര്‍ തീരുമാനം പുനര്‍നിര്‍ണയിച്ചില്ലെങ്കില്‍ കോഴിഫാമുകളും അടച്ചപൂട്ടേണ്ടി വരുമെന്ന്

കണ്ണൂര്‍: ഇറച്ചികോഴിയുടെ വിലപ്‌ന 87 രൂപയാക്കണമെന്ന സര്‍ക്കാര്‍ തീരുമാനം പുനര്‍നിര്‍ണയിച്ചില്ലെങ്കില്‍ വരുന്ന മൂന്ന് മാസത്തിനുള്ളില്‍ സംസ്ഥാനത്തെ മുഴുവന്‍ കോഴിഫാമുകളും അടച്ചപൂട്ടേണ്ട അവസ്ഥയിലേക്കെത്തുമെന്ന് ആള്‍ കേരള പോള്‍ട്രി ഫാമേഴ്‌സ് അസോസിയേഷന്‍ ഭാരവാഹികള്‍. 2017 മെയ് മാസം മുതല്‍ ഇറച്ചികോഴിയുടെ വില്പന വില കിലോഗ്രാമിന് 100 മുതല്‍ 140 രൂപ വരെയാണ്. ജിഎസ്ടി ബാധകമല്ലാത്തതിനാല്‍ ജൂലായ് ഒന്ന് മുതല്‍ ഇതേ വിലയ്‌ക്ക് തന്നെയാണ് കോഴി വിറ്റുകൊണ്ടിരുന്നത്. എന്നാല്‍ ജൂലായ് പത്ത് മുതല്‍ കോഴിവില 87 രൂപയാക്കണമെന്നും അല്ലാത്തപക്ഷം കച്ചവടക്കാര്‍ക്കെതിരെ നിയമനടപടി സ്വീകരിക്കുമെന്നുള്ള ധനമന്ത്രിയുടെ ഉത്തരവ് യഥാര്‍ത്ഥത്തില്‍ പ്രതിസന്ധിയിലാക്കുന്നത് സംസ്ഥാനത്തെ പതിനായിരത്തോളം വരുന്ന കോഴികര്‍ഷകരെയാണെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ജിഎസ്ടിയില്‍ കോഴിയിറച്ചിക്ക് നികുതി ഒഴിവാക്കിയതിനാല്‍ കോഴിയിറച്ചിയുടെ വില കുറക്കണമെന്നാണ് മന്ത്രി പറയുന്നത്. കേരളത്തില്‍ ആവശ്യമായ കോഴിക്കുഞ്ഞുങ്ങളില്‍ 95 ശതമാനവും അന്യസംസ്ഥാനമായ കര്‍ണടക, തമഴ്‌നാട് എന്നിവിടങ്ങളില്‍ നിന്നുമാണ് കൊണ്ടുവരുന്നത്. ജിഎസ്ടി വരുന്നതിന് മുമ്പ് 35 രൂപ തറവിലയും 14.5 ശതമാനം നികുതിയും ഉണ്ടായിരുന്നു. ജിഎസ്ടി നടപ്പിലാക്കുന്നത് മുന്നില്‍ കണ്ട് 2017 ജനുവരി മുതല്‍ അന്യസംസ്ഥാന കോഴിലോബികള്‍ കോഴിക്കുഞ്ഞ് ഉല്പാദന രംഗത്ത് നിയന്ത്രണം ഏര്‍പ്പെടുത്തുകയും നേരത്തെ 30, 35 രൂപക്ക് സംസ്ഥാനത്ത് ലഭിച്ചുകൊണ്ടിരുന്ന കോഴിക്കുഞ്ഞുങ്ങള്‍ 45 മുതല്‍ 55 വരെ വിലവര്‍ദ്ധനവ് ഉണ്ടാകുകയും ചെയ്തു. 4555 രൂപ കൊടുത്ത് വാങ്ങിയിരുന്ന കോഴിക്കുഞ്ഞുങ്ങള്‍ 40 ദിവസം വളര്‍ത്തി വില്ക്കാനാകുമ്പോഴേക്കും തന്നെ 85 രൂപയോളം ചെലവു വരും. കോഴിയുടെ ഉല്പാദനച്ചെലവ് 65 രൂപയെങ്കിലും ആയാല്‍ മാത്രമേ ധനമന്ത്രി പറഞ്ഞത് പോലെ 87 രൂപയ്‌ക്ക് ഇറച്ചിക്കോഴി പൊതുമാര്‍ക്കറ്റില്‍ വില്‍ക്കാന്‍ സാധിക്കു. സര്‍ക്കാരും കച്ചവടക്കാരും തമ്മിലുള്ള തര്‍ക്കം ഉടലെടുത്തതോടെ കച്ചവടക്കാര്‍ കടയടക്കാന്‍ തീരുമാനിച്ചിരിക്കുകയാണ്. ഇതോടെ ഓണം സീസണുള്‍പ്പെടെ കണക്കാക്കി വരുന്ന മൂന്ന് മാസത്തേക്കുള്ള കച്ചവടത്തിനായുള്ള കോഴികളെയും കൊണ്ട് തയ്യാറായിരിക്കുന്ന ചെറുകിട കോഴിഫാമുകാരാണ് യഥാര്‍ത്ഥത്തില്‍ ബുദ്ധിമുട്ടിലാകുക. കച്ചവടക്കാര്‍ നേരത്തെയുള്ള വിലക്ക് കോഴി വാങ്ങാന്‍ തയ്യാറല്ലെങ്കില്‍ കിട്ടുന്ന വിലക്ക് കോഴിയെ വില്‍ക്കാന്‍ ഫാമുകാര്‍ നിര്‍ബന്ധിതരാകും. ആയതിനാല്‍ 2017 ജനുവരി മുതല്‍ സെപ്തംബര്‍ വരെയുള്ള കോഴി ഉല്പാദന ചെലവ് വിലയിരുത്തിക്കൊണ്ട് വില്‍പ്പനവില പുനര്‍നിര്‍ണയിക്കാന്‍ സര്‍ക്കാര്‍ തയ്യാറവണം. ഉല്‍പ്പാദനരംഗത്ത് ഉല്‍പ്പാദനച്ചെലവ് കുറക്കാന്‍ സംസ്ഥാനത്തിന് ആവശ്യമായ കോഴിക്കുഞ്ഞ് 20 രൂപ നിരക്കിലും കോഴിത്തീറ്റ 25 രൂപ നിരക്കിലും കോഴിഫാമുകള്‍ക്ക് ആവശ്യമായ വൈദ്യുതി കുറഞ്ഞനിരക്കില്‍ നല്‍കുകയും കോഴിഫാമുകള്‍ക്ക് ആവശ്യമായ ലൈസന്‍സിനുള്ള നിയമനടപടികള്‍ ലളിതമാക്കിയും കോഴികര്‍ഷകരെ സംരക്ഷിക്കാന്‍ സര്‍ക്കാര്‍ തയ്യാറാകണം. വാര്‍ത്താസമ്മേളനത്തില്‍ സംസ്ഥാന ജനറല്‍ സെക്രട്ടറി പി.ടി.ബാബു, സജി മാത്യു ചെമ്പേരി, ഡെന്നീസ് ആലക്കോട്, ജോണിജോസഫ്, കെ.കെ.തോമസ് എന്നിവര്‍ പങ്കെടുത്തു.