മാങ്ങുട്ട്പറമ്പ്: കെഎപി ആസ്ഥാനത്ത് എസ്ഐയുടെ ഭാര്യയായ വീട്ടമ്മയെ മറ്റൊരു പോലീസുകാരന് അപമാനിച്ച സംഭവം ഒതുക്കിത്തീര്ക്കാന് നീക്കം. അസോസിയേഷന് നേതാവാണ് കഴിഞ്ഞ ദിവസം ജില്ലയില് നിന്നും സ്ഥലംമാറ്റപ്പെട്ട എസ്ഐയുടെ ഭാര്യയെ അപമാനിക്കാന് ശ്രമിച്ചത്. അപമാനിക്കാന് ശ്രമിച്ച പോലീസുകാരനെ സ്ത്രീ തല്ലാനെത്തിയതോടെയാണ് വിഷയം മറ്റുള്ളവര് അറിയുന്നത്.
ഡ്യൂട്ടി ഓഫീസറുടെ റൂമിന് തൊട്ടടുത്തുവെച്ച് നടന്ന സംഭവം ഇന്നേവരെ മേലുദ്യോഗസ്ഥര്ക്ക് റിപ്പോര്ട്ട് ചെയ്തിട്ടില്ല എന്നാണ് അറിയുന്നത്. ഉന്നത ഉദ്യോഗസ്ഥരുടെയും യൂണിയന്റെയും സമ്മര്ദ്ദത്തെ തുടര്ന്നാണ് റിപ്പോര്ട്ട് നല്കാതിരുന്നത്. ഇത് പോലീസിലെ ഒരുവിഭാഗത്തിന്റെ അതൃപ്തിക്ക് കാരണമായിട്ടുണ്ട്. മൂന്ന് ദിവസം മുമ്പാണ് സംഭവം നടന്നത്. ബസ്സിറങ്ങി ക്വാര്ട്ടേഴ്സിലേക്ക് പോകുകയായിരുന്ന വീട്ടമ്മയോട് ഈ ഉദ്യോഗസ്ഥന് അശ്ലീല ഭാഷയില് ആംഗ്യം കാണിച്ചു എന്നാണ് പരാതി.
ആര്മര് വിഭാഗത്തിലെ ജീവനക്കാരനാണ് ആരോപണ വിധേയനായ വ്യക്തി. നേരത്തെയും ഉദ്ദേഹം ഈ സ്ത്രീയോട് മോശമായി പെരുമാറിയിട്ടുണ്ടെന്ന് പറയപ്പെടുന്നു. അശ്ലീല ആംഗ്യം കാണിച്ചപ്പോള് സ്ത്രീ ഇയാള്ക്കെതിരെ ആക്രമിക്കാന് പാഞ്ഞടുത്തപ്പോഴുണ്ടായ ബഹളംമൂലമാണ് വിഷയം മറ്റുള്ളവരുടെ ശ്രദ്ധയില്പെടുന്നത്. ഇവരുടെ ഭര്ത്താവായ എസ്ഐയെ അടുത്തകാലത്താണ് മറ്റൊരുജില്ലയിലേക്ക് സ്ഥലം മാറ്റിയത്. അസോസിയേഷന് ഇടപെട്ടാണ് ഇയാളെ സ്ഥലമം മാറ്റിയതെന്ന് പറയപ്പെടുന്നു.
മാങ്ങാട്ട്പറമ്പ് കെഎപി ബറ്റാലിയനില് നേരത്തെയും ഇത്തരത്തിലുള്ള ആരോപണങ്ങള് ഉയര്ന്നിരുന്നു. ക്വാര്ട്ടേഴ്സിലെ കുളിമുറിയില് ക്യാമറവെച്ചതും, സ്ത്രീയെ കയറിപിടിച്ചതും ഏറെ വിവാദമായിരുന്നു. രാഷ്ട്രീയ സ്വാധീനം ഉപയോഗിച്ചാണ് ഇവയൊക്കെ തേച്ചുമാച്ചു കളഞ്ഞതെന്നും പരാതിയുണ്ടായിരുന്നു. കുട്ടികളുടെ വിദ്യാഭ്യാസവും മറ്റും കണക്കാക്കിയാണ് ഇവര് ഇവിടെനിന്നും ക്വാര്ട്ടേഴ്സ് മാറാതിരിക്കുന്നത്. പാരാതികൊടുത്താല് ഈ ക്വാര്ട്ടേഴ്സ് ഒഴിപ്പിക്കുമെന്നും ഇവരെ ഭീഷണിപ്പെടുത്തിയിട്ടുണ്ട്. ഡ്യൂട്ട് ഓഫീസര് റിപ്പോര്ട്ട് ചെയ്യാത്തതും ചര്ച്ചാവിഷയമായിട്ടുണ്ട്.
