കുമളി: മണ്സൂണ് ആരംഭിച്ചതോടെ ആയൂര്വേദ ചികിത്സയ്ക്കായി കേരളത്തിലേക്ക് എത്തുന്ന സഞ്ചാരികളുടെ എണ്ണം വര്ദ്ധിച്ചു. ജില്ലയില് കുമളി കേന്ദ്രീകരിച്ചാണ് പ്രാധാനമായും സഞ്ചാരികള് കൂടുതലായി എത്തുന്നത്. ആയുര്വേദ ചികിത്സയുടെ പേരില് നിരവധി തട്ടിപ്പ് സ്ഥാപനങ്ങളാണ് കുമളിയില് ഇടം പിടിച്ചിരിക്കുന്നത്.
മസാജ് കേന്ദ്രങ്ങളുടെ മറവിലാണ് ഇത്തരം സ്ഥാപനങ്ങള് പ്രവര്ത്തിക്കുന്നത്. നിയമപരമായി ഇവയില് പലതിനും പ്രവര്ത്തിക്കാന് അനുമതിയില്ല. ഉപഭോക്താക്കളായി എത്തുന്നവരെ പരിചരിക്കാന് ആവശ്യമായ യോഗ്യത നേടിയവര് പല സ്ഥാപനങ്ങളിലും ജീവനക്കാരായില്ല. പരസ്യ ബോര്ഡുകളില് ആയുര്വേദ ഡോക്ടര്മാരുടെ പേര് പ്രദര്ശിപ്പിക്കുന്നുണ്ടെങ്കിലും ഇവര് ഒരു ദിവസം പോലും സ്ഥാപനങ്ങളില് എത്താറില്ല. ഈ രീതിയില് പ്രവര്ത്തിക്കുന്ന മസാജിങ് കേന്ദ്രങ്ങളിലേക്ക് ഉപഭോക്താക്കളെ എത്തിക്കാന് വലിയ തുക കമ്മീഷന് നല്കി പ്രത്യേകം ഏജന്റുമാരെയും തയ്യാറാക്കിയിരിക്കുന്നു.
കേരളത്തിന്റെ തനതു ചികിത്സാരീതി എന്ന പ്രചാരണം നല്കിയാണ് വിദേശ രാജ്യങ്ങളില് നിന്ന് ഇവിടെയെത്തുന്നവരെ കെണിയില് വീഴ്ത്തുന്നത്. ചികിത്സയ്ക്ക് വിധേയരാകുന്നവര് പിന്നീട് പല ആരോഗ്യ പ്രശ്നങ്ങളും ഉണ്ടാകുന്നതായി ആരോപണമുണ്ട്.
കര്ക്കിടക മാസത്തില് പ്രത്യേകമായി നടത്തുന്ന ആയൂര്വേദ ചികത്സ രീതികള് വായിച്ചറിഞ്ഞോ മുന്പ് ചികിത്സ തേടിയവരില് നിന്ന് കേട്ടറിഞ്ഞോ എത്തിച്ചേരുന്ന വിദേശീയരാണ് ഏറെയും. ഉഴിച്ചില്, പിഴിച്ചില്, തുടങ്ങി പരമ്പരാഗത രീതിയിലുള്ള ശരീര പരിചരണമാണ് സഞ്ചാരികളുടെ ഉദ്ദേശം.
ഇവര് വന്നുപെടുന്നതാകട്ടെ ഇതുമായി യാതൊരു ബന്ധവുമില്ലാതാവരുടെ കെണിയിലും. ഇത്തരം തട്ടിപ്പ് സ്ഥാപനങ്ങളെക്കുറിച്ച് അന്വേഷണം നടത്താന് ജില്ലാഭരണകൂടം നടപടി സ്വീകരിക്കുന്നില്ല.
