പാനൂര്: പാനൂര് താലൂക്ക് ആശുപത്രി സ്ഥലമെടുപ്പിന്റെ മറവില് കളളപണം വെളുപ്പിച്ചതായി ആരോപണം.സ്ഥലം ഉടമയായ പാനൂര് പോലീസ് സ്റ്റേഷനു സമീപത്തെ സ്വകാര്യവ്യക്തി 50ലക്ഷം രൂപ വെളുപ്പിച്ചതായാണ് ആരോപണം ഉയര്ന്നിരിക്കുന്നത്. സ്ഥലമെടുപ്പിന് ആദ്യം നല്കിയ അഡ്വാന്സ് തുകയായ അന്പത് ലക്ഷത്തി അയ്യായിരം രൂപയ്ക്കു പുറമെ 2016 ഏപ്രില് 26ന് രണ്ടു ചെക്കുകളിലായി 50ലക്ഷവും കമ്മറ്റി ഇയാള്ക്ക് നല്കിയിരുന്നു. എന്നാല് പണം നിരോധിച്ചതിനു ശേഷം ഡിസംബര് 1നു 50ലക്ഷം കമ്മറ്റിക്കു തിരിച്ചു നല്കി. ആ തുക കാനറ ബേങ്കില് കമ്മറ്റി അംഗങ്ങളുടെ പേരില് നിക്ഷേപിച്ചാണ് തിരിമറി നടത്തിയിട്ടുളളത്. 7മാസത്തിനു ശേഷം ചെക്കു മുഖാന്തിരം കൈമാറിയ പണമാണ് തിരികെ നല്കിയിട്ടുളളത്.
കമ്മറ്റിയുടെ ഒത്താശയോടെയാണ് കള്ളപ്പണം വെളുപ്പിച്ചതെന്ന് വ്യക്തം. സ്ഥലമെടുപ്പ് കമ്മറ്റിക്കെതിരെ നിലവില് വിജിലന്സ് കോടതിയില് കേസുണ്ട്. കള്ളപ്പണം വെളുപ്പിച്ച സംഭവത്തില് അന്വേഷണം ആവശ്യപ്പെട്ട് വിജിലന്സ് ഡയറക്ടര്ക്ക് മനുഷ്യാവകാശ സംരക്ഷണ മിഷന് സംസ്ഥാന ഓര്ഗനൈസിംഗ് സെക്രട്ടറി ഇ.മനീഷ് പരാതി നല്കി. സ്ഥലമെടുപ്പുമായി ബന്ധപ്പെട്ട് നിലവില് നിരവധി ആക്ഷേപങ്ങള് ഉണ്ട്. അതിനു പുറമെയാണ് കളളപണം വെളുപ്പിക്കാനും കമ്മറ്റി ഒത്താശ ചെയ്തൂവെന്ന ആരോപണവും ഉയര്ന്നിട്ടുളളത്. പ്രദേശത്തെ പ്രധാന വിഷയമായി ആശുപത്രി സ്ഥലമെടുപ്പ് പ്രശ്നം ഉയര്ന്നിരിക്കുകയാണ്.
