കോട്ടയം: പുതുപ്പള്ളിയില് ബിജെപി പ്രവര്ത്തകര്ക്ക് നേരെ സിപിഎം പ്രവര്ത്തകര് നടത്തിയ ആക്രമണത്തില് ഏഴുപേര്ക്ക് പരിക്ക്. ഗുരുതരമായി പരിക്കേറ്റ രണ്ടുപേരെ മെഡിക്കല് കോളേജ് ആശുപത്രിയില് പ്രവേശിപ്പിച്ചു. 5 പേര് കോട്ടയം ജില്ലാ ആശുപത്രിയില് ചികിത്സതേടി. കമ്പിവടിക്കുള്ള അടിയില് ഗുരതരമായി പരിക്കേറ്റ ബിജെപി പുതുപ്പള്ളി പഞ്ചായത്ത് കമ്മിറ്റി പ്രസിഡന്റ് തുടിയില് പ്രശാന്ത്, സെക്രട്ടറി മഴുവഞ്ചേരില് രാജേഷ് എം പണിക്കര് എന്നിവരെയാണ് മെഡിക്കല് കോളേജില് പ്രവേശിപ്പിച്ചത്.
ഇന്നലെ രാവിലെ പത്തരയോടെ പുതുപ്പള്ളി കവലക്ക് സമീപമാണ് സംഭവം. ഐഎച്ച്ആര്ഡി വിദ്യാര്ത്ഥികള് കയറിവന്ന പുതുപ്പള്ളി പയ്യപ്പാടി റൂട്ടിലോടുന്ന സ്വകാര്യബസ്സ് എസ്എഫ്ഐക്കാര് തടഞ്ഞതിനെ ചൊല്ലിയുള്ള തര്ക്കമാണ് സംഘര്ഷത്തില് കലാശിച്ചത്. എബിവിപി സംസ്ഥാന വ്യാപകമായി നടത്തിയ വിദ്യാഭ്യാസ ബന്ദിന്റെ ഭാഗമായി ഐഎച്ച്ആര്ഡിയിലും സമരം നടത്തിയിരുന്നു. കോളേജ് അടച്ചതോടെ വിദ്യാര്ത്ഥികള് തിരികെ വീട്ടിലേക്ക് പോകാന് കയറിയ സിന്ധുവെന്ന ബസ്സാണ് അമിസ് ഫുഡ്സ് എന്ന കടയുടെ മുന്നില് തടഞ്ഞിട്ടത്.
ബസ്സ് കടയ്ക്ക് മുന്നില്നിന്നും മാറ്റിയിടണമെന്ന് കടയുടമ ആവശ്യപ്പെട്ടതാണ് ആക്രമണത്തിന് പ്രേരണയായത്. കടയിലെ ജീവനക്കാരി പുഷ്പ, വിദ്യാര്ത്ഥികളായ അഭിജിത് എസ് കൈമള്, അഖില് എസ് കൈമള്, അനൂപ് കെ നായര്, ബിനു സതീശ് എന്നിവരാണ് പരിക്കേറ്റ മറ്റുള്ളവര്.
ഡിവൈഎഫ്ഐ മേഖലാപ്രസിഡന്റ് അഖില്മുരളി എസ്എഫ്ഐ നേതാവ് ബിനുജോസഫ് എന്നിവരുടെ നേതൃത്വത്തില് സംഘടിച്ചെത്തിയ താല്പ്പതോളം വരുന്ന സിപിഎം പ്രവര്ത്തകരാണ് അക്രമം നടത്തിയത്. വടിവാള്, കമ്പിവടി തുടങ്ങിയ മാരകായുധങ്ങള് ഉപയോഗിച്ചായിരുന്നു ആക്രമണം. എംആര്എഫിലെ തൊഴിലാളികളും സംഘത്തിലുണ്ടായിരുന്നു. കടയില് ഭക്ഷണം കഴിക്കാനായി കാത്തിരുന്ന വിദ്യാര്ത്ഥികളെയും സ്ത്രീകള് അടക്കമുള്ള കടയിലെ ജീവനക്കാരെയും സംഘം അക്രമിച്ചു. എസ്എഫ്ഐക്കാര് ബസ്സ് തടഞ്ഞതറിഞ്ഞ് സ്ഥലത്തെത്തിയതായിരുന്നു ബിജെപി നേതാക്കള്.
അക്രമത്തില് പ്രതിഷേധിച്ച് ബിജെപിയുടെ നേതൃത്വത്തില് പുതുപ്പള്ളിയില് പ്രതിഷേധ പ്രകടനം നടത്തി.
