ചിറയിന്കീഴ്: ദൈവതുല്യമായ കാര്യങ്ങളാണ് ശ്രീമാതാഅമൃതാനന്ദമയി നടപ്പിലാക്കിക്കൊണ്ടിരിക്കുന്നതെന്ന് മുന് ഗവര്ണര് വക്കം ബി. പുരുഷോത്തമന്. ചിറയിന്കീഴ് മേഖലയില് മഠം നിര്മിച്ചു നല്കിയ 121 ശൗചാലയങ്ങളുടെ സമര്പ്പണവും അമൃതാ സ്വാശ്രയസംഘങ്ങള് രൂപീകരിക്കുവാന് താത്പര്യമുള്ള വനിതകളുടെ പൊതുയോഗവും ഉദ്ഘാടനം ചെയ്യുകയായിരുന്നു അദ്ദേഹം. സുനാമി ഉണ്ടായപ്പോള് അമ്മയുടെ ദൈവതുല്യമായ കാരുണ്യപ്രവര്ത്തനങ്ങള് നമ്മള് കണ്ടതാണ്. ന്യൂരാജസ്ഥാന് മാര്ബിള്സ് എംഡി സി. വിഷ്ണുഭക്തന്റെ അഭ്യര്ത്ഥന മാനിച്ച് മാതാഅമൃതാനന്ദമയി ചിറയിന്കീഴില് ഇത്തരത്തിലൊരു സംരംഭത്തിന് തുടക്കം കുറിച്ചത് ഏറെ ശ്ലാഘനീയമാണെന്നും അദ്ദേഹം കൂട്ടിച്ചേര്ത്തു.
ആശ്രയിക്കുന്നവര്ക്കെല്ലാം ആത്മശാന്തി നല്കുന്ന വ്യക്തിത്വത്തിനുടമയാണ് മാതാ അമൃതാനന്ദമയിയെന്ന് മഠത്തിന്റെ ജില്ലാ പ്രതിനിധി ബ്രഹ്മചാരി ശിവാമൃത ചൈതന്യ അദ്ധ്യക്ഷ പ്രസംഗത്തില് പറഞ്ഞു. അപേക്ഷ സമര്പ്പിച്ചിട്ടുള്ളവര്ക്കുള്ള ശൗചാലയങ്ങളുടെ നിര്മാണ സമര്പ്പണം അടുത്ത ഘട്ടത്തില് നടക്കുമെന്നും സ്വാശ്രയസംഘങ്ങള് രൂപീകരിക്കാനുള്ള പ്രവര്ത്തനങ്ങള് വരും ദിവസങ്ങളില് ഉണ്ടാകുമെന്നും ഇത്തരത്തിലൊരു സംരംഭത്തിന് ചിറയിന്കീഴ് മേഖലയില് ചുക്കാന് പിടിച്ച ന്യൂരാജസ്ഥാന് മാര്ബിള്സ് എംഡി സി. വിഷ്ണുഭക്തന് പറഞ്ഞു.
സ്വാശ്രയ സംഘം ഡയറക്ടര് രംഗനാഥന് പദ്ധതി വിശദീകരിച്ചു. ചിറയിന്കീഴ് ബ്ലോക്ക് പഞ്ചായത്ത് പ്രസിഡന്റ് ആര്. സുഭാഷ്, ബിജെപി ദക്ഷിണ കേരളാ വൈസ് പ്രസിഡന്റ് തോട്ടയ്ക്കാട് ശശി, വി.എസ്. അജിത്കുമാര്, മനോജ് ബി. ഇടമന, ചലച്ചിത്ര സംവിധായകന് വിജി തമ്പി തുടങ്ങിയവര് സംസാരിച്ചു. ശൗചാലയം പദ്ധതിയുമായി ബന്ധപ്പെട്ട് പ്രവര്ത്തിച്ച പഞ്ചായത്തംഗങ്ങളെ പഞ്ചായത്തു പ്രസിഡന്റുമാര് ആദരിച്ചു.
