ഇടുക്കി: പൂപ്പാറ-ശാന്തന്പാറ റൂട്ടില് ചന്നക്കടവ് പാലത്തിന് സമീപം ഏലപ്പട്ടയത്തില് പള്ളി നിര്മ്മാണം. ഏലത്തോട്ടത്തിലെ മരങ്ങള് വെട്ടിമാറ്റിയതിന് ശേഷമാണ് 4000 ചതുരശ്രയടി വിസ്തീര്ണത്തില് നിര്മ്മാണം.
പ്രധാന വഴിയില് നിന്ന് മാറി ഉള്ളില് നടക്കുന്ന പണി കഴിഞ്ഞ ദിവസം നാട്ടുകാരാണ് കണ്ടെത്തിയത്. പ്രദേശത്തെ പ്രമുഖ രാഷ്ട്രീയ പാര്ട്ടിക്കാരുടെ ഒത്താശയോടെയാണ് നിര്മ്മാണം. കെട്ടിടം പൂര്ണമായും കോണ്ക്രീറ്റിങ് നടത്തിയതായാണ് വിവരം. ഒറേത്തായില് ജയ്സണ് ജോസഫിന്റെ പേരിലുള്ള വസ്തുവിലാണ് നിര്മ്മാണം നടത്തുന്നത്.
ഈ കെട്ടിടത്തിന് സമീപം ഇയാള്ക്ക് വീടുണ്ടായിരുന്നു. ഈ വീടിന്റെ നമ്പര് ഉപയോഗിച്ച് പെന്തക്കോസ്തു വിഭാഗത്തിനായി പ്രാര്ത്ഥനാലയം നിര്മ്മിക്കുന്ന ജോലിയാണ് നടക്കുന്നതെന്നാണ് നാട്ടുകാര് പറയുന്നത്. എല്ലാ നിയമങ്ങളും ലംഘിച്ചാണ് നിര്മാണം. പള്ളി പണിയണമെങ്കില് ജില്ലാകളക്ടര് അനുമതി നല്കണം.
ഏലപ്പട്ടയത്തില് ഒരു നിര്മ്മാണ പ്രവര്ത്തനവും നടത്താന് പറ്റില്ല. ഏലപ്പട്ടയത്തിലെ മരം മുറിക്കാനും അനുമതിയില്ല. നിയമലംഘനങ്ങള് കണ്മുന്നില് നടക്കുമ്പോഴും ചന്നക്കടവിലെ കെട്ടിടം പൊളിച്ച് നീക്കാന് നടപടിയുണ്ടായിട്ടില്ല. കൈയേറ്റങ്ങളും അനധികൃത നിര്മ്മാണങ്ങളും കണ്ടെത്തേണ്ട ഭൂസംരക്ഷണ സേനയും ഇത് സംബന്ധിച്ച് റിപ്പോര്ട്ടുകള് കൈമാറിയിട്ടില്ലെന്നാണ് അറിയുന്നത്.
മൂന്നാറില് കൈയേറ്റം ഒഴിപ്പിക്കുന്നതിന് പ്രദേശത്തെ എംഎല്എമാരുടെ അനുമതി വേണമെന്ന് മുഖ്യമന്ത്രിയുടെ നിര്ദ്ദേശം വന്നതിനാല് റവന്യൂ ഉദ്യോഗസ്ഥര് വിഷമവൃത്തത്തിലാണ്.
