കണ്ണൂര്: സേവനവേതന വ്യവസ്ഥകള് സംബന്ധിച്ച് സുപ്രീം കോടതി നിര്ദ്ദേശങ്ങള് നടപ്പിലാക്കണമെന്നാവശ്യപ്പെട്ട് ഇന്ത്യന് നഴ്സസ് അസോസിയേഷന് ജില്ലാ കമ്മിറ്റിയുടെ നേതൃത്വത്തില് സ്വകാര്യ ആശുപത്രി നഴ്സുമാര് നടത്തുന്ന സമരം നാല് ദിവസം പിന്നിട്ടു. ജില്ലയിലെ അഞ്ച് ആശുപത്രികളിലെ നഴ്സുമാരാണ് സമര രംഗത്തുള്ളത്. സമരം നടക്കുന്ന ആശുപത്രികളുടെ പ്രവര്ത്തനം സമരം നീണ്ടതോടെ താറുമാറായി. കാഷ്വാലിറ്റി, ഡയാലിസിസ് യൂനിറ്റുകള് മാത്രമാണ് മിക്ക ആശുപത്രി കളിലും തടസ്സം കൂടാതെ പ്രവര്ത്തിക്കുന്നത്. കണ്ണൂര് നഗരത്തിലെ ധനലക്ഷ്മി,കൊയിലി,സ്പെഷ്യാലിറ്റി,ആശിര്വാദ് തളിപ്പറമ്പിലെ ലൂര്ദ് എന്നീ ആശുപത്രികളിലാണ് സമരം നടക്കുന്നത്.
സമരം പൂര്ണ്ണമാണെന്നും ഇന്നുമുതല് കൂടുതല് ആശുപത്രികളിലേക്ക് സമരം വ്യാപിപ്പിക്കുമെന്നുമാണ് അസോസിയേഷന് ഭാരവാഹികള് പറയുന്നത്. വേതന വര്ദ്ധനവാവശ്യപ്പെട്ട് മറ്റ് സ്വകാര്യ ആശുപത്രികളിലെ മാനേജ്മെന്റുകള്ക്കും നോട്ടീസ് നല്കിയിട്ടുണ്ട്. നോട്ടീസ് കാലാവധി കഴിഞ്ഞും പ്രശ്നപരിഹാരമായില്ലെങ്കില് അത്തരം ആശുപത്രികളിലും സമരം ആരംഭിക്കും. വേതന വര്ദ്ധനവിന്റെ കാര്യത്തില് സര്ക്കാരും സ്വകാര്യ ആശുപത്രി മാനേജ്മെന്റുകളും ഒളിച്ച് കളിക്കുകയാണെന്നും അസോസിയേഷന് ഭാരവാഹികള് ആരോപിക്കുന്നു. കേരളത്തില് ഡങ്കുഫീവര്, വൈറല് ഫീവര്, വയറിളക്കം, ഛര്ദ്ദി മുതലായവ പടര്ന്ന് പിടിക്കുമ്പോള് നഴ്സുമാര് സമരവുമായി രംഗത്തിറങ്ങിയത് ഏറെ പ്രതിസന്ധിയുണ്ടാക്കുന്നുണ്ട്. സമരത്തെ കണ്ടില്ലെന്ന് നടിക്കുന്ന സര്ക്കാര് നിലപാടിനെതിരെ പ്രതിഷേധം ശക്തമായിട്ടുണ്ട്. നാല് ദിവസം പിന്നിട്ടിട്ടും യാതൊരുവിധ ചര്ച്ചകള്ക്കും തയ്യാറാകാത്ത അധികൃതരുടെ നിലപാടില് അസോസിയേഷന് പ്രതിഷേധിച്ചു.
സേവനവേതന വ്യവസ്ഥകള് സംബന്ധിച്ച് സുപ്രീം കോടതി നിര്ദ്ദേശങ്ങള് നടപ്പിലാണമെന്നാവശ്യപ്പെട്ട് തിരുവനന്തപുരത്ത് നിരാഹാര സമരം നടത്തി വരികയായിരുന്ന ഇന്ത്യന് നഴ്സസ് അസോസിയേഷന് സംസ്ഥാന സെക്രട്ടറിയെ ആരോഗ്യനില ഗുരുതരമായതിനെ തുടര്ന്ന് ഇന്നലെ ആശുപത്രിയിലേക്ക് മാറ്റിയിട്ടുണ്ട്.
