ഇരിക്കൂര്: ജീവിതത്തിലെ പ്രതിസന്ധി ഘട്ടങ്ങളെ തരണം ചെയ്യാന് ദേവി ഉപാസനയിലൂടെ സാധിക്കുമെന്ന് ഡോ.എല്. ഗിരീഷ് കുമാര് പറഞ്ഞു. ഇരിക്കൂര് പെരുമണ്ണ് ചുഴലി ഭാഗവതി ക്ഷേത്രത്തില് നടന്നു വരുന്ന നവീകരണ കലശത്തിന്റെ ഭാഗമായി നടന്ന സാംസ്ക്കാരിക പരിപാടിയില് പ്രഭാഷണം നടത്തുകയായിരുന്നു അദ്ദേഹം. ആപത്തു കാലത്ത് ദേവിയുടെ പാദപത്മങ്ങളെ സ്മരിക്കണം. മനുഷ്യന് അമ്മയോട് അഭേദ്യമായ ബന്ധമാണുളളത്. ആപത്തുകാലത്തും അല്ലാത്തപ്പോഴും നിഷ്കപടതയോടെ ദേവിയുടെ മുന്നില് പ്രാര്ത്ഥിച്ചാല് ഏതൊരാള്ക്കും ഫലസിദ്ധി ലഭിക്കും. തുറന്ന മനസോടെയും ബഹുമാനത്തോടെയും അമ്മയെ വിളിച്ചാല് വിളി കേള്ക്കും. എപ്പോഴും പ്രസാദിക്കുന്ന ദേവി വിളിപ്പാടകലെയുണ്ടെന്നും അദ്ദേഹം പറഞ്ഞു.
വെച്ചുകെട്ടലുകള് അനുസരിച്ച് ജീവിക്കാന് ശ്രമിക്കുമ്പോഴാണ് ജീവിതത്തില് പിരിമുറുക്കവും സമ്മര്ദ്ദവുമെല്ലാം ഉണ്ടാകുന്നത്. പൊയ്മുഖങ്ങളില്ലാതെ തനിസ്വരൂപത്തോടു കൂടി നില്ക്കാന് സാധിക്കണം. സ്ത്രീക്ക് വളരെ വലിയ പ്രാധാന്യം ഭാരതീയ സംസ്കൃതി നല്കിയിരുന്നു. വിവാഹം കഴിക്കാന് പോകുന്ന ഭര്ത്താവ് കണ്ണു കാണാത്തവനാണെന്ന് പറഞ്ഞപ്പോള് കണ്ണുകെട്ടി അയാളുടെ കഴുത്തില് വരണമാല്യം ചാര്ത്തിയ ഗാന്ധാരി ഉള്പ്പെടെയുളള സ്ത്രീകളുടെ പാരമ്പര്യം ഉള്ക്കൊളളുന്ന നാടാണ് നമ്മുടേത്.
എന്നാല് ഈ ഇതിഹാസങ്ങളേയും കഥാപാത്രങ്ങളേയും വെറും കെട്ടുകഥകളെന്നും ഭാരതീയ കഥകള് മുഴുവന് പൊളളയാണെന്നും ഇത്തരം കാര്യങ്ങള് പ്രചരിപ്പിക്കുന്നവര് പിന്തിരിപ്പന്മാരാണെന്ന് വാദിക്കുന്ന ഒരു കൂട്ടര് നമ്മുടെ നാട്ടിലുണ്ട്.
ബുദ്ധികൊണ്ട് ജീവിക്കാന് വേണ്ടി യുക്തികൊണ്ട് വാദിക്കുന്ന പുരോഗമനവാദികള്. ഇവര് കരുതുന്നത് തങ്ങളാണ് ലോകചക്രം തിരിക്കുന്നതെന്നാണ്. യുക്തി രഹിതമാണെന്ന് വാദിച്ചാലും ഇത്തരം ഇതിഹാസ കൃതികളിലൂടേയും മറ്റും ഋഷീശ്വരന്മാര് മാനവരാശിക്ക് ചില സന്ദേശങ്ങള് നല്കിയിട്ടുണ്ട്. യുക്തി അന്വേഷിക്കുകയല്ല വേണ്ടത്. അവര് പറഞ്ഞുവെച്ച കാര്യങ്ങളിലെ അര്ത്ഥതലത്തെ മനസ്സിലാക്കാന് ശ്രമിക്കുകയാണ് വേണ്ടതെന്നും അദ്ദേഹം പറഞ്ഞു.
ചടങ്ങില് ഭാഗവതാചാര്യന് കെ.കെ.ചൂളിയാട് അധ്യക്ഷത വഹിച്ചു. നവീകരണ കമ്മിറ്റി പ്രസിഡണ്ട് പി.കെ.സോമന് നമ്പ്യാര്, ആര്.ഹരിദാസന് എന്നിവര് സംസാരിച്ചു. മാമാനം ദേവസ്വം എക്സിക്യുട്ടീവ് ഓഫീസര് പി.മുരളീധരന് ക്ഷേത്ര കമ്മിറ്റിയുടെ ഉപഹാരം ഗിരീഷ് കുമാറിന് സമ്മാനിച്ചു.
നവീകരണ കലശത്തിന്റെ ഭാഗമായി ഇന്നലെ നടന്ന സാംസ്ക്കാരിക സമ്മേളനത്തില് വത്സന് തില്ലങ്കേരി അനുഗ്രഹഭാഷണം നടത്തി. കാഞ്ഞങ്ങാട് രാമചന്ദ്രന് സമ്മേളനം ഉദ്ഘാടനം ചെയ്തു. ദേവീഭാഗവത മാനനസ്ത്രവും ആദ്ധ്യാത്മിക പ്രഭാഷണ സമിതി ജില്ലാ കമ്മിറ്റിയുടെ നേതൃത്വത്തില് ദേവീ മാഹാത്മ്യ പ്രഭാഷണവും നടന്നു. മാമാനം ദേവസ്വം എക്സിക്യൂട്ടീവ് ഓഫീസര് പി.മുരളീധരന്,ട്രസ്റ്റി കെ.ടി.ദേവിദാസന് നമ്പ്യാര് ,പി.പി.ദിവാകരന്,സി.പ്രസന്ന, എന്നിവര് സംസാരിച്ചു. പി.കെ.സോമന് നമ്പ്യാര് അധ്യക്ഷത വഹിച്ചു.ആര്.രാജന് നന്ദി പറഞ്ഞു.
