ന്യൂദല്ഹി: ഗോസംരക്ഷകരെന്ന പേരില് സാമൂഹ്യദ്രോഹികള് നടത്തുന്ന അക്രമങ്ങള്ക്കെതിരെ ശക്തമായ ഭാഷയില് പ്രധാനമന്ത്രി നരേന്ദ്ര മോദി. നിയമം കയ്യിലെടുക്കാന് ആര്ക്കും അവകാശമില്ലെന്നും പശുഭക്തിയുടെ പേരിലുള്ള കൊലപാതകങ്ങള് അംഗീകരിക്കാനാകില്ലെന്നും മോദി വ്യക്തമാക്കി.
”പശുവിനെ ഹിന്ദുക്കള് വിശുദ്ധമായി കരുതുന്നു. പശുക്കളുടെ സംരക്ഷണവും വേണ്ടതാണ്. എന്നാല് അതിന്റെ പേരില് നിയമം കയ്യിലെടുത്തുള്ള കൊലപാതകങ്ങള് അംഗീകരിക്കാനാകില്ല. മനുഷ്യരെ കൊന്നല്ല പശുവിനെ സംരക്ഷിക്കേണ്ടത്. ഒരു സമൂഹം എന്ന നിലയില് ഇവിടെ അക്രമങ്ങള്ക്ക് സ്ഥാനമില്ല. മഹാത്മാ ഗാന്ധി, ആചാര്യ വിനോബ ഭാവെ എന്നിവരേക്കാള് കൂടുതല് ഗോ സംരക്ഷണത്തെക്കുറിച്ച് ആരും സംസാരിച്ചിട്ടില്ല.
അവര് അക്രമത്തിന് എതിരായിരുന്നു”, പ്രധാനമന്ത്രി ഓര്മ്മിപ്പിച്ചു. കഴിഞ്ഞ വര്ഷം ആഗസ്തിലും ഇത്തരം അക്രമങ്ങളെ മോദി അപലപിച്ചിരുന്നു. ഗോസംരക്ഷകരായി അക്രമം നടത്തുന്നവര് സാമൂഹ്യദ്രോഹികളാണെന്നും ഇവരെ ഒറ്റപ്പെടുത്തണമെന്നും അദ്ദേഹം ആവശ്യപ്പെട്ടു.
ഗുജറാത്തിലെ സബര്മതി ആശ്രമത്തിന്റെ നൂറാം വാര്ഷികാഘോഷത്തോടനുബന്ധിച്ച് ഗാന്ധിജിയുടെ ഗുരുവായിരുന്ന രാജ്ചന്ദ്രയുടെ നൂറ്റി അമ്പതാം ജന്മവാര്ഷികാഘോഷങ്ങള് ഉദ്ഘാടനം ചെയ്യുകയായിരുന്നു മോദി. മഹാത്മാഗാന്ധിയുടെ ചിന്തകള്ക്ക് ലോകം ഇന്ന് അഭിമുഖീകരിക്കുന്ന വെല്ലുവിളികള്ക്ക് പരിഹാരം കാണാനുള്ള ശക്തിയുണ്ടെന്ന് മോദി ഓര്മ്മിപ്പിച്ചു.
അക്രമങ്ങള് നടക്കുന്നത് കര്ശനമായി തടഞ്ഞ മഹാത്മാഗാന്ധിയുടെ നാടാണിത്. ഒരു സമൂഹം എന്ന നിലയില് നമ്മുടെ ചരിത്രവുമായി ബന്ധപ്പെട്ട് നില്ക്കേണ്ടത് അനിവാര്യമാണെന്നും അദ്ദേഹം ചൂണ്ടിക്കാട്ടി.
