ഉത്തരാഖണ്ഡിനെ ഇന്ത്യയിലെ വിദ്യാഭ്യാസ മേഖലയുടെ ഹബ്ബാക്കാന് ലക്ഷ്യമിട്ടുള്ള പദ്ധതികള് ആവിഷ്ക്കരിക്കുമെന്ന് ബിജെപി പുറത്തിറക്കിയ ദര്ശനരേഖ. സംസ്ഥാനത്ത് അധികാരത്തിലെത്തിയാല് ദാരിദ്ര്യരേഖയ്ക്ക് താഴെയുള്ള വീടുകളിലെ വിദ്യാര്ത്ഥികള്ക്ക് സൗജന്യ ലാപ്ടോപ്പും സ്മാര്ട്ട് ഫോണും നല്കുമെന്നും പെണ്കുട്ടികള്ക്ക് ബിരുദാനന്തര ബിരുദം വരെയുള്ള പഠനം സൗജന്യമാക്കുമെന്നും ദര്ശന രേഖയില് വ്യക്തമാക്കുന്നു. ഡെറാഡൂണില് കേന്ദ്രധനമന്ത്രി അരുണ് ജെയ്റ്റ്ലി, ആരോഗ്യമന്ത്രി ജെ.പി നദ്ദ എന്നിവര് പങ്കെടുത്ത ചടങ്ങിലാണ് പാര്ട്ടി ദര്ശന രേഖ പ്രകാശനം ചെയ്തത്.
രാജ്യത്തിന്റെ സ്കൂള് വിദ്യാഭ്യാസ തലസ്ഥാനമെന്നാണ് തലസ്ഥാനമായ ഡെറാഡൂണ് വിശേഷിപ്പിക്കപ്പെടുന്നത്. എന്നാല് സംസ്ഥാനത്തിന്റെ മറ്റു ഭാഗങ്ങളിലും കൂടുതല് വിദ്യാഭ്യാസ സ്ഥാപനങ്ങള് കൊണ്ടുവന്ന് സംസ്ഥാനത്തെ മുഴുവന് വിദ്യാഭ്യാസ മേഖലയുടെ ഹബ്ബാക്കി മാറ്റാന് പദ്ധതികള് നടപ്പാക്കുമെന്നാണ് ബിജെപി വാഗ്ദാനം ചെയ്യുന്നത്. കൂടുതല് സ്കൂളുകള് സ്ഥാപിക്കുമെന്നും നിലവിലെ സ്കൂളുകളുടെ നിലവാരം ഉയര്ത്തുമെന്നും ബിജെപി പറയുന്നു. അധ്യാപക-അനധ്യാപകരെ കൂടുതലായി നിയമിക്കുമെന്നും പാര്ട്ടി ഉറപ്പു നല്കുന്നു. സംസ്കൃതം, വാസ്തുശാസ്ത്രം, ജ്യോതിശാസ്ത്രം തുടങ്ങിയ ഭാരതീയ വിഷയങ്ങളിലെ പഠനത്തിന് കൂടുതല് സൗകര്യമൊരുക്കും. ആരോഗ്യ മേഖലയില് പുതിയ മെഡിക്കല് കോളേജ് ആരംഭിക്കുമെന്നും ഗഡ്വാള്, കുമോണ് മേഖലകളില് ട്രോമാ കെയര് സെന്ററുകള്, എല്ലാവര്ക്കും ഹെല്ത്ത് കാര്ഡ്, എയര് ആംബുലന്സ് അടക്കം കാര്യക്ഷമമായ ആംബുലന്സ് സര്വ്വീസുകള് എന്നിവ ആരോഗ്യ മേഖലയില് ബിജെപി വാഗ്ദാനം ചെയ്യുന്നു. മെഡിക്കല് ടൂറിസത്തിന്റെ സാധ്യതകള് ബിജെപി സര്ക്കാര് അധികാരത്തിലെത്തിയാല് പ്രയോജനപ്പെടുത്തുമെന്നും ദര്ശന രേഖയിലുണ്ട്.
സംസ്ഥാനത്തിന്റെ എല്ലാ പ്രദേശത്തും 24 മണിക്കൂറും വൈദ്യുതി ഉറപ്പുവരുത്തും. ഇതിനായി ചെറിയ ജലവൈദ്യുത പദ്ധതികള് നടപ്പാക്കും. റോഡുകളുടെ അറ്റകുറ്റപ്പണികളും പുതിയ റോഡുകളുടെ നിര്മ്മാണവും അതിവേഗത്തില് പൂര്ത്തിയാക്കും. യുവാക്കള്ക്കായി മത്സര പരീക്ഷകളുടെ വിജയത്തിനായി കോച്ചിംഗ് സെന്ററുകള് ആരംഭിക്കും. കൂടുതല് വികസന പദ്ധതികള് ആരംഭിക്കുന്നതോടെ സംസ്ഥാനത്തിനകത്തു തന്നെ ആയിരക്കണക്കിന് പുതിയ തൊഴിലവസരങ്ങളും യുവാക്കള്ക്ക് വാഗ്ദാനം ചെയ്യുന്നു.
തൊഴില് നൈപുണ്യ കേന്ദ്രങ്ങള് ആരംഭിക്കുമെന്നും സ്ത്രീകള്ക്കെതിരായ കുറ്റകൃത്യങ്ങള് പരിശോധിക്കുന്നതിനായി അതിവേഗ കോടതികള് സ്ഥാപിക്കുമെന്നും ബിജെപി പറയുന്നു. ജോലി ചെയ്യുന്ന സ്ത്രീകള്ക്കായി വനിതാ ഹോസ്റ്റലുകള് സ്ഥാപിക്കുമെന്നും ദര്ശന രേഖ ഉറപ്പുനല്കുന്നു.
നിരവധി വികസന പദ്ധതികളിലൂടെ രാജ്യം പുരോഗമിച്ചുകൊണ്ടിരിക്കുന്ന അവസരത്തില് കേന്ദ്രസര്ക്കാരിനൊപ്പം ചേര്ന്ന് പ്രവര്ത്തിച്ച് ജനങ്ങള്ക്ക് വികസനത്തിന്റെ ഫലങ്ങള് എത്തിക്കണമെങ്കില് ഉത്തരാഖണ്ഡിലും ബിജെപി അധികാരത്തിലെത്തണമെന്ന് ദര്ശന രേഖയുടെ പ്രകാശനം നിര്വഹിച്ചുകൊണ്ട് കേന്ദ്രധനമന്ത്രി അരുണ് ജെയ്റ്റ്ലി പറഞ്ഞു. ജനപ്രിയ പദ്ധതികളാണ് ബിജെപി പ്രഖ്യാപിച്ചിരിക്കുന്നതെന്നും ഇതു പൂര്ത്തീകരിക്കാന് കേന്ദ്രസര്ക്കാരിന്റെ എല്ലാ സഹായവുമുണ്ടാകുമെന്നും ജെയ്റ്റ്ലി പറഞ്ഞു. മുന് മുഖ്യമന്ത്രിമാരായ ബി.സി ഖണ്ഡൂരി, രമേശ് പൊഖ്റിയാല്, വിജയ് ബഹുഗുണ, സംസ്ഥാന അധ്യക്ഷന് അജയ് ഭട്ട്, ദേശീയ ഉപാധ്യക്ഷന് ശ്യാം ജാജു എന്നിവര് ദര്ശന രേഖാ പ്രകാശന ചടങ്ങില് പങ്കെടുത്തു.
