മാഡ്രിഡ്: ഒമ്പതുപേരുമായി കളിച്ചിട്ടും നിലവിലെ ചാമ്പ്യന്മാരായ ബാഴ്സലോണ കോപ്പ ഡെല്റേ കപ്പിന്റെ ഫൈനലില്. രണ്ടാം പാദ സെമിഫൈനലില് അത്ലറ്റികോ മാഡ്രിഡിനെതിരെ 1-1ന് സമനില പാലിച്ചെങ്കിലും ഇരുപാദങ്ങളിലുമായി 3-2ന്റെ വിജയവുമായാണ് കറ്റാലന്പട കലാശക്കളിക്ക് യോഗ്യത നേടിയത്. ആദ്യപാദത്തില് 2-1നായിരുന്നു ബാഴ്സയുടെ ജയം.
കളിക്കിടെ സൂപ്പര് താരം ലൂയി സുവാരസും സെര്ജി റോബര്ട്ടോയുമാണ് ചുവപ്പുകാര്ഡ് കണ്ട് പുറത്തുപോയത്. ഫൈനലില് രണ്ടുപേര്ക്കും കളിക്കാനാവില്ല എന്നത് തിരിച്ചടിയാകും. സെര്ജി റോബര്ട്ടോ 57-ാം മിനിറ്റിലും സുവാരസ് പരിക്കു സമയത്തുമാണ് ചുവപ്പുകാര്ഡ് കിട്ടി പുറത്തുപോയത്. ബാഴ്സയിലെത്തിയശേഷം സുവാരസിന് ലഭിക്കുന്ന ആദ്യ ചുവപ്പുകാര്ഡാണിത്. 69-ാം മിനിറ്റില് അത്ലറ്റികോയുടെ യാനിക് കരാസ്കോയും മാച്ചിങ്ങ് ഓര്ഡര് ലഭിച്ച് പുറത്തായി.
സസ്പെന്ഷന് മൂലം ബാഴ്സയുടെ നെയ്മര്, അത്ലറ്റികോയുടെ ഗാബി എന്നിവര് ഇല്ലാതെയാണ് ഇരുടീമുകളും മൈതാനത്തെത്തിയത്. പന്തടക്കത്തില് നേരിയ മുന്തൂക്കം ബാഴ്സക്കുണ്ടായിരുന്നെങ്കിലും കൂടുതല് ഷോട്ടുകള് പായിച്ചത് അത്ലറ്റികോയായിരുന്നു.
ഗ്രിസ്മാനും ഫെര്ണാണ്ടോ ടോറസും മുന്നേറ്റത്തില് അത്ലറ്റികോക്കായി അണിനിരന്നതോടെ ബാഴ്സ പ്രതിരോധത്തില് നിരവധി തവണ വിള്ളല് വീഴുകയും ചെയ്തു. എന്നാല് ബാറിന് കീഴില് ബാഴ്സ ഗോളിയുടെ മികച്ച പ്രകടനം അവരെ തുണച്ചു.
തുടര്ച്ചയായ ആക്രമണ പ്രത്യാക്രമണങ്ങള്ക്കൊടുവില് 43-ാം മിനിറ്റില് കളിയിലെ ആദ്യ ഗോള്. മൈതാനമധ്യത്തുനിന്ന് ലഭിച്ച പന്തുമായി കുതിച്ചു കയറിയ ലയണല് മെസ്സി അത്ലറ്റികോ പ്രതിരോധനിരയെ മറികടന്ന് ബോക്സില് പ്രവേശിച്ച ശേഷം തൊടുത്ത ഷോട്ട് അത്ലറ്റികോ ഗോളി മിഗ്വേല് മോയ തടുത്തിട്ടു. പന്തുകിട്ടിയ ലൂയി സുവാരസിന് പന്ത് പോസ്റ്റിലേക്ക് തട്ടിയിടേണ്ട ചുമതലയെ ഉണ്ടായിരുന്നുള്ളൂ. ഇതോടെ ആദ്യപകുതിയില് ബാഴ്സ 1-0ന്റെ ലീഡ് നേടുകയും ചെയ്തു.
രണ്ടാം പകുതിയിലും വാശിയേറിയ ഫുട്ബോളാണ് ഇരുടീമുകളും കാഴ്ചവെച്ചത്. 61-ാം മിനിറ്റില് ടോറസിനെ തിരിച്ചുവിളിച്ച് കെവിന് ഗെമെയ്റോയെ അത്ലറ്റികോ കളത്തിലിറക്കി. ഇതോടെ അവരുടെ ആക്രമണങ്ങള്ക്ക് കൂടുതല് മൂര്ച്ച കൈവന്നു. ഗോള് മടക്കാന് കിണഞ്ഞു പരിശ്രമിക്കുന്നതിനിടെ അവര്ക്ക് അനുകൂലമായി 79-ാം മിനിറ്റില് പെനാല്റ്റി ലഭിക്കുകയും ചെയ്തു. എന്നാല് ഗെമെയ്റോയുടെ ക്രോസ്ബാറിലിടിച്ച് പുറത്ത്. നാല് മിനിറ്റിനുശേഷം ഗെമെയ്റോ ടീമിന്റെ സമനില ഗോള് കണ്ടെത്തി. ബോക്സിനുള്ളില് വച്ച് ഗ്രിസ്മാന് നല്കിയ പാസാണ് ഗെമെയ്റോ ഇത്തവണ വലയിലെത്തിച്ചത്. അവസാന മിനിറ്റുകളില് വിജയഗോളിനായി അത്ലറ്റികോ കിണഞ്ഞു ശ്രമിച്ചെങ്കിലും ബാഴ്സ ഗോളിയെ കീഴടക്കാന് കഴിഞ്ഞില്ല.
