കോഴിക്കോട്: വിദ്യാഭ്യാസം വ്യക്തിയുടെ സമഗ്ര വികാസത്തിനുതകുന്നതാകണമെന്ന് ബിജെപി ദേശീയ നിര്വാഹക സമിതി അംഗം പി.കെ. കൃഷ്ണദാസ് അഭിപ്രായപ്പെട്ടു. എന്ടിയു സംസ്ഥാന സമ്മേളനത്തിന്റെ ഭാഗമായി നടന്ന സംഘടനാ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
നിലവിലെ വിദ്യാഭ്യാസ സമ്പ്രദായം കുട്ടികളുടെ സമഗ്രവികാസത്തിന് ഉതകുന്നതല്ല. പൂര്ണ്ണനായ മനുഷ്യനെ വാര്ത്തെടുക്കാന് നിലവിലെ വിദ്യാഭ്യാസ സമ്പ്രദായം കൊണ്ട് സാധിക്കുന്നില്ല. മെക്കാളെ ഉപേക്ഷിച്ചുപോയ വിദ്യാഭ്യാസ സമ്പ്രദായം തന്നെയാണ് നാം ഇപ്പോഴും പിന്തുടരുന്നത്. ഇതില് മാറ്റം വരേണ്ടതുണ്ട്. ധാര്മ്മിക മൂല്യങ്ങള്ക്ക് പ്രാധാന്യം നല്കി ദേശീയ ബോധമുള്ളവരും ഭാരതത്തിന്റെ പാരമ്പര്യത്തില് അഭിമാനം കൊള്ളുന്നവരുമായ യുവ തലമുറയെ വാര്ത്തെടുക്കാന് ഉതകുന്നതാകണം നമ്മുടെ വിദ്യാഭ്യാസം. ഭാരതം ലോക ഗുരുസ്ഥാനത്ത് വിരാജിക്കുമ്പോള് ഭാരതത്തിന്റെ സ്വത്വം പൂര്ണ്ണമായും മനസ്സിലാക്കുന്നവരാകണം ഇവിടുത്തെ ജനങ്ങള്.
ദീനദയാല് ഉപാദ്ധ്യായ മുന്നോട്ടുവെച്ച ഏകാത്മ മാനവദര്ശനമാണ് നമ്മെ മുന്നോട്ടു നയിക്കുന്നത്. ഏകാത്മ മാനവ ദര്ശനം ഭാരതീയ ദര്ശനമാണ്. ഭാരതത്തിന്റെ സാംസ്കാരിക പ്രഭാവത്തില് നിന്നും ഉയിര്കൊണ്ട ദര്ശനം തന്നെയാണത്. അത് കാലാതീതമായ സമഗ്രജീവിത ദര്ശനമാണെന്നും പി.കെ. കൃഷ്ണദാസ് അഭിപ്രായപ്പെട്ടു.
ചിന്മയാ ഓഡിറ്റോറിയത്തില് നടന്ന സമ്മേളനത്തില് എന്ടിയു സംസ്ഥാന സമിതി അംഗം ടി.പി. ജയചന്ദ്രന് അദ്ധ്യക്ഷത വഹിച്ചു. സമ്മേളന സ്മരണിക പ്രകാശനം ബിജെപി സംസ്ഥാന ജനറല് സെക്രട്ടറി കെ. സുരേന്ദ്രന് നിര്വഹിച്ചു. സമകാലിക സമൂഹത്തില് അദ്ധ്യാപകര്ക്ക് വളരെ നിര്ണ്ണായകമായ ദൗത്യമാണ് നിറവേറ്റാനുള്ളതെന്ന് കെ. സുരേന്ദ്രന് അഭിപ്രായപ്പെട്ടു. കേരളത്തിലെ ദേശീയ പ്രസ്ഥാനങ്ങള്ക്ക് കരുത്തു പകരുന്ന തരത്തിലുള്ള പ്രവര്ത്തനങ്ങള് നടത്താന് എന്ടിയുവിന് കഴിയണമെന്നും അദ്ദേഹം കൂട്ടിച്ചേര്ത്തു. എബിആര്എസ്എം ദക്ഷിണ ക്ഷേത്രീയ സംഘടനാ സെക്രട്ടറി കെ. മോഹനകണ്ണന് മുഖ്യപ്രഭാഷണം നടത്തി.
കൗണ്സിലര് ഇ പ്രശാന്ത്കുമാര് ആശംസ നേര്ന്നു. എന്ടിയു സംസ്ഥാന ജനറല് സെക്രട്ടറി പി.എസ്. ഗോപകുമാര് സംഘടനാ റിപ്പോര്ട്ടും ഖജാന്ജി എം. ശിവദാസ് വരവ് ചെലവ് കണക്കും അവതരിപ്പിച്ചു. സംസ്ഥാന വൈസ് പ്രസിഡന്റ് സി. ജീജാഭായ് സ്വാഗതവും സംസ്ഥാന സമിതി അംഗം ഹേമലത തമ്പാട്ടി നന്ദിയും പറഞ്ഞു.
