തുറവൂര്: ലക്ഷങ്ങളുടെ സുനാമി ഫണ്ട് പാഴായി, വിനോദ സഞ്ചാര കേന്ദ്രമായ അന്ധകാരനഴി ബീച്ചിന്റെ വികസനം കടലാസില് ഒതുങ്ങി. അറ്റകുറ്റപണികള് യഥാസമയം നടത്താത്തതുമൂലം നടപ്പാതയും കൈവരികളും തകര്ന്ന നിലയില്. വിദേശികളടക്കം നൂറ് കണക്കിന് വിനോദ സഞ്ചാരികള് ദിവസേന എത്തുന്ന ബീച്ചില് അടിസ്ഥാന സൗകര്യങ്ങള് പോലും ഇല്ലാത്ത സ്ഥിതിയാണ്.
കടല് സൗന്ദര്യം ആസ്വദിക്കുന്നതിനായി ഇവിടെയെത്തുന്നവര്ക്ക് നടപ്പാത നിര്മിച്ച് സ്റ്റീല് കൈവരികള് സ്ഥാപിച്ചിരുന്നു. ഇതോടനുബന്ധിച്ച് വിനോദ സഞ്ചാരികള്ക്ക് വിശ്രമിക്കുന്നതിനും മറ്റുമായി കെട്ടിടവും നിര്മിച്ചിരുന്നു. തുടര് പ്രവര്ത്തനങ്ങള് നടക്കാതെ വന്നതോടെ കെട്ടിടം നാശോന്മുഖമായി. നടപ്പാത തകര്ന്നു. കൈവരികള് തുരുമ്പെടുത്ത് ദ്രവിച്ച നിലയിലാണ്.
സുനാമി ഫണ്ട് ഉപയോഗിച്ച് വര്ഷങ്ങള്ക്ക് മുന്പാണ് നടപ്പാത നിര്മിച്ചത്. കൈവരികള് ദ്രവിച്ച് തകര്ന്നതോടെ ബീച്ചില് എത്തുന്ന സഞ്ചാരികള് അപകടത്തില് പെടുന്നത് പതിവായി. കുട്ടികളാണ് പലപ്പോഴും അപകടത്തില് പെടുന്നത്. കെട്ടിടത്തിന്റെ മേല്ക്കൂരയിലെ ഷീറ്റുകള് ഇളകിയ നിലയിലാണ്. ഗുണനിലവാരമില്ലാത്ത വസ്തുക്കള് ഉപയോഗിച്ചാണ് നിര്മാണ പ്രവര്ത്തനങ്ങള് നടത്തിയതെന്നാണ് പ്രദേശവാസികളുടെ ആരോപണം. നിര്മാണത്തിന് മേല്നോട്ടം വഹിച്ച ഉദ്യോഗസ്ഥര് അലംഭാവം കാട്ടിയതായും വിമര്ശനമുണ്ട്.
