തിരുവനന്തപുരം: ഭാരതീയ മസ്ദൂര് സംഘിന്റെ നേതൃത്വത്തിലുള്ള ഭാരതീയ ടെലികോം എംപ്ലോയീസ് യൂണിയന്റെ അഖിലേന്ത്യാസമ്മേളനം സമാപിച്ചു. സമാപനത്തിന് മുന്നോടിയായി നടന്ന ബജറ്റ് വിശകലന സമ്മേളനത്തില് പത്രപ്രവര്ത്തകന് ഹരി എസ്. കര്ത്ത മുഖ്യപ്രഭാഷണം നടത്തി.
ഇന്ത്യന് സമ്പദ്ഘടനയിലെ കൊളോണിയല് യുഗത്തിനും നെഹ്റൂവിയന് സ്വാധീനത്തിനും അന്ത്യം കുറിക്കുന്നതായിരുന്നു ധനമന്ത്രി അരുണ് ജെയ്റ്റ്ലി അവതരിപ്പിച്ച കേന്ദ്രബജറ്റെന്ന് അദ്ദേഹം പറഞ്ഞു. രണ്ടു ബജറ്റുകളെന്ന പതിവ് അവസാനിപ്പിച്ച് ബജറ്റവതരണത്തിന്റെ സമയവും മാറ്റി. സോവിയറ്റ് മാതൃകയിലുള്ള പ്ലാനിംഗ് കമ്മീഷനും ബജറ്റിന് മുന്നോടിയായുള്ള നെഹ്റൂവിയന് ആസൂത്രണവും നിര്ത്തലാക്കി. പകരം സംസ്ഥാനങ്ങള്ക്ക് കൂടുതല് അധികാരവും പ്രാതിനിധ്യവും ഉറപ്പാക്കുന്ന നീതി ആയോഗ് നിലവില് വന്നു.
ബജറ്റിലെ നെഹ്റൂവിയന് സ്വാധീനം അവസാനിപ്പിച്ചതോടെ പദ്ധതി, പദ്ധതിയേതര ചെലവുകളെന്ന വിവേചനവും അവസാനിച്ചു. നഗരകേന്ദ്രീകൃത ബജറ്റ് എന്ന തലത്തില് നിന്ന് ഗ്രാമകേന്ദ്രീകൃത ബജറ്റെന്ന തന്ത്രപരമായ വ്യതിയാനവും കേന്ദ്രസര്ക്കാര് കൊണ്ടുവന്നു. ഇതാണ് കെ.പി. രാംമോഹന്, ബുലാത്ര രാമകൃഷ്ണന് തുടങ്ങി ഇടതുബുദ്ധിജീവികളുടെയും നിഷ്പക്ഷരായ മറ്റ് സാമ്പത്തികവിദഗ്ധരുടെയും പ്രശംസ പിടിച്ചുപറ്റാന് കാരണമായതെന്നും അദ്ദേഹം ചൂണ്ടിക്കാട്ടി.
സമ്പന്നര്ക്കു പകരം മധ്യവര്ഗത്തിന്റെയും കീഴാളവര്ഗത്തിന്റെയും ഉന്നതി ലക്ഷ്യംവയ്ക്കുന്ന ബജറ്റായിരുന്നു അവതരിപ്പിച്ചത്. ആറു പതിറ്റാണ്ടായി രാഷ്ട്രീയപ്പാര്ട്ടികളെയും നേതാക്കളെയും വിശുദ്ധപശുക്കളായി കണ്ടിരുന്ന സമീപനവും ധനമന്ത്രി ഉപേക്ഷിച്ചു. അതിനെ പൊളിച്ചെഴുതുന്ന നിലപാടുകളാണ് ബജറ്റില് കണ്ടത്. മൂലധനച്ചെലവ് 25 ശതമാനം വര്ധിപ്പിച്ചെങ്കിലും സാമ്പത്തിക കമ്മി നിജപ്പെടുത്താന് സാധിച്ചത് ബജറ്റിന്റെ നേട്ടമാണ്. ഇതാണ് നിഷ്പക്ഷരുടെയും ഇടതുസാമ്പത്തിക വിദഗ്ധരുടെയും പ്രശംസ നേടിത്തന്നത്. ഇന്ത്യന് സമ്പദ്ഘടനയില് വസന്തത്തിന്റെ ഇടിമുഴക്കമാണ് ഈ ബജറ്റിലൂടെ പ്രതിധ്വനിച്ചതെന്നും അദ്ദേഹം വ്യക്തമാക്കി.
ഭാരതീയ ടെലികോം എംപ്ലോയീസ് യൂണിയന് അഖിലേന്ത്യാ പ്രസിഡന്റ് എ. ഗണേഷ് ആധ്യക്ഷ്യം വഹിച്ചു. ബിഎംഎസ് ദേശീയ സെക്രട്ടറി എസ്. ദുരൈരാജ്, എംടിഎന്എല് മസ്ദൂര്സംഘ് ജനറല്സെക്രട്ടറി ധരംരാജ് സിംഗ്, ബിടിഇയു ജനറല്സെക്രട്ടറി ആര്.സി. പാണ്ഡെ, ഐടിഇഎഫ് പ്രസിഡന്റ് രത്നേഷ്കുമാര്, ജനറല്സെക്രട്ടറി എസ്.വി.എസ്. സുബ്രഹ്മണ്യം, ബിടിഇയു നേതാക്കളായ ഉണ്ണികൃഷ്ണന് ഉണ്ണിത്താന്, എസ്. ദേവീദാസ്, തുളസീധരന്പിള്ള, കെ.എസ്.എസ്. തമ്പി എന്നിവര് പങ്കെടുത്തു. ഉച്ചയ്ക്കുശേഷം പുതിയ ഭാരവാഹികളെ തെരഞ്ഞെടുത്തതോടെ രണ്ടുദിവസം നീണ്ടുനിന്ന സമ്മേളനത്തിന് പരിസമാപ്തിയായി.
