സിപിഎം വിഘടനവാദികളുടെയും ഭീകരവാദികളുടെയും പാര്ട്ടി: എം.രാധാകൃഷ്ണന്
കണ്ണൂര്: ഇന്ത്യയിലെ സിപിഎം വിഘടനവാദികളുടെയും ഭീകരവാദികളുടെയും പാര്ട്ടിയായി മാറിയിരിക്കുകയാണെന്ന് രാഷ്ട്രീയ സ്വയംസേവക സംഘം പ്രാന്തസഹകാര്യവാഹ് എം.രാധാകൃഷ്ണന്. കണ്ണൂര് സ്റ്റേഡിയം കോര്ണറില് മാര്ക്സിസ്റ്റ് അക്രമവിരുദ്ധ ജനകീയ സമിതി നടത്തിയ പ്രതിഷേധക്കൂട്ടായ്മ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തീവ്രവാദികളുടെ സഹായത്തോടെ കലാപം നടത്താനാണ് സിപിഎം ശ്രമിക്കുന്നത്. ബിജെപിയുടെയും ആര്എസ്എസിന്റെയും മുന്നേറ്റത്തെ സിപിഎം ഭയപ്പെടുകയാണ്. കേരളത്തില് ഇടതു മുന്നണി അധികാരത്തില് വന്നതിനു ശേഷമുള്ള അക്രമങ്ങള് പരിശോധിച്ചാല് അത് യാദൃശ്ചികമല്ലെന്നും ആസൂത്രിതമാണെന്നും നമുക്ക് കാണാന് സാധിക്കും. സിപിഎം സ്വാധീന മേഖലകളില് ബിജെപി മുന്നേറ്റം നടത്തിയ കേന്ദ്രങ്ങളിലാണ് വ്യാപകമായ അക്രമം നടത്തുന്നത്. പട്ടികജാതിയില്പ്പെട്ടവരെയും ന്യൂനപക്ഷങ്ങളെയും തെറ്റിദ്ധരിപ്പിച്ച് കൂടെ നിര്ത്താനായിരുന്നു സിപിഎം ശ്രമിച്ചിരുന്നത്. എന്നാല് ഇത് ഫലം കണ്ടില്ല. ഇപ്പോള് ന്യൂനപക്ഷങ്ങളെയും ദളിതരെയും തെരഞ്ഞ് പിടിച്ച് അക്രമിക്കുകയാണ് ചെയ്യുന്നതെന്നും അദ്ദേഹം പറഞ്ഞു.
ഒരു പ്രത്യയശാസ്ത്രമെന്ന നിലയില് ലോകത്ത് കമ്മ്യൂണിസം നിലവിലില്ല. അതുകൊണ്ട് തന്നെ നിങ്ങള് അക്രമം നിര്ത്തു ആശയ സംവാദം നടത്താമെന്ന് പറഞ്ഞാല് അത് പ്രായോഗികമല്ല. കേരളത്തില് നിലനില്ക്കുന്ന അവസാനത്തെ തുരുത്ത് നിലനിര്ത്താന് സിപിഎം അക്രമമാര്ഗം സ്വീകരിക്കുകയാണ്. അധികാരത്തിന്റെ സുഖസൗകര്യങ്ങള് നിലനിര്ത്താന് നുണകള് പ്രചരിപ്പിക്കുകയും അക്രമങ്ങള് അഴിച്ച് വിടുകയുമാണ് ചെയ്യുന്നത്. കമ്മ്യൂണിസം ലോകത്ത് നിന്ന് തുടച്ച് നീക്കപ്പെടാന് കാരണം സ്വന്തം അണികളെ തന്നെ കൊന്നു തള്ളിയതു കൊണ്ടാണ്. റഷ്യയില് മൂന്നു വര്ഷം കൊണ്ട് സ്റ്റാലിന് കൊന്ന് തള്ളിയത് മൂന്നു ലക്ഷം പേരെയാണ്. തുറുങ്കിലടക്കപ്പെട്ട പതിനഞ്ച് ലക്ഷത്തോളം പേര് പിന്നീട് പുറം ലോകം കണ്ടില്ല. ലോക ചരിത്രം പരിശോധിച്ചാല് ഏറ്റവും ക്രൂരന്മാരായ ഭരണാധികാരികളായിരുന്നു കമ്മ്യൂണിസ്റ്റുകാര് എന്ന് കാണാന് കഴിയും. അതിന്റെ അവസാനത്തെ കണ്ണിയാണ് പിണറായി വിജയന്.
ദേശീയ പ്രസ്ഥാനങ്ങള് എന്നും സിപിഎമ്മിന് ശത്രുക്കളായിരുന്നു. രാജ്യത്തിന്റെ ശത്രുക്കളെ കൂടെ നിര്ത്തി അസ്വസ്തത നിലനിര്ത്തി അക്രമം അഴിച്ച് വിടുകയയല്ലാതെ സിപിഎമ്മിന് മുന്നില് മറ്റ് മാര്ഗങ്ങളില്ല. കേന്ദ്രസര്ക്കാര് നോട്ട് അസാധുവാക്കിയപ്പോള് കേരളത്തില് സിപിഎം കലാപ സദൃശമായ സാഹചര്യമാണ് സൃഷ്ടിച്ചത്. രാജ്യത്തിന്റെ മറ്റ് ഭാഗങ്ങളിലൊന്നും തന്നെ അത്തരത്തിലുള്ള സാഹചര്യമുണ്ടായില്ല. അവര്ക്ക് സംരക്ഷിക്കാന് കള്ളപ്പണമുള്ളതുകൊണ്ടാണ് സിപിഎം ഇത്തരത്തിലുള്ള നിലപാട് സ്വീകരിച്ചത്. ലോക കമ്മ്യൂണിസ്റ്റ് പ്രസ്ഥാനത്തിന് ചരമമടയാന് കേരളത്തെ തെരഞ്ഞെടുത്തതാണെന്നും അത് അവര്തന്നെ സ്വയം ചെയ്തുകൊള്ളുമെന്നും രാധാകൃഷ്ണന് പറഞ്ഞു. ബിഎംഎസ് ജില്ലാ പ്രസിഡണ്ട് അഡ്വ.കെ.പി.സുരേഷ്കുമാര് അധ്യക്ഷത വഹിച്ചു.
