കുടയത്തൂര്: ഭാരതീയ സംസ്കാരത്തില് അധിഷ്ഠിതമായ വിദ്യാഭ്യാസം പകര്ന്നു നല്കുന്ന വിദ്യാനികേതന്റെ പ്രവര്ത്തനം പ്രശംസനീയമെന്ന് കേന്ദ്ര ഉപരിതല ഗതാഗത വകുപ്പ് സഹമന്ത്രി പൊന് രാധാകൃഷ്ണന് അഭിപ്രായപ്പെട്ടു.
കുടയത്തൂര് സരസ്വതി വിദ്യാനികേതനില് കൊച്ചിന് ഷിപ്പ് യാര്ഡിന്റെ സഹകരണത്തോടെ പണി തീര്ത്ത ട്രൈബല് ഹോസ്റ്റലിന്റെ ഉദ്ഘാടന കര്മ്മം നിര്വഹിച്ച് സംസാരിക്കുകയായിരുന്നു അദ്ദേഹം. പട്ടികവര്ഗ്ഗ സമൂഹത്തില് നിന്നുമുള്ള വിദ്യാര്ത്ഥിനികളെ കണ്ടെത്തി ആധുനിക വിദ്യാഭ്യാസം നല്കുവാനുള്ള ഉദ്യമം എറെ ശ്രദ്ധിക്കപ്പെടും. സാഹചര്യം മൂലം വിദ്യാഭ്യാസം ലഭിക്കാത്ത പിന്നോക്ക വിഭാഗങ്ങള് ഏറെയുള്ള പ്രദേശമാണ് ഇടുക്കി.
ഇവരെ സമൂഹത്തിന്റെ മുഖ്യധാരയിലേക്ക് കൊണ്ടുവരുവാന് ട്രൈ ബല് ഹോസ്റ്റലിന് കഴിയണം. ട്രൈബല് ഹോസ്റ്റലിന് ചുറ്റുമതിലിന്റെ നിര്മ്മാണത്തിനായി മുപ്പത് ലക്ഷം രൂപ ചടങ്ങില് വെച്ച് കേന്ദ്ര മന്ത്രി പ്രഖ്യാപിച്ചു. ചടങ്ങില് സ്കൂള് പ്രസിഡന്റ് കെ.എന്.രഘു അധ്യക്ഷനായി. ജോയിസ് ജോര്ജ് എം.പി., ഷിപ്പ് യാര്ഡ് ചെയര്മാന് മധു എസ് നായര്, ഷിപ്പ് യാര്ഡ് ഓഡിറ്റ് കമ്മറ്റി ചെയര്മാന് ബി.രാധാകൃഷ്ണമേനോന് ,വിദ്യാഭാരതി ദേശീയ ജോയിന്റ് സെക്രട്ടറി എന് സിറ്റി രാജഗോപാല്, കോവില്മല രാജാവ് രാമന് രാജമന്നാന്, എന്നിവര് വിശിഷ്ടാതിഥികളായി പങ്കെടുത്തു.
കുടയത്തൂര് പഞ്ചായത്ത് പ്രസിഡന്റ് പുഷ്പാ വിജയന്, ബിജെപി ജില്ലാ പ്രസിഡന്റ് ബിനു ജെ. കൈമള്, കുടയത്തൂര് സര്വീസ് സഹകരണ ബാങ്ക് പ്രസിഡന്റ് കെ കെ മുരളീധരന്, സ്കൂള് രക്ഷാധികാരി ഡോ. കെ.സോമന്, ബ്ലോക്ക് പ്രസിഡന്റ് എം മോനിച്ചന്, വാര്ഡ് മെമ്പര് ബിന്ദു സുധാകരന്, വിദ്യാനികേതന് ജില്ലാ പ്രസിഡന്റ് എം കെ തങ്കപ്പന്, സ്കൂള് സെക്രട്ടറി എം കെ സുരേന്ദ്രന് എന്നിവര് പ്രസംഗിച്ചു.
