ചെന്നൈ: തമിഴ്നാട് മുന് മുഖ്യമന്ത്രി അന്തരിച്ച ജെ.ജയലളിതയുടെ അനന്തരവള് ദീപാ ജയകുമാറിന്റെ പുതിയ പാര്ട്ടിയായ ‘എംജിആര് അണ്ണ ദീപ പറവൈ’യില് നിന്ന് ഭര്ത്താവ് മാധവന് രാജിവച്ചു. ഉടനെ പുതിയ പാര്ട്ടി രൂപീകരിക്കുമെന്ന് മാധവന് പറഞ്ഞു.
ജയലളിതയുടെ സമാധിയില് ആദരാഞ്ജലിയര്പ്പിച്ചശേഷമാണ് മാധവന് പാര്ട്ടി വിടുമെന്ന പ്രഖ്യാപനം നടത്തിയത്. ചില ദുഷിച്ച ശക്തികള് ഉളളതിനാല് എംജിആര് അണ്ണ ദീപ പറവൈയ്ക്ക് സ്വതന്ത്രമായി പ്രവര്ത്തിക്കാനാവില്ല. അതുകൊണ്ടാണ് തന്റേതായ പാര്ട്ടിയുണ്ടാക്കാന് തീരുമാനിച്ചത്. ഭാര്യ ദീപയുമായി അഭിപ്രായവ്യത്യാസമില്ലെന്നും മാധവന് പറഞ്ഞു.
ജയലളിതയുടെ 69-ാം പിറന്നാളിന്റെ തലേന്നാണ് ദീപ ജയകുമാര് പുതിയ പാര്ട്ടി രൂപീകരിച്ചത്. ചെന്നൈയില് നടന്ന പാര്ട്ടി രൂപീകരണയോഗത്തില് മാധവനും പങ്കെടുത്തിരുന്നു. പാര്ട്ടി രൂപീകരണവേളയില് ദീപാ ജയകുമാറും മാധവനും പളനിസ്വാമിയെ തമിഴ്നാട് മുഖ്യമന്ത്രിയാക്കിയതിനെ വിമര്ശിച്ചിരുന്നു.
ജനങ്ങള് ആഗ്രഹിച്ച മുഖ്യമന്ത്രിയല്ല പളനി സ്വാമി. ഇത്തരത്തിലുളള അട്ടിമറികള് പാര്ട്ടിക്ക് ഗുണകരമല്ല. സര്ക്കാരിന് പിന്നില് ഒരു വഞ്ചക സംഘമുണ്ട്. ഈ സംഘത്തെ പുറത്തുചാടിക്കാന് തങ്ങള് നിരന്തര പോരാട്ടം നടത്തുമെന്ന് ദീപ അന്ന് പറഞ്ഞിരുന്നു.
