സെന്റ് ലൂസിയ: വിന്ഡീസിനെതിരായ മൂന്ന് മത്സരങ്ങളുടെ ഏകദിന പരമ്പയില് അഫ്ഗാനിസ്ഥാന് ചരിത്ര വിജയം. ആദ്യ കളിയില് 63 റണ്സിനാണ് വിന്ഡീസ് ക്രിക്കറ്റിലെ കുഞ്ഞന്മാരായ അഫ്ഗാനോട് തോറ്റത്. ഇതോടെ പരമ്പരയില് അഫ്ഗാനിസ്ഥാന് 1-0ന് മുന്നില്.
സ്കോര് അഫ്ഗാനിസ്ഥാന് 50 ഓവറില് ആറ് വിക്കറ്റിന് 212. വിന്ഡീസ് 44.4 ഓവറില് 149 റണ്സിന് എല്ലാവരും പുറത്ത്.
8.4 ഓവറില് വെറും 18 റണ്സ് മാത്രം വിട്ടുകൊടുത്ത് ഏഴ് വിക്കറ്റുകള് പിഴുത റഷീദ് ഖാനാണ് വിന്ഡീസിനെ തകര്ത്തെറിഞ്ഞത്. ഏകദിന ക്രിക്കറ്റിലെ മികച്ച നാലാമത്തെ പ്രകടനം നടത്തിയ റഷീദ് ഖാന് തന്നെ മാന് ഓഫ് ദി മാച്ചും. ഐപിഎല്ലില് സണ്റൈസ് ഹൈദരബാദിനുവേണ്ടിയും മികച്ച പ്രകടനം നടത്തിയിരുന്നു റഷീദ് ഖാന്. 14 കളികളില് നിന്ന് 17 വിക്കറ്റുകളാണ് റഷീദ് ഐപിഎല്ലില് നേടിയത്.
ടോസ് നേടി ബാറ്റിങ്ങ് തെരഞ്ഞെടുത്ത അഫ്ഗാനിസ്ഥാന് 50 ഓവറില് ആറ് വിക്കറ്റിന് 212 റണ്സെടുക്കാനേ കഴിഞ്ഞുള്ളൂ. 102 പന്തില് നിന്ന് 81 റണ്സെടുത്ത ഓപ്പണര് ജാവേദ് അഹമ്മദിയാണ് ടോപ് സ്കോറര്. ഗുല്ബദിന് നെയ്ബ് 28 പന്തില് നിന്ന് പുറത്താകാതെ 41 റണ്സ് നേടി.
മറുപടി ബാറ്റിങ്ങിനിറങ്ങിയ വിന്ഡീസ് തരക്കേടില്ലാത്ത നിലയില് നിന്നാണ് റഷീദ് ഖാന്റെ ബൗളിങ്ങില് തകര്ന്നടിഞ്ഞത്. ആറാം ബൗളറായാണ് റഷീദ് ഖാന് പന്തെറിയാനെത്തിയത്. ആദ്യ രണ്ട് പന്തുകളില് ജാസണ് മുഹമ്മദിനെയും റോസ്റ്റണ് ചേസിനെയും പുറത്താക്കി റഷീദ് വരവറിയിച്ചു. തന്റെ രണ്ടാം ഓവറില് വീണ്ടും രണ്ട് വിക്കറ്റുകള്. ഇത്തവണ മടങ്ങിയത് ഹോപ്പും ഹോള്ഡറും. പിന്നീട് ആഷ്ലി നഴ്സിനെയും അല്സാരി ജോസഫിനെയും മിഗേല് കുമ്മിന്സിനെയും റാഷിദ് പുറത്താക്കിയതോടെ വിന്ഡീസ് കനത്ത പരാജയം ഏറ്റുവാങ്ങി. 35 റണ്സെടുത്ത ജേസണ് മുഹമ്മദാണ് വിന്ഡീസ് നിരയിലെ ടോപ് സ്കോറര്.
