കാക്കനാട്: കുട്ടമ്പുഴ ഗ്രാമപഞ്ചായത്തിലെ വാരിയം കോളനിയിലെ 67 ആദിവാസി കുടുംബങ്ങള്ക്ക് ജില്ലാ കളക്ടര്ക്ക് കൈവശരേഖ നല്കും. പന്തപ്രയിലേക്ക് പുനരധിവസിപ്പിക്കുന്ന നടപടികളുടെ ഭാഗമായാണിത്. ഡിഎഫ്ഒ, ട്രൈബല് ഡവലപ്മെന്റ് ഓഫീസര് എന്നിവര് ഒപ്പിട്ട പട്ടയ വിതരണം നാളെ നടക്കുന്ന ഉന്നതതല യോഗത്തിനു ശേഷം തീരുമാനിക്കും.
67 കുടുംബങ്ങളെയാണ് പുനരധിവസിപ്പിക്കുന്നത്. വകുപ്പ് ഡയറക്ടര്, പ്രിന്സിപ്പല് സെക്രട്ടറി, ജില്ലാ കളക്ടര്, ഡിഎഫ്ഒ എന്നിവരുടെ നേതൃത്വത്തില് നടക്കുന്ന യോഗത്തില് പ്രത്യേക പാക്കേജ് തയാറാക്കിയാകും പദ്ധതി നടപ്പാക്കുക.
വീട്, കുടിവെള്ളം, റോഡ്, വൈദ്യുതി തുടങ്ങിയ അടിസ്ഥാന സൗകര്യങ്ങള് ഏര്പ്പെടുത്തുന്നതുമായി ബന്ധപ്പെട്ട കാര്യങ്ങള് കളക്ടര് മുഹമ്മദ് വൈ. സഫീറുള്ളയുടെ അധ്യക്ഷതയില് നടന്ന ആദിവാസി പുനരധിവാസ യോഗം വിലയിരുത്തി.
ആദിവാസികള്ക്കുള്ള അടിസ്ഥാന സൗകര്യങ്ങളുടെ നിര്മ്മാണം വേഗത്തിലാക്കാന് കളക്ടര് നിര്ദേശം നല്കി. നേര്യമംഗലം, എടക്കാട്ടുവയല് എന്നീ പുനരധിവാസ മേഖലകളിലെ പ്രവര്ത്തനങ്ങളുടെ അവലോകനവും നടന്നു.
നേര്യമംഗലത്തെ ആദിവാസി മേഖലയില് ഇതുവരെ പട്ടയം കൈപ്പറ്റാത്തവര്ക്ക് നോട്ടീസ് അയയ്ക്കാന് തീരമാനിച്ചു. ഒന്പതു പേരാണ് പട്ടയം കൈപ്പറ്റാത്തത്. 45 പേര്ക്ക് ടോയ്ലെറ്റ് നിര്മ്മിക്കാന് 25,000 രൂപ വീതം അനുവദിച്ചു. പൊതുസ്ഥലത്ത് എന്ആര്ഇജിഎല് പദ്ധതി പ്രകാരം രണ്ടു കിണറുകള് നിര്മ്മിക്കാന് കവളങ്ങാട് ഗ്രാമപഞ്ചായത്തിന് നിര്ദേശം നല്കി.
ജില്ലയുടെ വിവിധ ഭാഗങ്ങളില് നിന്ന് നേര്യമംഗലത്ത് താമസിക്കാനെത്തുന്ന കുടുംബങ്ങളുടെ റേഷന് കാര്ഡ് പുതിയ റേഷന് കാര്ഡുകളുടെ വിതരണത്തോടൊപ്പം മാറ്റി നല്കും. ഭവന നിര്മ്മാണം, കുടിവെള്ള പദ്ധതി, വൈദ്യുതീകരണം, കമ്മ്യൂണിറ്റി ഹാള് നിര്മ്മാണം, തൊഴില് സൗകര്യങ്ങള് തുടങ്ങിയ വിഷയങ്ങളും യോഗം ചര്ച്ച ചെയ്തു.
എടക്കാട്ടുവയലില് ഭവന നിര്മ്മാണം വൈകുന്നത് ജലദൗര്ലഭ്യം മൂലമാണെന്നും ആവശ്യമായ സൗകര്യങ്ങള് ലഭ്യമാക്കുന്നത് സംബന്ധിച്ച് പട്ടിക വര്ഗ വകുപ്പിനെ അറിയിച്ചിട്ടുണ്ടെന്നും കുടുംബശ്രീ മിഷന് അറിയിച്ചു. 38 വീടുകളുടെ നിര്മ്മാണമാണ് ആരംഭിക്കാനുള്ളത്. ജലദൗര്ലഭ്യം രൂക്ഷമായ ഈ മേഖലയില് കുടിവെള്ള പദ്ധതി കാര്യക്ഷമായി പൂര്ത്തിയാക്കണമെന്ന് കളക്ടര് വാട്ടര് അതോറിറ്റിക്ക് നിര്ദേശം നല്കി.
പദ്ധതിക്കു കീഴില് ജില്ലയില് ഭൂമി ലഭ്യമല്ലാത്ത സാഹചര്യത്തില് കോര്പ്പറേഷന് പരിധിയില് 5 സെന്റും പഞ്ചായത്ത് പരിധിയില് 10 സെന്റ് ഭൂമിയും നല്കുന്നതിനുള്ള പദ്ധതി ഭേദഗതി ശുപാര്ശ സര്ക്കാരിന് സമര്പ്പിക്കും.
പട്ടികവര്ഗ വികസന ഓഫീസര് ജി. അനില് കുമാര്, കോതമംഗലം തഹസില്ദാര്, പട്ടികവര്ഗ വികസന ഓഫീസ് സൂപ്രണ്ട് ജിജി തോമസ്, പിഡബ്ല്യുഡി റോഡ്സ് ആന്ഡ് ബ്രിഡ്ജസ് വിഭാഗം ഉദ്യോഗസ്ഥര്, കെഎസ്ഇബി, വാട്ടര് അതോറിറ്റി, കുടുംബശ്രീ, കൃഷി, ഭൂജല വകുപ്പ്, കവളങ്ങാട് ഗ്രാമപഞ്ചായത്ത് ജീവനക്കാര് തുടങ്ങിയവര് യോഗത്തില് പങ്കെടുത്തു.
