തിരുവനന്തപുരം: ഭിന്നശേഷിക്കാരായ കുട്ടികള്ക്ക് സ്കൂള് പ്രവേശനം നിഷേധിക്കരുതെന്ന് സംസ്ഥാന മനുഷ്യാവകാശ കമ്മീഷന്. നൂറുശതമാനം വിജയത്തിന് വേണ്ടി സ്കൂള് മത്സരിക്കുമ്പോള് ഭിന്നശേഷിക്കാരായ കുട്ടികള്ക്ക് പ്രവേശനം പോലും നിഷേധിക്കുകയാണെന്ന് കമ്മീഷന് ആക്റ്റിംഗ് അദ്ധ്യക്ഷന് പി.മോഹനദാസ് നിരീക്ഷിച്ചു.
വിദ്യാഭ്യാസത്തിനുള്ള അവകാശം ഭരണഘടനാദത്തമാണെന്ന് കമ്മീഷന് ഉത്തരവില് പറഞ്ഞു. സൗജന്യവും നിര്ബന്ധവുമായ വിദ്യാഭ്യാസം രാജ്യത്തെ കുട്ടികള്ക്ക് നിയമനിര്മ്മാണത്തിലൂടെ ഉറപ്പാക്കിയിട്ടുണ്ട്. നൂറുശതമാനം സാക്ഷരത കൈവരിച്ച സംസ്ഥാനം ഭിന്നശേഷിക്കാരായ കുട്ടികള്ക്ക് സ്കൂള് പ്രവേശനം നിഷേധിക്കുന്നത് ഭരണഘടനാ വിരുദ്ധവും മനുഷ്യാവകാശ ലംഘനവുമാണെന്ന് കമ്മീഷന് ഉത്തരവില് പറഞ്ഞു.
ഭിന്നശേഷിക്കാരായ കുട്ടികള്ക്ക് സ്പെഷ്യല് സ്കൂളുകള് കേരളത്തില് പ്രവര്ത്തിക്കുന്നുണ്ടെങ്കിലും ആവശ്യാനുസരണം സീറ്റുകള് ലഭ്യമല്ല. ഭിന്നശേഷിക്കാരായ കട്ടികള്ക്ക് സ്കൂളുകള് പ്രവേശനം നിഷേധിക്കുന്നതായുള്ള ആരോപണത്തെ കുറിച്ച് അനേ്വഷിക്കാനും കമ്മീഷന് ഉത്തരവിട്ടു.
വിദ്യാഭ്യാസ, സാമൂഹ്യനീതി, ഉന്നതവിദ്യാഭ്യാസ വകുപ്പ് സെക്രട്ടറിമാര് ഒരു മാസത്തിനകം അനേ്വഷണ റിപ്പോര്ട്ട് ഫയല് ചെയ്യണം. ഭിന്നശേഷിക്കാരായ കുട്ടികള്ക്ക് സംസ്ഥാനത്ത് ലഭ്യമായ വിദ്യാഭ്യാസ സൗകര്യങ്ങളുടെ വിശദാംശങ്ങള് റിപ്പോര്ട്ടിലുണ്ടാകണമെന്നും കമ്മീഷന് നിര്ദ്ദേശിച്ചു.
