ഹൈദരാബാദ്: വിവാദങ്ങളും ആവേശവും ഒരുപോലെ കത്തിക്കയറിയ ഓസ്ട്രേലിയന് പരമ്പരയ്ക്കു ശേഷം ഇതാ ഇന്ത്യയില് വീണ്ടും ക്രിക്കറ്റ് കാലം. ഇന്ത്യന് പ്രിമിയര് ലീഗിന്റെ പത്താം സീസണ് തുടങ്ങാന് നാലു ദിവസം മാത്രം ബാക്കി നില്ക്കെ സൂപ്പര് താരങ്ങളുടെ പരിക്കു ആശങ്കയുണര്ത്തുന്നു. ഇന്ത്യന് ക്യാപ്റ്റന് വിരാട് കോഹ്ലി അടക്കമുള്ള താരങ്ങള് പരിക്കിന്റെ നിഴലിലാണ്. അവരില് പലരും കളിക്കുമോ എന്നു തന്നെ സംശയം.
ഏപ്രില് അഞ്ചിന് ഹൈദരാബാദിലെ ആദ്യ മത്സരം കഴിഞ്ഞ വര്ഷത്തെ ഫൈനലിന്റെ തനിയാവര്ത്തനം. ഹൈദരാബാദ് സണ്റൈസേഴ്സും റോയല് ചലഞ്ചേഴ്സ് ബെംഗളൂരുവും തമ്മിലാണ് ഉദ്ഘാടന പോരാട്ടം.
എട്ട് ടീമുകള് റൗണ്ട് റോബിന് അടിസ്ഥാനത്തില് മത്സരിക്കുന്ന ടൂര്ണമെന്റില് 60 കൡകള്. എട്ടുടീമുകള് ഹോം എവേ അടിസ്ഥാനത്തിലാണ് പരസ്പരം കൊമ്പുകോര്ക്കുക. കൂടുതല് പോയിന്റ് നേടുന്ന നാല് ടീമുകള് എലിമിനേറ്റര് പോരാട്ടത്തില് ഏറ്റുമുട്ടും. ഇതില് വിജയിക്കുന്ന രണ്ടു ടീമുകള് തമ്മിലാണ് ഫൈനല്.
ലീഗ് മത്സരങ്ങള് മേയ് 14ന് ദല്ഹി ഡെയര്ഡെവിള്സ്-റോയല് ചലഞ്ചേഴ്സ് പോരാട്ടത്തോടെ അവസാനിക്കും. 16 ന് ആദ്യ ക്വാളിഫയര്. 17ന് എലിമിനേറ്റര് പോരാട്ടവും 19ന് രണ്ടാം ക്വാളിഫൈ. ഈ മത്സരങ്ങളുടെ വേദികള് തീരുമാനിച്ചിട്ടില്ല. മെയ് 21ന് ഹൈദരാബാദിലെ രാജീവ് ഗാന്ധി രാജ്യാന്തര സ്റ്റേഡിയത്തിലാണ് ഫൈനല്.
നിലവിലെ ചാമ്പ്യന്മാരായ സണ്റൈസേഴ്സ് ഹൈദരാബാദ്, റണ്ണേഴ്സപ്പ് ബെംഗളൂരു റോയല് ചലഞ്ചേഴ്സ്, മുന്ചാമ്പ്യന്മാരായ മുംബൈ ഇന്ത്യന്സ്, കൊല്ക്കത്ത നൈറ്റ് റൈഡേഴ്സ്, ദല്ഹി ഡെയര് ഡെവിള്സ്, റൈസിങ് പൂനെ സൂപ്പര് ജയന്റ്, കിങ്സ് ഇലവന് പഞ്ചാബ്, ഗുജറാത്ത് ലയണ്സ് എന്നീ ടീമുകളാണ് പത്താം പതിപ്പില് കിരീടത്തിനായി ഏറ്റുമുട്ടുന്നത്.
ബെന് സ്റ്റോക്സ് കോടിപതി
ഇത്തവണത്തെ താരലേലത്തില് ഇംഗ്ലണ്ടിന്റെ ബെന് സ്റ്റോക്സിനാണ് ഏറ്റവും ഉയര്ന്ന തുക ലഭിച്ചത്. രണ്ട് കോടി രൂപ അടിസ്ഥാനവിലയുണ്ടായിരുന്ന സ്റ്റോക്സിനെ 14.5 കോടിരൂപയ്ക്ക് റൈസിങ് പൂനെ സൂപ്പര് ജയന്റാണ് സ്വന്തമാക്കിയത്. യുവരാജ് സിങ്ങിനുശേഷം ഐപിഎല് ചരിത്രത്തില് ഒരു കളിക്കാരന് ലഭിക്കുന്ന ഏറ്റവും വലിയ തുകയാണ് ബെന് സ്റ്റോക്സിന് ലഭിച്ചത്. താരലേലത്തില് ഏറ്റവും കൂടുതല് പണം ചെലവഴിച്ചതും പൂനെ തന്നെ. 65.7 കോടി രൂപ മുടക്കി.
ബെന് സ്റ്റോക്സ്
ഇംഗ്ലണ്ടിന്റെ തന്നെ പേസര് ടൈമള് മില്സിനും വമ്പന് തുക ലഭിച്ചു. 50 ലക്ഷം അടിസ്ഥാന വിലയുണ്ടായിരുന്ന മില്സിനെ 12 കോടി രൂപക്കാണ് റോയല് ചലഞ്ചേഴ്സ് സ്വന്തം കൂടാരത്തിലെത്തിച്ചത്. ഒരു ബൗളര്ക്ക് ലഭിച്ച ഏറ്റവും ഉയര്ന്ന തുകയായിരുന്നു ഇത്.
ദക്ഷിണാഫ്രിക്കന് പേസര് കഗീസോ റബാദയാണ് നേട്ടമുണ്ടാക്കിയ മറ്റൊരു കളിക്കാരന്. അഞ്ചുകോടി രൂപയ്ക്ക് റബാദ ദല്ഹിയിലെത്തി. ന്യൂസിലന്ഡിന്റെ ട്രെന്റ് ബോള്ട്ടും ഇതേ തുകയ്ക്ക് കൊല്ക്കത്ത നൈറ്റ് റൈഡേഴ്സിലെത്തി. ഇരുവര്ക്കും യഥാക്രമം 1 കോടിയും 1.5 കോടിയുമായിരുന്നു അടിസ്ഥാന വില.
ഇത്തവണത്തെ ലേലത്തില് ആകെ 350 കളിക്കാരായിരുന്നു. ആദ്യ ഘട്ടത്തില് 108. ഇതില് 33 പേരെ ടീമുകള് സ്വന്തമാക്കി. രണ്ടാം ഘട്ടത്തിലും 33 കളിക്കാര് വിറ്റുപോയി. ആകെ വിറ്റ 66ല് 27 പേര് വിദേശകളിക്കാര്.
കേരളത്തിന്റെ താരങ്ങള്
മലയാളി താരം ബാസില് തമ്പിയും മികച്ച നേട്ടമുണ്ടാക്കി. 10 ലക്ഷം രൂപ അടിസ്ഥാന വിലയുണ്ടായിരുന്ന തമ്പിയെ 85 ലക്ഷത്തിന് ഗുജറാത്ത് ലയണ്സ് സ്വന്തമാക്കി. സഞ്ജു സാംസണെ ദല്ഹി ഡെയര് ഡെവിള്സും സച്ചിന് ബേബിയെ റോയല് ചലഞ്ചേഴ്സും നിലനിര്ത്തുകയും ചെയ്തു.
ബാസില് തമ്പി
അതേസമയം ഇഷാന്ത് ശര്മ്മ, ഇര്ഫാന് പഠാന്, പ്രഗ്യാന് ഓജ, ചേതേശ്വര് പൂജാര, പര്വേസ് റസൂല്, ആര്.പി. സിങ് എന്നിവരെ വാങ്ങാനും ആളുണ്ടായില്ല. ദക്ഷിണാഫ്രിക്കയുടെ മികച്ച സ്പിന്നറായ ഇമ്രാന് താഹിറിനും ആവശ്യക്കാരുണ്ടായില്ല. പിന്നീട് റൈസിങ് പൂനെ സൂപ്പര് ജയന്റ് താഹിറിനെ ടീമിലെടുത്തു. പരിക്കേറ്റ് ഐപിഎല്ലില് നിന്ന് പിന്മാറിയ മിച്ചല് മാര്ഷിന് പകരക്കാരനായിട്ടാണ് താഹിറിനെ പൂനെ സ്വന്തം പടയിലെടുത്തത്.
പരിക്കിന്റെ കളി
മാര്ഷിന് പുറമെ മറ്റു ചിലരും പരിക്കും വ്യക്തിപരമായ കാരണങ്ങളാലും ടൂര്ണമെന്റില് നിന്ന് പിന്മാറിയിട്ടുണ്ട്. ദല്ഹി ഡെയര് ഡെവിള്സിന്റെ ദക്ഷിണാഫ്രിക്കന് താരങ്ങളായ ജെ.പി. ഡുമ്നി, ക്വിന്റണ് ഡി കോക്ക്, റോയല് ചലഞ്ചേഴ്സിന്റെ ഇന്ത്യന് താരം കെ.എല്. രാഹുല്, പൂനെയുടെ ആര്. അശ്വിന് എന്നിവരാണ് പിന്മാറിയവരില് പ്രമുഖര്. രാഹുലിന് തോളിനേറ്റ പരിക്കും അശ്വിന് ആന്ത്രവീക്കവുമാണ് തിരിച്ചടിയായത്. ഇന്ത്യയുടെയും റോയല് ചലഞ്ചേഴ്സിന്റെയും നായകന് വിരാട് കോഹ്ലിക്കും ഐപിഎല് നഷ്ടമാകുമെന്നാണ് സൂചന.
കെ.എല്. രാഹുല്
ഓസ്ട്രേലിയക്കെതിരെ റാഞ്ചിയില് നടന്ന മൂന്നാം ടെസ്റ്റിനിടെ ഫീല്ഡിങ്ങില് തോളെല്ലിനു പരിക്കേറ്റതാണ് കോഹ്ലിയുടെ കാര്യവും സംശയത്തിലാക്കിയത്. കൂടാതെ മറ്റു ചില താരങ്ങളുടെ പങ്കാളിത്തവും സംശയത്തില്. ഇന്ത്യന് താരങ്ങളായ മുരളി വിജയ്, ഓസ്ട്രേലിയയുടെ മിച്ചല് സ്റ്റാര്ക്ക്, ദക്ഷിണാഫ്രിക്കയുടെ എബി ഡിവില്ലിയേഴ്സ്, സണ്റൈസേഴ്സിന്റെ മുസ്താഫിസുര് റഹ്മാന്, കിങ്സ് ഇലവന് പഞ്ചാബിന്റെ മാര്ട്ടിന് ഗുപ്റ്റില്, ഗുജറാത്ത് ലയണ്സിന്റെ ഡ്വെയ്ന് ബ്രാവോ തുടങ്ങിയവരും പരിക്കിന്റെ പിടിയിലാണ്.
ആര്. അശ്വിന്
ഇവരില് പലര്ക്കും ആദ്യ ചില മത്സരങ്ങള് നഷ്ടപ്പെടുമെന്നാണ് സൂചന. അതിനിടെ രവീന്ദ്ര ജഡേജയോടും ഉമേഷ് യാദവിനോടും ഐപിഎല്ലിലെ ആദ്യ രണ്ട് ആഴ്ചയിലെ മത്സരങ്ങളില് നിന്ന് വിട്ടു നില്ക്കാന് ബിസിസിഐ നിര്ദേശം നല്കിയിട്ടുണ്ട്. തുടര്ച്ചയായ പരമ്പരകള്ക്ക് ശേഷം ഐപിഎല്ലിലും കളിക്കുന്നത് കായികക്ഷമത കുറക്കുമെന്നാണ് ബിസിസിഐ മെഡിക്കല് ടീമിന്റെ റിപ്പോര്ട്ടിനെ തുടര്ന്നാണിത്.
