മാഡ്രിഡ്: സ്പാനിഷ് ലീഗ് ഫുട്ബോളില് നിലവിലെ ചാമ്പ്യന്മാരായ ബാഴ്സലോണക്ക് തകര്പ്പന് വിജയം. സസ്പെന്ഷന് കാരണം സൂപ്പര്താരം ലയണല് മെസ്സിയില്ലാതെ ഇറങ്ങിയ ബാഴ്സലോണ ഒന്നിനെതിരെ നാല് ഗോളുകള്ക്ക് ഗ്രനാഡയെ തകര്ത്തു.
പന്തടക്കത്തിലും ഷോട്ടുകള് കൈവശം വെക്കുന്നതിലും എതിരാളികളേക്കാള് ഏറെ മുന്നിട്ടുനിന്ന ബാഴ്സലോണക്കായി ആദ്യ ഗോള് നേടിയത് ഉറുഗ്വെയ്ന് സൂപ്പര് താരം ലൂയി സുവാരസ്. ആദ്യ പകുതിയുടെ അവസാന മിനിറ്റിലായിരുന്നു സുവാരസിന്റെ ഗോള്. ജോര്ഡി ആല്ബയുടെ പാസ് സ്വീകരിച്ച് ബോക്സിന് പുറത്തുനിന്ന് പായിച്ച ഷോട്ടാണ് ഗ്രനാഡ വലയില് കയറിയത്. ഇതിന് മുന്പ് നിരവധി അവസരങ്ങള് ബാഴ്സക്ക് ലഭിച്ചെങ്കിലും നെയ്മറും സുവാരസും ഉള്പ്പെട്ട താരനിര അവയെല്ലാം പാഴാക്കി. ആദ്യപകുതിയില് ബാഴ്സ 1-0ന് മുന്നിട്ടുനിന്നു.
എന്നാല് ലീഡ് നേടിയ ആഹ്ലാദം ഏറെ നീണ്ടുനിന്നില്ല. രണ്ടാം പകുതി ആരംഭിച്ച് അഞ്ച് മിനിറ്റായപ്പോഴേക്കും ഗ്രനാഡ ജെര്മി ബോഗയിലൂടെ സമനില ഗോള് നേടി. പിന്നീട് 64-ാം മിനിറ്റില് അല്കാസര് ഗാര്ഷ്യയിലൂടെ ബാഴ്സ വീണ്ടും ലീഡ് നേടി. തുടര്ന്ന് 83-ാം മിനിറ്റില് ഇവാന് റാക്കിറ്റിക്കും പരിക്കുസമയത്തിന്റെ ആദ്യ മിനിറ്റില് സൂപ്പര്താരം നെയ്മറും ലക്ഷ്യം കണ്ടതോടെ ബാഴ്സയുടെ ഗോള് പട്ടിക പൂര്ണ്ണം. ബാഴ്സക്കായി നെയ്മര് നൂറ് ഗോളെന്ന നേട്ടവും സ്വന്തമാക്കി. വിജയത്തോടെ 29 കളികളില് നിന്ന് 66 പോയിന്റുമായി ബാഴ്സലോണ നിലവിലെ രണ്ടാം സ്ഥാനം ഭദ്രമാക്കി നിര്ത്തുകയും ചെയ്തു.
മറ്റൊരു മത്സരത്തില് റയല് മാഡ്രിഡും മികച്ച ജയം സ്വന്തമാക്കി. മറുപടിയില്ലാത്ത മൂന്ന് ഗോളുകള്ക്ക് അലാവസിനെയാണ് തോല്പ്പിച്ചത്. സൂപ്പര്താരം ക്രിസ്റ്റിയാനോ റൊണാള്ഡോ ഗോളടി മറന്നുപോയ മത്സരത്തില് 31-ാം മിനിറ്റില് കരിം ബെന്സേമ, 85-ാം മിനിറ്റില് ഇസ്കോ, 88-ാം മിനിറ്റില് നാച്ചോ എന്നിവര് റയലിനായി ലക്ഷ്യം കണ്ടു. വിജയത്തോടെ റയല് പോയിന്റ് പട്ടികയില് ഒന്നാം സ്ഥാനം നിലനിര്ത്തുകയും ചെയ്തു. രണ്ടാമതുള്ള ബാഴ്സലോണയേക്കാള് ഒരു മത്സരം കുറച്ചു കൡച്ച റയലിന് 68 പോയിന്റാണുള്ളത്.
മറ്റൊരു മത്സരത്തില് കരുത്തരായ സെവിയയെ സ്പോര്ട്ടിങ്ങ് ഗിജോണ് ഗോള്രഹിത സമനിയില് പിടിച്ചുകെട്ടി. ജയിച്ചിരുന്നെങ്കില് മൂന്നാം സ്ഥാനത്തേക്കുയരാനുള്ള അവസരമാണ് സമനില നേടിയതോടെ സെവിയ നഷ്ടമാക്കിയത്. ഡിപോര്ട്ടീവോ ലാ കൊരൂണയെ 3-0ന് മുക്കി വലന്സിയയും മികച്ച ജയം നേടി.
