ആലപ്പുഴ: കൊല്ലത്തെ ചക്കുവളളി ക്ഷേത്രഭൂമി കൈയേറിയവര് ഒഴിഞ്ഞു പോകണമെന്ന കോടതി ഉത്തരവിന്റെ കാലാവധി ഇന്ന് അവസാനിക്കാനിരിക്കെ ഉത്തരവ് നടപ്പാക്കിയില്ലെങ്കില് കര്സേവ നടത്തുമെന്ന് ഹിന്ദു ഐക്യവേദി സംസ്ഥാന ജനറല് സെക്രട്ടറി ഇ.എസ്. ബിജു പറഞ്ഞു.
ഇടുക്കിയില് കുരിശുകുത്തി കയ്യേറിയ സ്ഥലം ഒഴിവാക്കി കയ്യേറ്റം ഒഴിപ്പിക്കാന് സര്ക്കാര് ശ്രമിച്ചാല് ശൂലംകുത്തി പ്രതിരോധിക്കുമെന്ന് ബിജു പറഞ്ഞു. ഇടുക്കിയില് മന്ത്രി എം.എം. മണിയുടെ സഹോദരനും സിപിഎം ജനപ്രതിനിധിയും കൈയേറിയിട്ടുളള ഭൂമി ഒഴിപ്പിച്ചില്ലെങ്കില് സമരം ശക്തമാക്കും. പാഞ്ചാലിമേട്ടിലും വളളിയാങ്കാവിലും കൈയേറ്റം വ്യാപകമാണ്. ഒരു പ്രത്യേക വിഭാഗക്കാരാണ് ഇവിടങ്ങള് കൈയേറിയിട്ടുളളത്.
ഭൂരഹിതര്ക്ക് ഭൂമി പതിച്ചു നല്കുക, മതചിഹ്നങ്ങള് സ്ഥാപിച്ചുളള കൈയേറ്റങ്ങള് ഒഴിപ്പിക്കുക, പാര്ട്ടി നേതാക്കളുടെ കൈയേറ്റഭൂമി തിരിച്ചുപിടിക്കുക, ടാറ്റാ എസ്റ്റേറ്റും ബോയ്സ് എസ്റ്റേറ്റും ഏറ്റെടുത്ത് ലാന്ഡ് ബാങ്കില് ചേര്ക്കുക എന്നീ ആവശ്യങ്ങള് ഉന്നയിച്ച് മെയ് 23 ന് ഇടുക്കി കളക്ട്രേറ്റിലേക്ക് മാര്ച്ച് സംഘടിപ്പിക്കും.
അതിരപ്പളളി ജലസേചന പദ്ധതി സര്ക്കാര് ഉപേക്ഷിക്കണമെന്ന് ബിജു ആവശ്യപ്പെട്ടു. ജനഹിതം മറന്ന് പദ്ധതി നടപ്പിലാക്കാന് ശ്രമിച്ചാല് അതിരപ്പളളിയില് ജനപ്രതിരോധനിര തീര്ക്കും. നൊന്തുപെറ്റ വയറിനെ ചവിട്ടി മെതിച്ച പോലീസ് കേരളത്തിന് അപമാനമാണ്. പത്രസമ്മേളനത്തില് സംസ്ഥാന സമിതിയംഗം എസ്. വിനോദ് പങ്കെടുത്തു.
