പാലക്കാട് : ചിലമതഗ്രന്ഥങ്ങള് ദൈവത്തിന്റെ കല്പനയായും അതനുസരിക്കാത്തവരെ ദൈവം ശിക്ഷിക്കുന്നുവെന്നും, ദൈവകല്പനകള് അനുസരിക്കുന്നവരെ ദൈവം രക്ഷിക്കുന്നുവെന്നെല്ലാം പറഞ്ഞ് വിശ്വാസികളില് ഭയം ജനിപ്പിച്ച് മുതലെടുക്കുന്ന പ്രവാചകന്മാര് കൂടിവരുന്നതായി സ്വാമി ഉദിത് ചൈതന്യ.
വടക്കന്തറ തിരുപുരായ്ക്കന് ഭഗവതി ക്ഷേത്രത്തില് പ്രഭാഷണം നടത്തുകയായിരുന്നു അദ്ദേഹം. എന്താണ് യഥാര്ത്ഥ ആത്മീയത എന്ന് മനസിലാക്കണമെങ്കില് ഭഗവത്ഗീതയെങ്കിലും സമൂഹം പഠിക്കേണ്ടതുണ്ട്.
മനുഷ്യജീവിതത്തെ ശാസ്ത്രീയമായി അപഗ്രഥിച്ച് ഒരു വ്യക്തിയുടെ കഴിവും, കഴിവുകേടുകളും കാണിച്ചുതന്ന് ഓരോ വ്യക്തിക്കും അവനവനില് അന്തര്ലീനമായ കഴിവുകളെ വികസിപ്പിക്കാനുള്ള മാര്ഗ്ഗം കാണിച്ച് തരുന്ന ഉത്തമ പ്രചോദന അമൃതധാരയാണ് ഭഗവത്ഗീത. വിശ്വാസമല്ല മനുഷ്യനു വേണ്ടത് കാര്യങ്ങളെ അപഗ്രഥിച്ചും, വിശകലനം ചെയ്തും, ശാസ്ത്രീയമായി മനസ്സിലാക്കാനുള്ള അറിവും, കഴിവും നേടിയെടുത്താല് മാത്രമെ നേടേണ്ടത് നേടുവാനും, ദൗര്ബല്യങ്ങളെ അതിവര്ത്തിക്കുവാനും സാധിക്കുകയുള്ളൂ.
ഭാരതത്തില് മുഗളരും, പാശ്ചാത്യരും ഭരിച്ച സമയത്തുപോലും നമ്മുടെ പൈതൃകം കൈവിടാതെ സൂക്ഷിച്ചുവെച്ച നമ്മുടെ പൂര്വീകന്മാര് നമുക്ക് തന്നിട്ടുള്ള പൈതൃകത്തെ കാത്ത് സൂക്ഷിച്ചതുകൊണ്ടാണ് ഇന്നും അത് കെടാവിളക്കായി നില്ക്കുന്നത്. മനുഷ്യമനസ്സ് ഏറെ സങ്കീര്ണ്ണമായ ഒരു ശക്തി വിശേഷമാണ്. അത് എങ്ങിനെ രൂപപ്പെട്ടുവെന്നോ, മരണശേഷം എങ്ങോട്ട് പോകുന്നുവെന്നോ, ശരീരത്തില് ആര് അതിനെ നിലനിര്ത്തുന്നുവെന്നോ എന്നെല്ലാം ഇതുവരെ ആരും നമ്മുക്ക് മനസ്സിലാക്കിതന്നിട്ടില്ല.
അവിടെയാണ് ഈ ചോദ്യങ്ങള്ക്കെല്ലാം ഉത്തരവുമായി ഭഗവദ്ഗീത കടന്നുവരുന്നത്. അതുകൊണ്ടുതന്നെ ഇതിനെ ഒരു ഉത്തമ ജീവിതശാസ്ത്രമായി നാം മനസ്സിലാക്കണം സ്വാമി ഉദിത്ചൈതന്യ പറഞ്ഞു.
