പത്തനംതിട്ട: ആറന്മുള ശ്രീ പാര്ത്ഥസാരഥി ക്ഷേത്രത്തിലെ പ്രസിദ്ധമായ അഷ്ടമിരോഹിണി വള്ളസദ്യയ്ക്കായി അടുപ്പില് അഗ്നിപകര്ന്നു. ഇന്നലെ രാവിലെ 11.53 നും 12.13 നും മദ്ധ്യേയുള്ള മുഹൂര്ത്തത്തില് ക്ഷേത്ര മേല്ശാന്തി അരവിന്ദന് നമ്പൂതിരി ശ്രീകോവില് നിന്നും പകര്ന്ന് നല്കിയ ദീപം ഊട്ടുപുരയിലെ അടുപ്പിലേക്ക് മുതിര്ന്ന പാചകക്കാരന് പകര്ന്നതോടെ സദ്യയുടെ ഒരുക്കങ്ങള് ആരംഭിച്ചു.
ആചാരപ്പെരുമയോടെ ചേനപ്പാടി സംഘം അഷ്ടമിരോഹിണി വള്ളസദ്യയ്ക്കുള്ള പാളത്തൈര് ക്ഷേത്രത്തില് സമര്പ്പിച്ചു. ഇന്നലെ 12.30 ഓടെ വാഴൂര് തീര്ത്ഥപാദാശ്രമത്തിലെ സ്വാമി ഗരുഡ ധ്വജാനന്ദ തീര്ത്ഥപാദരുടെ നേതൃത്വത്തില് എത്തിയ ഘോഷയാത്രാ സംഘത്തെ ക്ഷേത്രത്തിന്റെ കിഴക്കേ നടയില് ദേവസ്വം ബോര്ഡിന്റേയും പള്ളിയോട സേവാസംഘത്തിന്റേയും ക്ഷേത്ര ഉപദേശകസമിതിയുടേയും നേതൃത്വത്തില് ഭക്തജനങ്ങള് സ്വീകരിച്ച് ആനയിച്ചു. ക്ഷേത്രത്തിന് പ്രദക്ഷിണം വെച്ച ചേനപ്പാടി സംഘം കൊടിമര ചുവട്ടില് പാളത്തൈര് ഭഗവാന് സമര്പ്പിച്ചു. വാഴൂര് തീര്ത്ഥപാദാശ്രമത്തിലെ ഗോശാലയില് നിന്നുമുള്ളതും ഭക്തജനങ്ങള് സമര്പ്പിച്ചതുമായ പാല് ഉപയോഗിച്ചാണ് പ്രത്യേകം തൈര് തയ്യാറാക്കിയത്. ആയിരം ലിറ്റര് തൈരാണ് ഭഗവാന് സമര്പ്പിച്ചത്.
അഷ്ടമിരോഹിണി വള്ളസദ്യ നാളെ രാവിലെ 11 ന് ആദ്ധ്യാത്മിക പ്രഭാഷക ഉഷാ സുരേഷ് ഉദ്ഘാടനം ചെയ്യും. മൂന്നുലക്ഷത്തിലധികം ആളുകള് അഷ്ടമിരോഹിണി വള്ളസദ്യയില് പങ്കെടുക്കുമെന്നാണ് പ്രതീക്ഷിക്കുന്നത്. സദ്യയ്ക്ക് ആവശ്യമായ വിഭവങ്ങള് 51 കരകളില് നിന്നുമാണ് ശേഖരിച്ചിട്ടുള്ളത്. പള്ളിയോട സേവസംഘം ആക്ടിംഗ് പ്രസിഡന്റ് എന്.പി.ശങ്കര നാരായണപിള്ള, സെക്രട്ടറി രതീഷ് ആര്.മോഹന്, ദേവസ്വം അസി കമ്മീഷണര് വേണുഗോപാല്നായര് എന്നിവരുടെ നേതൃത്വത്തിലുള്ള നിര്വ്വാഹകസമിതിയുടെ മേല്നോട്ടത്തിലാണ് അഷ്ടമിരോഹിണി വള്ളസദ്യ നടക്കുന്നത്.
