പാക് ഷെല്ലാക്രമണത്തില് കേടുപാടുകളേറ്റ നൗഷേരയിലെ ഒരുവീട്(ചിത്രം- പിടിഐ)
ജമ്മു: ജമ്മു-കശ്മീരിലെ ബാല്ക്കോട്ട് മേഖലയില് പാക്സൈന്യം വീണ്ടും കരാര്ലംഘിച്ച് വെടിവയ്പ് നടത്തി. ബാല്ക്കോട്ടിലെ നിയന്ത്രണ രേഖയില് ഒരു മണിക്കൂറോളം പാക്സേന തുടര്ച്ചയായി വെടിയുതിര്ക്കുകയായിരുന്നുവെന്ന് പ്രതിരോധ വക്താവ് പറഞ്ഞു. ഷെല്ലാക്രമണം തുടരുന്നതിനാല് 1700 ഓളം പേരെ സുരക്ഷിതസ്ഥാനങ്ങളിലേക്ക് മാറ്റിപ്പാര്പ്പിച്ചു.
രജൗരിയിലും നൗഷേര മേഖലയിലും കഴിഞ്ഞ ദിവസങ്ങളില് സമാനമായ രീതിയില് പാക്സൈന്യം വെടിവയ്പ് നടത്തിയിരുന്നു. നൗഷേരയില് രണ്ടു സിവിലിയന്മാര് കൊല്ലപ്പെടുകയും മൂന്നു പേര്ക്ക് പരിക്കേല്ക്കുകയും ചെയ്തിരുന്നു. കൊല്ലപ്പെട്ടവരുടെ കുടുംബാംഗങ്ങള്ക്ക് ജില്ലാഭരണകൂടം അടിയന്തിര ധനസഹായമായി ഒരു ലക്ഷം രൂപ പ്രഖ്യാപിച്ചിട്ടുണ്ട്.
ആഭ്യന്തര മന്ത്രാലയത്തിന്റെ കണക്കു പ്രകാരം 2016-ല് 449 തവണയാണ് പാകിസ്ഥാന് കരാര്ലംഘിച്ച് അതിര്ത്തിയില് വെടിവയ്പു നടത്തിയത്. 2015-ല് ഇത് 405 ആയിരുന്നു.
