കണ്ണൂര്: ആര്എസ്എസ് രാമന്തളി മണ്ഡലം കാര്യവാഹായിരുന്ന സി.ബിജുവിനെ അക്രമിച്ച് കൊലപ്പെടുത്തിയ സംഭവം സിപിഎം ജില്ലാ-ഏരിയ നേതൃത്വങ്ങള് ചേര്ന്ന് ആസൂത്രണം ചെയ്തതെന്ന് വ്യക്തമാവുന്നു.
കൃത്യം നടത്തിയത് ദിവസങ്ങള് നീണ്ടുനിന്ന ഉന്നതതല ഗൂഢാലോചനയ്ക്ക് ശേഷമാണെന്ന് പോലീസിന് വിവരം ലഭിച്ചതായാണ് സൂചന. ബിജുവിനെ അപായപ്പെടുത്താന് ഉപയോഗിച്ച ഇന്നോവ കാറും കാറുടമയുള്പ്പെടെ മൂന്നുപേരും പോലീസ് കസ്റ്റഡിയിലായതോടെ കൊലപാതകം സംബന്ധിച്ച് നിര്ണ്ണായക തെളിവുകളാണ് പോലീസിന് ലഭിച്ചിരിക്കുന്നത്.
വാഹനം വാടകയ്ക്കെടുക്കാന് തീരുമാനിച്ചതു മുതല് ദിവസങ്ങളായി ബിജുവിനെ അക്രമി സംഘം പിന്തുടര്ന്നതും പ്രതികള്ക്കാവശ്യമായ എല്ലാ സൗകര്യങ്ങളും ദിവസങ്ങളായി ചെയ്തു കൊടുക്കുന്ന നേതാക്കളെ കുറിച്ചും പോലീസിന് വ്യക്തമായ വിവരം ലഭിച്ചതായറിയുന്നു. കേസില് നിന്ന് ഗൂഢാലോചന നടത്തിയ നേതാക്കളെ ഒഴിവാക്കാന് ഭരണതലത്തില് കണ്ണൂര് ജില്ലാ നേതൃത്വം ശക്തമായ നീക്കങ്ങള് ആരംഭിച്ചതായും സൂചനയുണ്ട്. പാര്ട്ടി പ്രവര്ത്തകരാണ് പ്രതികളെന്ന് വ്യക്തമായതോടെ പൊതു സമൂഹത്തില് ഒറ്റപ്പെട്ട പാര്ട്ടിയുടെ പയ്യന്നൂര് നേതൃത്വം ഇന്നലെ വീണ്ടും ജാള്യത മറയ്ക്കാന് പാര്ട്ടിക്ക് കൊലപാതകത്തില് പങ്കില്ലെന്നും പാര്ട്ടി പ്രവര്ത്തകര്ക്ക് പങ്കുളളതായി ബോധ്യപ്പെട്ടാല് നടപടിയെടുക്കുമെന്നുമുളള പ്രസ്താവനയുമായി രംഗത്തെത്തിയിട്ടുണ്ട്. കഴിഞ്ഞകാലങ്ങളിലെല്ലാം കൊലപാതകങ്ങള് നടത്തി പങ്കില്ലെന്ന് പറഞ്ഞ് ഒടുവില് പാര്ട്ടിക്കാര്ത്തന്നെ പിടിയിലാവുകയായിരുന്നു. ഇതു തന്നെയാണ് പയ്യന്നൂരിലെ ബിജുവിന്റെ കൊലപാതകത്തിലും വരും ദിവസങ്ങളില് സംഭവിക്കാന് പോകുന്നതെന്ന് വ്യക്തമാവുകയാണ്.
പയ്യന്നൂര് മേഖലയില് പൊതു സമൂഹത്തില് സര്വ്വസ്വീകാര്യരായ സംഘപ്രവര്ത്തകരെ ഒന്നൊന്നായി ഇല്ലായ്മ ചെയ്യുകയെന്ന സിപിഎമ്മിന്റെ ആസൂത്രിത അജണ്ടയുടെ ഭാഗമാണ് ബിജുവിന് നേരെ നടന്ന അക്രമം. മേഖലയിലെ സംഘപ്രസ്ഥാനങ്ങളുടെ നെടുംതൂണുകളായ പ്രവര്ത്തകരെയാണ് കഴിഞ്ഞ ഏതാനും വര്ഷങ്ങള്ക്കിടയില് പയ്യന്നൂര് മേഖലയില് സിപിഎം സംഘം വെട്ടിക്കൊന്നത്. ആര്എസ്എസ് പയ്യന്നൂര് മണ്ഡലം കാര്യവാഹ് വിനോദ് കുമാര്, ബിഎംഎസ് മേഖലാ പ്രസിഡണ്ടായിരുന്ന രാമചന്ദ്രന്, ഇപ്പോള് കൊല്ലപ്പെട്ട ബിജു ഇവരെല്ലാം സംഘപരിവാര് സംഘടനകളുടെ കരുത്തരും സൗമ്യരുമായ കാര്യകര്ത്താക്കളായിരുന്നു. ഇത്തരത്തിലുളള കാര്യകര്ത്താക്കളെ ഇല്ലാതാക്കി മേഖലയിലെ സംഘപ്രവര്ത്തനം പൂര്ണ്ണമായും ഇല്ലാതാക്കി പുതുതായി കടന്നുവരുന്നവരെ ഭീഷണിപ്പെടുത്തി പിന്തിരിപ്പിക്കാനുമുളള ആസൂത്രിത ഗൂഢാലോചനയാണ് സിപിഎമ്മിനുളളത്.
