ആലപ്പുഴ: കൊട്ടിഘോഷിച്ച് ആലപ്പുഴ ശുദ്ധജല പദ്ധതി ഉദ്ഘാടനം ചെയ്തിട്ടും കുടിവെള്ളത്തിനായി നഗരവാസികള് നെട്ടോട്ടമോടുന്നു. തുമ്പോളി, നെഹ്റുട്രോഫി, വാടക്കനാല് തുടങ്ങിയ പല വാര്ഡുകളിലും വെള്ളം കിട്ടുന്നില്ലെന്ന പരാതിയുണ്ട്. രാവിലെയോ വൈകിട്ടോ നൂലുപോലെ വരുന്ന വെള്ളത്തിനു വേണ്ടി പാത്രങ്ങളുമായി വീട്ടമ്മമാര് നിരയായി നില്ക്കുകയാണ്. മാസങ്ങളായി ശുദ്ധജല ക്ഷാമം രൂക്ഷമായ ഇവിടെ ശുദ്ധജല പദ്ധതി ഉദ്ഘാടനം ചെയ്താല് പരിഹാരം ഉണ്ടാകുമെന്ന പ്രതീക്ഷയിലായിരുന്നു ജനങ്ങള്. ഈ പ്രദേശങ്ങളിലെ കൗണ്സിലര്മാര് പരാതികളുമായി ജല അതോറിറ്റിയെ സമീപിച്ചെങ്കിലും പരിഹാരമായില്ല. കൂടാതെ നഗരത്തില് പലയിടങ്ങളിലും കുടിവെള്ള പൈപ്പുകള് പൊട്ടുന്നുമുണ്ട്.
പുതിയ ശുദ്ധജല പദ്ധതിയില് ജലപ്രവാഹം ശക്തമായതിനാല് സമ്മര്ദ്ദംമൂലമാണ് ദ്രവിച്ച പൈപ്പുകള് പൊട്ടുന്നത്. യഥാസമയം പരിഹാരം കണ്ടില്ലെങ്കില് പൊട്ടിയ പൈപ്പിലൂടെ മലിനജലം വിതരണ ശൃംഖലയില് വ്യാപിക്കുകയും ജലജന്യ രോഗങ്ങള്ക്കു കാരണമാകുകയും ചെയ്യും.
