എടക്കാട്: എടക്കാട് ഒ.കെ യുപി സ്ക്കൂള് പരിസരം സാമൂഹ്യ ദ്രോഹികളുടെ താവളമാകുന്നു. ഏതാനും വര്ഷങ്ങള്ക്ക് മുമ്പ് പ്രദേശം സിപിഎം അക്രമികളുടെ താവളമായിരുന്നു. ജില്ലയിലെ പല അക്രമക്കേസുകളിലും പ്രദേശത്തുകാരായ സിപിഎം പ്രവര്ത്തകര് പ്രതികളായ സംഭവം ഉണ്ടായിരുന്നു. കൂടാളിയിലെ കോണ്ഗ്രസ് പ്രവര്ത്തകന്റെ കൊലപാതകത്തില് ഉള്പ്പെടെ മേഖലയിലെ സിപിഎം പ്രവര്ത്തകര് പ്രതികളായിരുന്നു. എന്നാല് പിന്നീട് സിപിഎമ്മിനകത്ത് വിഭാഗീയത രൂപം കൊളളുകയും പല സിപിഎം പ്രവര്ത്തകരും പാര്ട്ടിവിട്ട് വിവിധ സംഘടനകളിലേക്ക് ചേക്കേറിയതോടെ ഇടക്കാലത്ത് മേഖല ശാന്തമായിരുന്നു.എന്നാല് കഴിഞ്ഞ ഏതാനും നാളുകളായി വീണ്ടും പ്രദേശത്ത് സിപിഎമ്മുകാരായ ചില സാമൂഹികദ്രോഹികള് പ്രദേശത്ത് സമാധാനത്തിന് ഭംഗമുണ്ടാക്കുന്ന തരത്തില് അഴിഞ്ഞാടുകയാണ്.
ഏതാനും ആഴ്ചകള്ക്ക് മുമ്പ് പ്രദേശത്തെ ബിജെപി പ്രവര്ത്തകനായ രൂപേഷിനെയും കുടുംബത്തേയും മേഖലയിലെ സിപിഎമ്മുകാര് വീട് കയറി അക്രമിച്ചിരുന്നു. മദ്യപിച്ച് ബോധമില്ലാതെ വാളുകൊണ്ട് സിപിഎം പ്രവര്ത്തകര് പരസ്പരം ആളുമാറി വെട്ടിയ സംഭവവും പ്രദേശത്തുണ്ടായിരുന്നു. രൂപേഷിന്റെ കുടുംബത്തെ അക്രമിച്ച സിപിഎം പ്രാദേശിക നേതാവിന്റെ നേതൃത്വത്തിലാണ് പ്രദേശത്ത് വീണ്ടും സിപിഎമ്മുകാരായ സാമൂഹ്യദ്രോഹികള് അക്രമത്തിന് കോപ്പുകൂട്ടുന്നതെന്ന് നാട്ടുകാര് പറയുന്നു. ക്ഷേത്രോത്സവത്തിന്റെ ഭാഗമായി നടന്ന കലശ ഘോഷയാത്രയ്ക്ക് നേരെ അക്രമം നടത്തിയ സംഭവവുമുണ്ടായിരുന്നു. പ്രദേശത്ത് തങ്ങള്ക്കുളള സ്വാധീനം ഉപയോഗിച്ച് മറ്റ് സംഘടനാ പ്രവര്ത്തകരെ ഉന്മൂലനം ചെയ്യാനുളള നീക്കമാണ് സിപിഎം നേതൃത്വത്തിന്റെ ഒത്താശയുടെ ഒരു വിഭാഗം സിപിഎമ്മുകാര് നടത്തുന്നത്. ഇവരുടെ അതിക്രമങ്ങള്ക്കെതിരെ നടപടിയെടുക്കേണ്ട പോലീസ് ഇവരുടെ അജ്ഞാനുവര്ത്തികളായി പ്രവര്ത്തിക്കുകയാണെന്നും നാട്ടുകാര് പറയുന്നു.
