ന്യൂദല്ഹി: സുനന്ദ പുഷ്കറിന്റെ മരണവുമായി ബന്ധപ്പെട്ട് ഒരു ദേശീയ മാധ്യമം പുറത്തുവിട്ട ആരോപണങ്ങള് തള്ളി മുന് കേന്ദ്രമന്ത്രിയും മുതിര്ന്ന കോണ്ഗ്രസ് നേതാവുമായ ശശി തരൂര് രംഗത്ത്.തെറ്റായ കാര്യങ്ങളാണ് വാര്ത്തയിലുള്ളതെന്നും കോടതിയില് അവ തെളിയിക്കാന് വെല്ലുവിളിക്കുന്നുവെന്നും തരൂര് ട്വിറ്റ് ചെയ്തു.
ധാര്മികതയില്ലാത്ത, മാധ്യമപ്രവര്ത്തകന് എന്ന് അവകാശപ്പെടുന്നയാളാണ് തെറ്റായ ആരോപണങ്ങള് അദ്ദേഹത്തിന്റെ ചാനലിലൂടെ സംപ്രേക്ഷണം ചെയ്തിരിക്കുന്നത്. മാധ്യമത്തിന്റെ പ്രചാരത്തിനുമായി ഒരു ദുരന്തം ഉപയോഗിക്കുന്നതില് പ്രതിഷേധമുണ്ടെന്നും തരൂര് പറഞ്ഞു.
ചാനല് പുറത്തുവിട്ട ഫോണ് സംഭാഷണങ്ങളില് തരൂരിന്റെ വിശ്വസ്തന് ഫോണിലൂടെ പറയുന്നത് മരിക്കുന്നതിന് ഏതാനും മണിക്കൂറുകള്ക്ക് മുമ്പ് വരെ സുനന്ദ 307-ാം നമ്പര് മുറിയിലായിരുന്നുവെന്നാണ്. സുനന്ദ പുഷ്കറുമായും ശശി തരൂരിന്റെ അസിസ്റ്റന്റ് ആര് കെ ശര്മ്മയുമായും വിശ്വസ്തന് നാരായണനുമായും നടത്തി സംഭാഷണങ്ങളും ചാനല് പുറത്തുവിട്ടു.
തരൂരിന്റെ ഭാര്യ സുനന്ദ പുഷ്ക്കറിന്റെ ദുരൂഹ മരണത്തില് തരൂരിനെതിരെ നടുക്കുന്ന വെളിപ്പെടുത്തലുകള് ഇന്നലെ റിപ്പബ്ലിക് ടിവി പുറത്തുവിട്ടത്. സുനന്ദയുടെ മൃതദേഹം ലീല ഹോട്ടലില് അവര് താമസിച്ചിരുന്ന മുറിയില് നിന്ന് മറ്റൊരു മുറിയിലേക്ക് മാറ്റിയെന്നതടക്കമുള്ള വിവരങ്ങളാണ് ചാനല് പുറത്തുവിട്ടത്.
തെക്കന് ദല്ഹിയിലെ ലീല ഹോട്ടലിലെ 307-ാം നമ്പര് മുറിയില് താമസിച്ച സുനന്ദയുടെ മൃതദേഹം 345-ാം നമ്പര് മുറിയിലേക്ക് മാറ്റിയിരുന്നുവെന്നാണ് ആരോപണം. ഇതു തെളിയിക്കുന്ന വീഡിയോ ദൃശ്യങ്ങള് കൈയിലുണ്ടെന്ന് ചാനല് അവകാശപ്പെട്ടിരുന്നു. പുലര്ച്ചെ ഹോട്ടലില് നിന്ന് പോയ ശശി തരൂര് കുറച്ചു നേരത്തിനു ശേഷം മടങ്ങിയെത്തിയെന്ന് സഹായിയുടെ ഫോണ് സംഭാഷണം പുറത്തുവിട്ട് ചാനല് അവകാശപ്പെടുന്നു. ഇത് സാധൂകരിക്കുന്ന നിരവധി ശബ്ദരേഖകളും പുറത്തുവിട്ടു.
അല്പ്രാക്സ് ഗുളികകളുടെ അമിത ഉപയോഗം, കരിക്കിന് വെള്ളം കുടിച്ചത് തുടങ്ങിയ നിരവധി കാരണങ്ങള് സുനന്ദയുടെ മരണകാരണമായി ശശി തരൂര് ചൂണ്ടിക്കാണിച്ചെങ്കിലും അവയെല്ലാം പോലീസ് അന്വേഷണത്തില് ശരിയല്ലെന്ന് തെളിഞ്ഞു. മാധ്യമങ്ങളോട് സംസാരിക്കാനുള്ള സുനന്ദയുടെ ശ്രമങ്ങള് തരൂര് തടഞ്ഞതായും ചാനലിന്റെ വാര്ത്തയില് ആരോപിക്കുന്നു.
2014 ജാനുവരി 17നാണ് സുനന്ദയെ കൊല്ലപ്പെട്ട നിലയില് ദല്ഹിയിലെ ഹോട്ടല് മുറിയില് കണ്ടെത്തിയത്. തരൂരിന് പാക് പത്രപ്രവര്ത്തക മെഹര് തരാറുമായുള്ള ബന്ധത്തെച്ചൊല്ലി ഇവര് തമ്മില് രൂക്ഷമായ വഴക്കുണ്ടായ രാത്രിയിലാണ് സംഭവം. വിഷം ഉള്ളില് ചെന്നാണ് സുനന്ദയുടെ മരണമെന്ന് വെളിവായെങ്കിലും അന്വേഷണം പിന്നെ മുന്നോട്ട് പോയില്ല. തരൂരിനെതിരെ പ്രകടമായ തെളിവുകള് ലഭിക്കാത്തതാണ് അന്വേഷണം വഴിമുട്ടിച്ചത്.
