മട്ടന്നൂര്: ഡങ്കിപ്പനി ബാധയെത്തുടര്ന്ന് മട്ടന്നൂരില് നഗരസഭയുടെ ആഭിമുഖ്യത്തില് നടത്തിയ ശുചീകരണ പ്രവര്ത്തനങ്ങളില് വ്യാപാരികള് സജീവമാകാത്തത് പ്രതിഷേധത്തിന് കാരണമാകുന്നു. നഗരത്തില് ഡങ്കിപ്പനി നിയന്ത്രണ വിധേയമാവുകയും ഗ്രാമീണ മേഖലയില് ഡങ്കിപ്പനി ബാധിതര് വര്ദ്ധിക്കുകയും ചെയ്തതോടെ നഗരത്തിലും പരിസര പ്രദേശങ്ങളിലും ആരോഗ്യ വകുപ്പിന്റെ സജീവ ഇടപെടല് തുടരുകയാണ്. കഴിഞ്ഞദിവസവും ഗ്രാമീണ മേഖലകളില് നിന്ന് 8 പേര്ക്ക് ഡങ്കിപ്പനി സ്ഥിരീകരിച്ചിട്ടുണ്ട്. കണ്ണൂര് റോഡിലെ ചില സ്ഥാപനങ്ങളുടെ പിന്ഭാഗങ്ങളില് മാലിന്യങ്ങള് കൂട്ടിയിട്ടതു കണ്ടെത്തിയതിനെ തുടര്ന്ന് എതാനും സ്ഥാപനങ്ങള്ക്ക് നഗരസഭ ആരോഗ്യ വിഭാഗം നോട്ടീസ് നല്കിയിട്ടുണ്ട്.
നിര്മ്മാണം നടക്കുന്ന വ്യാപാര സമുച്ചയങ്ങളിലും നിരവധി സ്ഥാപനങ്ങളിലും ആരോഗ്യ വകുപ്പ് പരിശോധ നടത്തി. ഇതിനിടെ കഴിഞ്ഞ ദിവസം നടത്തിയ പൊതു ശുചീകരണത്തില് ഭൂരിഭാഗം വ്യാപാരികളും ചില റസ്റ്റോറന്റുകളും പങ്കെടുക്കാതിരുന്നത് ജനങ്ങള്ക്കിടയില് വ്യാപക പ്രതിഷേധത്തിനിടയാക്കി. ഇത്തരം റസ്റ്റോറന്റുകളും മറ്റും ചിലര് ബഹിഷ്ക്കരിക്കുകയാണ്. ഇതേസമയം കഴിഞ്ഞ ദിവസം പൊതുശുചീകരണത്തില് ശുചീകരണ പ്രവര്ത്തകരും മറ്റും കുടിവെള്ളം കിട്ടാതെ വലഞ്ഞതു സംബന്ധിച്ച് കേരള ഹോട്ടല് ആന്റ് റസ്റ്റോറന്റ് അസോസിയേഷന് മട്ടന്നൂര് യൂണിറ്റ് രംഗത്തെത്തി.
ശുചീകരണ പ്രക്രിയയുടെ ഭാഗമായി ഉച്ചവരെ നടത്തുന്ന ഹര്ത്താല് പ്രായോഗികമല്ലെന്നും ഇത് നാട്ടുകാരേയും ദീര്ഘദൂര യാത്രികരേയും വിഷമിപ്പിക്കുമെന്നും നഗരസഭ വിളിച്ചു ചേര്ത്ത ആലോചനായോഗത്തില് അറിയിച്ചിരുന്നുവെന്ന് സംഘടന വ്യക്തമാക്കി. ഉച്ചയ്ക്ക് ശേഷവും ഹോട്ടലുകള് തുറക്കുവാന് സാധിച്ചില്ല. ശുചീകരണത്തിന് തങ്ങള് എതിരല്ലെന്നും ശുചീകരണത്തിന്റെ പേരില് പൊതുജനങ്ങളേയും ഹോട്ടല് നടത്തിപ്പുകാരേയും തൊഴിലാളികളേയും ഒരു പോലെ ബാധിക്കുന്ന തുടര് ഹര്ത്താലുകളേക്കുറിച്ച് പുനരാലോച്ചിക്കേണ്ടി വരുമെന്നും കേരള ഹോട്ടല് ആന്റ് റസ്റ്റോറന്റ് അസോസിയേഷന് മട്ടന്നൂര് യൂണിറ്റ് പ്രസിഡണ്ട് എ. പ്രദീപ് കുമാര് വ്യക്തമാക്കി.
