നെടുങ്കണ്ടം: കമ്പംമെട്ടിലെ വിവാദ സ്ഥലം തമിഴ്നാടിന്റേതെന്ന് പറയാതെ പറഞ്ഞ് കേരളം. അതിര്ത്തിയില് കേരളാ അധീന പ്രദേശത്ത് എക്സൈസ് വകുപ്പ് സ്ഥാപിച്ച കണ്ടെയ്നര് മൊഡ്യൂള് തല്സ്ഥാനത്തു നിന്ന് മാറ്റാനാണ് കളക്ടറുടെ നിര്ദേശം. ബോഡിമെട്ടിലേയ്ക്ക് മാറ്റി സ്ഥാപിക്കാനാണ് നീക്കം നടക്കുന്നത്.
കണ്ടെയ്നര് തല്സ്ഥാനത്ത് നിന്നും മാറ്റി സ്ഥാപിക്കുന്നതില് നാട്ടുകാര്ക്കും സര്വ്വകക്ഷി പാര്ട്ടികള്ക്കും എതിര്പ്പ്. കണ്ടെയ്നര് മാറ്റുന്നത് തമിഴ്നാടിന്റെ വാദങ്ങള്ക്ക് ബലം കൂട്ടും. കമ്പംമെട്ടില് സ്ഥാപിച്ചിരിക്കുന്ന കണ്ടെനര് ബോഡിമെട്ടിലെ എക്സൈസ് ചെക്ക്പോസ്റ്റിലേയ്ക്ക് മാറ്റുന്നതിനുള്ള നടപടികളാണ് നടന്നുവരുന്നത്. കമ്പംമെട്ട് സെയില്ടാക്സ് ഓഫീസിന് സമീപത്തേയ്ക്ക് മാറ്റുന്നതിനാണ് ആദ്യം തീരുമാനിച്ചത്. എന്നാല് നാട്ടുകാരുടെയും സര്വ്വകക്ഷികളുടേയും എതിര്പ്പിനെ തുടര്ന്ന് തീരുമാനം മാറ്റുകയായിരുന്നു. തമിഴ്നാട് എതിര്പ്പ് പറയാത്ത കേരളാതിര്ത്തിയില് സെയില്ടാക്സ് ഓഫീസിനോട് ചേര്ന്നുള്ള റോഡിന് സമീപമാണ് സ്ഥാപിക്കാന് ആദ്യം തീരുമാനിച്ചത്. ഇതിനെ നാട്ടുകാര് എതിര്ത്തിരുന്നു. ഇതോടെ ബോഡിമെട്ടിലേയ്ക്ക് കണ്ടൈനര് സ്ഥാപിക്കും. കണ്ടൈനര് സ്ഥാപിക്കുന്നതിനുള്ള സ്ഥലത്ത് നിര്മ്മാണപ്രവര്ത്തനങ്ങള് പൂര്ത്തികരിക്കുന്നതിനനുസരിച്ച് മാറ്റിസ്ഥാപിക്കാനാണ് പുതിയ നിര്ദ്ദേശം. കഴിഞ്ഞ ദിവസം കമ്പംമെട്ടില് ഇടുക്കി ജില്ലാ കലക്ടറുടെ നേത്യത്വത്തില് അതിര്ത്തി വന്ന് കണ്ട് പോയതിന് ശേഷമാണ് മാറ്റി സ്ഥാപിക്കുന്നതിനുള്ള തീരുമാനം എടുത്തത്. സംസ്ഥാനം തമിഴ്നാടിന്റെ വാദങ്ങള് അംഗീകരിച്ചതോടെ അതിര്ത്തിയില് രോക്ഷം പുകയുകയാണ്.
