കോട്ടയം: മാനസിക വളര്ച്ചാ വൈകല്യം ബാധിച്ചവര്ക്ക് സര്ക്കാര് ജോലിയില് സംവരണം ഏര്പ്പെടുത്തികൊണ്ട് പ്രാബല്യത്തില് വന്ന നിയമം അടിയന്തിരമായി നടപ്പാക്കണമെന്ന് കേരള സര്ക്കാരിന് നിര്ദ്ദേശം നല്കുമെന്ന് ന്യൂനപക്ഷ കമ്മീഷന് ചെയര്മാന് പി. കെ. ഹനീഫ പറഞ്ഞു.
കോട്ടയത്ത് നടന്ന സിറ്റിങില് ചങ്ങനാശ്ശേരി ചെത്തിപ്പുഴ സ്വദേശി ജോഷി സി. ജേക്കബ് 23 വയസ്സുളള മകന് ജോയ്സിക്കു വേണ്ടി സമര്പ്പിച്ച അപേക്ഷയിലാണ് കമ്മീഷന്റെ നടപടി.
പോളിടെക്നിക് പഠനം പൂര്ത്തിയാക്കിയ ജോയ്സിക്ക് ഗള്ഫില് വച്ചുണ്ടായ അപകടത്തെ തുടര്ന്നാണ് മാനസിക വൈകല്യം ഉണ്ടായത്. പിഎസ്സി നടത്തുന്ന പരീക്ഷ മത്സര ബുദ്ധിയോടെ എഴുതി ലിസ്റ്റില് ഉള്പ്പെടാന് ജോയ്സിക്ക് സാധിക്കുന്നില്ല. ഈ സാഹചര്യത്തിലാണ് മാനസിക വളര്ച്ചാ വൈകല്യം ബാധിച്ചവര്ക്ക് ജോലിയില് ഒരു ശതമാനം സംവരണം സംസ്ഥാന സര്ക്കാര് ഏര്പ്പെടുത്തണമെന്ന നിയമം അടിയന്തിരമായി നടപ്പാക്കണമെന്ന അപേക്ഷകന്റെ ആവശ്യം സര്ക്കാരിന്റെ ശ്രദ്ധയില്പ്പെടുത്തുന്നത്.
അന്യായമായി പുരയിടം കൈയ്യേറി വഴി വെട്ടിയെന്ന് ആരോപിച്ച് പൂവത്തോട് സ്വദേശി സെബാസ്റ്റ്യന് നല്കിയ പരാതിയില് ആവശ്യമായ നടപടികള് സ്വീകരി ക്കാന് ജില്ലാ പോലീസ് മേധാവിക്ക് കമ്മീഷന് നിര്ദ്ദേശം നല്കി. ഫെലോഷിപ്പ് ഗ്രാന്റ് കിട്ടുന്നില്ലെന്ന് ആരോപിച്ച് ചങ്ങനാശ്ശേരി അസംപ്ഷന് കോളേജില് എം.ഫില് പഠനം നടത്തുന്ന ഒ.ഇസി വിഭാഗത്തില്പ്പെട്ട അലക്സ് ജെയിംസ് നല്കിയ പരാതിയില് സര്ക്കാര് യൂണിവേഴ്സിറ്റിയില് നിശ്ചയിച്ചിട്ടുളള നിരക്കില് ആനുകൂല്യം തുടര്ന്നും അനുവദിക്കണമെന്ന് പട്ടികജാതി വികസന ഡയറക്ടര്ക്ക് കമ്മീഷന് നിര്ദ്ദേശം നല്കി.
പഠനത്തിനായി വിദ്യാഭ്യാസ വായ്പ എടുത്ത നേഴ്സിംഗ് വിദ്യാര്ത്ഥിനിക്ക് സര്ക്കാരിന്റെ പുതിയ വിദ്യാഭ്യാസ വായ്പ നയത്തിന്റെ പ്രയോജനവും കമ്മീഷന് ലഭ്യമാക്കി. ചേരമര് ക്രിസ്റ്റ്യന് വിഭാഗത്തില്പ്പെട്ട വിദ്യാര്ത്ഥിനിക്ക് പുതിയ വിദ്യാഭ്യാസ വായ്പ നയപ്രകാരമുളള ഇളവ് നല്കണമെന്ന് ബാങ്കിന് നിര്ദ്ദേശം നല്കി. കമ്മീഷന് അംഗം ബിന്ദു തോമസും സിറ്റിംഗില് പങ്കെടുത്തു.
