കണ്ണൂര്‍: ജില്ലയിലെ പകര്‍ച്ചവ്യാധി നിയന്ത്രണത്തിന്റെ ഭാഗമായി മഴക്കാല പൂര്‍വ്വ ശുചീകരണ പ്രവര്‍ത്തനങ്ങള്‍ ഊര്‍ജ്ജിതപ്പെടുത്താന്‍ ഇതുമായി ബന്ധപ്പെട്ട് കലക്‌റേറ്റില്‍ ചേര്‍ന്ന യോഗം തീരുമാനിച്ചു. ഡങ്കിപ്പനി ഉള്‍പ്പെടെയുള്ള പകര്‍ച്ച വ്യാധികള്‍ തടയുന്നതിന് ശക്തമായ നടപടികള്‍ കൈക്കൊള്ളാന്‍ തദ്ദേശ സ്ഥാപനങ്ങളുടെ നേതൃത്വത്തില്‍ വിവിധ വകുപ്പുകളുമായി ചേര്‍ന്ന് വാര്‍ഡ് തലത്തില്‍ പ്രതിരോധ-ശുചീകരണ പ്രവര്‍ത്തനങ്ങള്‍ നടത്തണമെന്ന് ജില്ലാ പഞ്ചായത്ത് പ്രസിഡന്റ് കെ.വി സുമേഷ് പറഞ്ഞു.
കൃത്യമായ വിവരങ്ങളുടെ അഭാവത്തില്‍ ഇതിന്നായി തദ്ദേശ സ്ഥാപനങ്ങള്‍ക്ക് സര്‍ക്കാര്‍ നല്‍കുന്ന തുക ശരിയായ രീതിയില്‍ വിനിയോഗിക്കപ്പെടാത്ത സംഭവങ്ങളുണ്ടായിട്ടുണ്ട്. പലയിടങ്ങളിലും മഴക്കാലപൂര്‍വ ശുചീകരണം ചടങ്ങായി മാറുകയാണ് പതിവ്. ഓരോ വാര്‍ഡിലും ഇവ നടപ്പായോ എന്ന് പരിശോധിക്കുന്നതിന് സംവിധാനമൊരുക്കണമെന്നും അദ്ദേഹം പറഞ്ഞു. ഇത്തരം പ്രശ്‌നങ്ങള്‍ രൂക്ഷമായ പ്രദേശങ്ങള്‍ കണ്ടെത്തി ജനപ്രതിനിധികളുടെ നേതൃത്വത്തില്‍ പ്രത്യേക ശുചീകരണ കാംപയിനുകള്‍ സംഘടിപ്പിക്കാനും യോഗത്തില്‍ തീരുമാനമായി.
മട്ടന്നൂരില്‍ ഡങ്കിപ്പനി പടരാനുണ്ടായ കാരണം ഇതര സംസ്ഥാനത്തൊഴിലാളികളുടെ ക്യാംപിലെ വൃത്തിഹീനമായ സാഹചര്യങ്ങളാണെന്ന് കണ്ടെത്തിയ പശ്ചാത്തലത്തില്‍ ശക്തമായ നടപടികള്‍ സ്വീകരിക്കാന്‍ എഡിഎം ഇ.മുഹമ്മദ് യൂസുഫിന്റെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. ഇതിന്റെ ഭാഗമായി ആരോഗ്യ വകുപ്പിന്റെ നേതൃത്വത്തില്‍ മറ്റ് വകുപ്പുകളുമായി സഹകരിച്ച് ഇവരുടെ താമസ സ്ഥലങ്ങളില്‍ സംയുക്ത പരിശോധന നടത്തും. ഇത്തരം കേസുകളില്‍ ശക്തമായ നടപടികള്‍ സ്വീകരിക്കാനും യോഗത്തില്‍ തീരുമാനമായി.
ജലദൗര്‍ലഭ്യം രൂക്ഷമായ പശ്ചാത്തലത്തില്‍ ഹോട്ടലുകളിലും മറ്റും പരിശോധന കര്‍ശനമാക്കും. ഐസ് ഫാക്ടറികളില്‍ ഉപയോഗിക്കുന്ന വെള്ളവും പരിശോധനയ്‌ക്ക് വിധേയമാക്കും. കുടിവെള്ള വിതരണം നടത്തുന്ന ടാങ്കര്‍ ലോറികള്‍ ആഴ്ചയിലൊരിക്കലെങ്കിലും അണുവിമുക്തമാക്കാന്‍ ബന്ധപ്പെട്ടവര്‍ ശ്രദ്ധിക്കണമെന്നും യോഗം നിര്‍ദേശിച്ചു.
യോഗത്തില്‍ ഡോ.പി.എം.ജ്യോതി, ഡോ.ആര്‍.ശ്രീനാഥ്, ഡോ.പി.വി.ശ്രീദേവി, ഡോ.കെ രാമസുബ്രഹ്മണ്യം, വിവിധ വകുപ്പ് മേധാവികള്‍, മെഡിക്കല്‍ കോളേജ് കമ്മ്യൂണിറ്റി വിഭാഗം ഡോക്ടര്‍മാര്‍, ശുചിത്വമിഷന്‍, ഐ.എം.എ പ്രതിനിധികള്‍, ജില്ലാതല പ്രോഗ്രാം ഓഫീസര്‍മാര്‍ തുടങ്ങിയവര്‍ പങ്കെടുത്തു.
