മലപ്പുറം: ഫുട്ബോള് പോലെ തന്നെ മലപ്പുറത്തിന് ആവേശമാണ് തെരഞ്ഞെടുപ്പ്. കാരണം ഈ സമയങ്ങളില് ഒഴുകുന്നത് കോടികളായിരിക്കും. ഫുട്ബോളിന്റെ സമയത്ത് വാതുവെപ്പിന്റെ പേരിലാണെങ്കില് തെരഞ്ഞെടുപ്പില് പ്രചാരണ രംഗത്താണ്. സംസ്ഥാനത്ത് പ്രവാസികള് ഏറ്റവും കൂടുതല് ഉള്ള ജില്ല മലപ്പുറമാണ്. അതുകൊണ്ട് തന്നെ പ്രചാരണത്തിന് ഇവിടെ പണം ഒരു പ്രശ്നമല്ല. തദ്ദേശ തെരഞ്ഞെടുപ്പായതിനാല് വാശിയോടെയാണ് പാര്ട്ടികളും വ്യക്തികളും പണമെറിയുന്നത്.
പണമൊഴുക്കി പ്രചാരണം നടത്തുന്നതില് മുന്പന്തിയില് ലീഗുകാര് തന്നെയാണ്. പ്രബലരായ മിക്ക ലീഗ് സ്ഥാനാര്ത്ഥികളെയും ഒരു പ്രവാസി അല്ലെങ്കില് പ്രവാസി സംഘടന സ്പോണ്സര് ചെയ്തിരിക്കുകയാണ്. പ്രചാരണത്തിന്റെ ആദ്യപടിയായി വര്ണ്ണാഭമായ പോസ്റ്ററുകള് വാര്ഡുകളില് നിറച്ചു കഴിഞ്ഞു. എതിര് പാര്ട്ടികളെ പോലും അമ്പരിപ്പിക്കുന്ന പോസ്റ്ററുകള്. പിന്നീട് സ്ഥാനാര്ത്ഥിയെ പുകഴ്ത്തി ചലച്ചിത്രഗാനങ്ങളുടെ പാരഡി ഉണ്ടാക്കുന്നു, വിലകൂടിയ ആഡംബര വാഹനങ്ങളുടെ പെയിന്റ് മാറ്റി പാര്ട്ടിയുടെ നിറം പൂശുന്നു, വില കൂടിയ പെയ്ന്റ് ഉപയോഗിച്ച് റോഡിലെല്ലാം സ്ഥാനാര്ത്ഥിയുടെ പേരുകള് നിറക്കുന്നു, അങ്ങനെ പലവിധത്തിലാണ് പണം പൊടിക്കല്.
പ്രവാസികളെ സംരക്ഷിക്കുന്നത് മുസ്ലിം ലീഗാണെന്നാണ് നേതാക്കളുടെ അവകാശവാദം. പക്ഷേ അത് അംഗീകരിക്കാനാവില്ലെന്നാണ് പ്രവാസികളില് ചിലര് പറയുന്നത്. പ്രവാസികള്ക്ക് വേണ്ടി ലീഗുകാര് ഇതുവരെ ഒന്നും ചെയ്തിട്ടില്ല. വിദേശ രാജ്യങ്ങളില് കള്ളക്കേസില് കുടുങ്ങുന്നവരെ സഹായിക്കാനോ നിതാഖത്തില്പ്പെട്ട് തിരികെ നാട്ടിലെത്തിയവരെ സഹായിക്കാനോ ലീഗ് ശ്രമിച്ചിട്ടില്ല. എന്നിട്ടും എന്തിനാണ് ലീഗുകാരെ സഹായിക്കുന്നതെന്ന ചോദ്യത്തിന് തുടര്ന്നും ജീവിക്കേണ്ടത് മലപ്പുറത്തല്ലേയെന്നാണ് ഉത്തരം. സാമ്പത്തികമായി ഉയര്ന്ന് നില്ക്കുന്ന പ്രവാസികളുടെ പക്കല്നിന്നും ലീഗ് നേതാക്കള് നിര്ബന്ധിത പണപ്പിരിവ് നടത്തുന്നതായും ആരോപണമുണ്ട്. എന്നാല് പരപ്പനങ്ങാടിയിലും മറ്റും സര്ക്കാര് ഭൂമി കയ്യേറി കെട്ടിടം പണിതവരാണ് ലീഗിന്റെ തെരഞ്ഞെടുപ്പ് ചെലവുകള് വഹിക്കുന്നത്. കയ്യേറ്റ വിഷയം വിവാദമായപ്പോള് ലീഗ് നേതാക്കള് സഹായം നല്കിയതിന്റെ ഉപകാരസ്മരണക്കാണ് ഇവര് പണമെറിയുന്നത്.
തെരഞ്ഞെടുപ്പില് ഏറ്റവും കൂടുതല് പണം ചെലവഴിച്ച് പ്രചാരണം നടത്തുന്ന ജില്ല മലപ്പുറമാണ്. ഓരോ സ്ഥാനാര്ത്ഥിയും പ്രചാരണത്തിന് നിശ്ചിത തുകമാത്രമെ ഉപയോഗിക്കാവൂയെന്ന് തെരഞ്ഞെടുപ്പ് കമ്മീഷന്റെ കര്ശന നിര്ദ്ദേശമുണ്ട്. പക്ഷേ സ്ഥാനാര്ത്ഥികളുടെ ചിലവുകള് വഹിക്കുന്നത് സ്പോണ്സര്മാരായതിനാലും അവരെ നിരീക്ഷിക്കാത്തതിനാലും പ്രശ്നങ്ങള് ഒന്നും ഉണ്ടാകാറില്ല. ലീഗിന്റെ ഈ പിഴിയല് നിലപാടില് പ്രവാസികളില് ഭൂരിഭാഗവും പ്രതിഷേധത്തിലാണ്. എല്ഡിഎഫും പ്രത്യേകിച്ച് സിപിഎമ്മം ആര്ഭാട പ്രചാരണത്തില് പുറകിലല്ല. ശക്തി കേന്ദ്രങ്ങളില് സിപിഎമ്മിനും സ്പോണ്സര്മാരുണ്ട്. വ്യവസായികളും പ്രവാസികളുമാണ് സിപിഎമ്മിന്റെ പ്രധാന സ്പോണ്സര്മാര്.
