തിരുവനന്തപുരം: ഹൈസ്കൂള് വിഭാഗം നാടകമത്സരത്തില് കുട്ടികളെല്ലാം മികച്ച പ്രകടനമായിരുന്നു. 23 നാടകങ്ങള് വേദിയിലെത്തിയതില് മിക്ക നാടകങ്ങളിലും മിടുമിടുക്കന്മാരും മിടുക്കികളുമായ അഭിനേതാക്കളെക്കണ്ടു. അവരില് നിന്നും മികച്ച നടനേയും നടിയേയും കണ്ടെത്താന് വിധികര്ത്താക്കള് അല്പ്പം പാടുപെട്ടു. എന്നാല് ജഡ്ജസിന്റെ തെരഞ്ഞെടുപ്പ് പ്രേക്ഷക സദസ് കൈയടിയോടെ സ്വീകരിച്ചു. അങ്ങനെ കുഞ്ഞിക്കാദറും കപ്യാരും മികച്ച നടനും നടിയുമായി.
നാടകം പോലെ നാടകീയമായിരുന്നു മികച്ച നടിയുടെ ഫലപ്രഖ്യാപനവും. മീശ എന്ന നാടകത്തില് കപ്യാരുടെ വേഷത്തിലെത്തിയ കോഴിക്കോട് നടക്കാവ് ഗേള്സ് എച്എസ്എസിലെ അനുഷ്കയാണു മികച്ച നടി. ഫലപ്രഖ്യാപനത്തില് ആദ്യം ഇതേ നാടകത്തില് കത്രീനയെന്ന കഥാപാത്രത്തെ അവതരിപ്പിച്ച കുട്ടിക്കാണു മികച്ച നടിക്കുള്ള പുരസ്കാരം എന്നാണറിയിച്ചത്. ഇതോടെ കത്രീനയെ രംഗത്തെത്തിച്ചു ജില്ലാതലത്തില് മികച്ച നടിക്കുള്ള പുരസ്കാരം നേടിയ മെഫ്ലിന് എന്ന കൊച്ചുമിടുക്കിയെ കൂട്ടുകാര് അഭിനന്ദനംകൊണ്ടു മൂടി.
എന്നാല് ഉടന് തന്നെ കത്രീനയെന്ന കഥാപാത്രമല്ല കപ്യാരെന്ന കഥാപാത്രമാണു മികച്ച നടിയെന്നു തിരുത്തുവന്നു. അപ്പോള് അനുഷ്കയെ അഭിനന്ദിക്കാന് ആദ്യം ഓടിയെത്തിയത് മെഫ്ലിനായിരുന്നു. അനുഷ്കയാകട്ടെ നിറഞ്ഞ കണ്ണുകളോടെ കൂട്ടുകാരിയെ കെട്ടിപ്പിടിച്ചു. മലയാള സാഹിത്യത്തിലെ സുല്ത്താന് വൈക്കം മുഹമ്മദ് ബഷീറിന്റെ കുഞ്ഞിക്കാദര് എന്ന കഥാപാത്രത്തെ രംഗത്ത് അവതരിപ്പിച്ചു പ്രേക്ഷകരുടെ കൈയടി നേടിയാണ് മലപ്പുറം എടരിക്കോട് പികെഎംഎച്എസ്എസിലെ ഒമ്പതാം ക്ലാസുകാരന് ജംഷീര് മികച്ച നടനായത്.
ബഷീറിന്റെ ചെറുകഥയുടെ സ്വതന്ത്ര നാടകാവിഷ്കാരമായ ‘ബ്ര്ര്’ ആഖ്യാന ശൈലികൊണ്ടും അവതരണ രീതികൊണ്ടും പ്രേക്ഷക ശ്രദ്ധ നേടി. ഹാസ്യത്തിനും സംഗീതത്തിനും പ്രാധാന്യം നല്കിയ നാടകം രാത്രി രണ്ടു മണിക്കാണ് വേദിയില് അവതരിപ്പിച്ചത്. ആ സമയത്തും നിറഞ്ഞ സദസ് എഴുന്നേറ്റു നിന്നു കൈയടിച്ച് നാടകത്തെ സ്വീകരിച്ചു.
