മലമ്പുഴഡാമിലും ജലാശയത്തിന് ചുറ്റുമുള്ള സംരക്ഷിത മേഖലയിലും കന്നുകാലികളെ മേയ്ക്കാനായി അഴിച്ച് വിട്ടാല് കര്ശന നടപടി സ്വീകരിക്കുമെന്ന് ജില്ലാ കലക്ടര് പി.മേരിക്കുട്ടി അറിയിച്ചു.
മലമ്പുഴ ജലസേചന വിഭാഗം നടത്തിയ ഡാമിലെ ജലപരിശോധനയില് കോലിഫോം ബാക്ടീരിയയും മനുഷ്യരുടേയും മൃഗങ്ങളുടേയും വിസര്നജത്തിലുണ്ടാകുന്ന ഇ-കോലി ബാക്റ്റീരിയയും കണ്ടെത്തിയ സാഹചര്യത്തിലാണ് അടിയന്തര പ്രതിരോധ നടപടികള് സ്വീകരിക്കാന് തീരുമാനിച്ചത്.
ഡാം പരിസരത്ത് മേയുന്ന കന്നുകാലികളുടെ ഉടമസ്ഥരായ 73 പേരുടെ മേല്വിലാസം ജലസേചന വകുപ്പ് സമാഹരിച്ചിട്ടുണ്ട്. ഇവര്ക്ക് നോട്ടീസ് നല്കും. ജില്ലാ കലക്ടറുടെ അധ്യക്ഷതയില് നടക്കുന്ന യോഗത്തില് പങ്കെടുക്കാന് ആവശ്യപ്പെടുകയും ചെയ്യും. ഇത് സംബന്ധിച്ച് പരിസരത്ത് മൈക്ക് അനൗണ്സ്മെന്റും അടുത്ത രണ്ട് ദിവസങ്ങളില് നടക്കും.
തുടര്ന്നും സംരക്ഷിതമേഖലയില് കന്നുകാലികളെ കണ്ടെത്തിയാല് പിടിച്ചുകെട്ടും. ഉടമസ്ഥനില് നിന്നും പിഴ ഈടാക്കി വിട്ട് നല്കുകയോ ഫാമുകളിലേയ്ക്ക് കൈമാറുകയോ ചെയ്യാനുള്ള നടപടിക്രമങ്ങള് യോഗം ചര്ച്ചചെയ്തു. ഉടമസ്ഥരുള്ളതും ഉടമസ്ഥരില്ലാതെ അലഞ്ഞ് നടക്കുന്നതുമായ രണ്ടായിരത്തോളം കന്നുകാലികള് ജലാശയ പ്രദേശത്തുണ്ടെന്ന് എക്സിക്യൂട്ടീവ് എഞ്ചിനീയര് പറഞ്ഞു. ചത്ത കന്നുകാലികളെ മറവ് ചെയ്യുന്നതിനും ജലാശയം ഉപയോഗിക്കുന്നുണ്ടെന്ന് കണ്ടെത്തിയ സാഹചര്യത്തില് പ്രതിരോധത്തിന് ഗ്രാമപഞ്ചായത്ത് തലത്തിലും ശക്തമായ നടപടികള് സ്വീകരിക്കും.
ജലാശയത്തില് വ്യാപകമായി വളരുന്ന പരാതിച്ചെടിയും വെള്ളം മലിനമാക്കുന്നതായി റിപ്പോര്ട്ട്. ഒടിച്ചുകുത്തി എന്ന പേരിലും അറിയപ്പെടുന്ന ഈ ചെടി ചീയുമ്പോള് ദുര്ഗന്ധമുണ്ടാവുകയും ജലാശയത്തില് അടിയുമ്പോള് ജലം മലിനമാവുകയും ചെയ്യും.
തണ്ടില് നിന്നും വെള്ള നിറത്തിലുള്ള പാല് ഉത്പാദിപ്പിക്കുന്ന ചെടി തൊട്ടാല് ചൊറിച്ചിലുണ്ടാകുമെന്നതിനാല് പാടെ ഉന്മൂലനം ചെയ്യുന്നതും തടസ്സമായിരിക്കുകയാണ്. ചെടികള് വളരുന്ന മുറയ്ക്ക് നീക്കം ചെയ്യാന് സ്ഥിരം സംവിധാനം കണ്ടെത്താന് ജലസേചന വകുപ്പ് നടപടി സ്വീകരിക്കണമെന്ന് ജില്ലാ കലക്ടര് നിര്ദേശിച്ചു. ഇത് സംബന്ധിച്ച് കൃഷി വിദഗ്ധരുമായി ആലോചിച്ച് ഉചിതമായ മാര്ഗം സ്വീകരിക്കാനും തീരുമാനിച്ചു.
