കണ്ണൂര്: പൊതുസ്ഥലങ്ങളും ജലാശയങ്ങളും മാലിന്യ മുക്തമാക്കാന് നിയമ നടപടിയേക്കാള് പ്രധാനം ജനങ്ങളുടെ അവബോധമാണെന്ന് മന്ത്രി രാമചന്ദ്രന് കടന്നപ്പള്ളി അഭിപ്രായപ്പെട്ടു. മാലിന്യം വലിച്ചെറിയുന്ന രീതി മാറ്റിയെടുക്കുകയാണ് വേണ്ടതെന്നും അദ്ദേഹം പറഞ്ഞു. കണ്ണൂരിനെ ഡിസ്പോസിബിള് വസ്തുക്കളും പ്ലാസ്റ്റിക് ക്യാരി ബാഗുകളുമില്ലാത്ത ജില്ലയായി പ്രഖ്യാപിച്ച ചടങ്ങില് സംസാരിക്കുകയായിരുന്നു മന്ത്രി.
നല്ലമണ്ണ്, നല്ലനാട് എന്ന സന്ദേശവുമായി ജില്ലാ പഞ്ചായത്തും കോര്പ്പറേഷനും ജില്ലാ ഭരണകൂടവും തദ്ദേശസ്ഥാപനങ്ങളും ഒന്നിച്ച് ആരംഭിച്ച പ്രവര്ത്തനത്തിന്റെ ഭാഗമായി വിപുലമായ ബോധവല്ക്കരണങ്ങളാണ് നടന്നതെന്ന് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് പറഞ്ഞു. ജില്ലാതല പ്രഖ്യാപനത്തിനുശേഷം നിയപരമായ നടപടികള് കൂടി ആരംഭിക്കും. നമ്മുടെ മണ്ണും ജലവും മാലിന്യ മുക്തമാക്കാനുള്ള ഈ സംരംഭത്തില് ജനങ്ങള് സഹകരിക്കണമെന്നും അദ്ദേഹം അഭ്യര്ഥിച്ചു.
കാലവര്ഷം ആരംഭിക്കുന്നതിന് മുമ്പ് നമ്മുടെ ജലാശയങ്ങളും കണ്ടല് പ്രദേശങ്ങളും പ്രത്യേകമായി തന്നെ മാലിന്യമുക്തമാക്കുകയാണ് ലക്ഷ്യമെന്ന് ജില്ലാ കലക്ടര് മീര് മുഹമ്മദലി അറിയിച്ചു. ഇതിനായി ശക്തമായ നടപടി സ്വീകരിക്കാനാണ് ഉദ്ദേശിക്കുന്നതെന്നും കലക്ടര് പറഞ്ഞു.
പ്ലാസ്റ്റിക് ഫ്രീ കണ്ണൂരിന്റെ മാതൃകയായി കലക്ടറേറ്റ്, ജില്ലാപഞ്ചായത്ത്, കോര്പ്പറേഷന് ഓഫീസ് എന്നിവ മാറ്റും. ഇവിടെയും പരിസരങ്ങളിലും എല്ലാ തരം ഡിസ്പോസിബിള് വസ്തുക്കളും ഫ്ളക്സുകളും പൂര്ണമായി ഒഴിവാക്കും. വാര്ത്താസമ്മേളനത്തില് ശുചിത്വമിഷന് ജില്ലാ കോ ഒാഡിനേറ്റര് വി കെ ദിലീപ്, അസി. കോ ഓര്ഡിനേറ്റര് സുരേഷ് കസ്തൂരി എന്നിവരും പങ്കെടുത്തു.
