കണ്ണൂര്: നവമാധ്യമങ്ങളിലൂടെ വ്യാജപ്രചരണങ്ങള് നടത്തി ചില ഗൂഡശക്തികള് ജനങ്ങളില് ആശങ്കയുണ്ടാക്കുന്നു. അഞ്ചരക്കണ്ടിയില് കഴിഞ്ഞദിവസം സിപിഎം അക്രമത്തില് വെട്ടേറ്റ ആര്എസ്എസ് പ്രവര്ത്തകന് മരിച്ചെന്നും ഇതില് പ്രതിഷേധിച്ച് തിങ്കളാഴ്ച ജില്ലയില് സംഘപരിവാര് സംഘടനകളുടെ നേതൃത്വത്തില് ഹര്ത്താല് നടത്തുമെന്നു മാണ് നവമാധ്യമങ്ങളിലെ പ്രചാരണങ്ങള്. പരിക്കേറ്റ യുവാവിന്റെ ഫോട്ടോ സഹിതമാണ് വാര്ത്ത.
ഇതിന്റെ അടിസ്ഥാനത്തില് മാധ്യമസ്ഥാപനങ്ങളിലും പാര്ട്ടി ഓഫീസുകളില് ഇടമുറിയാതെ ഫോണ് കോളുകളാണ് വന്നുകൊണ്ടിരുന്നത്. ജില്ലയുടെ പല സ്ഥലങ്ങളിലും സിപിഎം അക്രമങ്ങള് തുടര്ന്നുകൊണ്ടിരിക്കുന്ന സാഹചര്യത്തില് ഇത്തരം അസത്യ പ്രചരണങ്ങള് ജനങ്ങളില് ആശങ്കയുണര്ത്തുന്നതായിരുന്നു. ഇത്തരം അസത്യപ്രചരണങ്ങള് നടത്തി ചിലര് സുഖം കണ്ടെത്തുമ്പോള് കണ്ണൂര് ജില്ലയിലെ ജനങ്ങളില് ആശങ്ക വര്ദ്ധിപ്പിക്കുകയാണ് ചെയ്യുന്നത്.
സിപിഎം സംഘമാണ് ഇതിന്റെ പിന്നിലെന്ന് വ്യക്തമായ സൂചന ലഭിച്ചിട്ടുണ്ട്. സംഘര്ഷം നടന്ന പ്രദേശത്തെ ചിലരാണ് ഇതിനു പിന്നില്. സൈബര് സെല്ലിന്റെ അന്വേഷണത്തില് സിപിഎം കേന്ദ്രങ്ങളാണ് ഇതിന്റെ പിന്നിലെന്നാണ് സൂചന ലഭിച്ചത്. ജില്ലയെ വീണ്ടും സംഘര്ഷമേഖലയാക്കി മാറ്റാനുള്ള ഗൂഡാലോചനയാണ് ഇതിനുപിന്നില്. ഇത്തരം ശക്തികള്ക്കെതിരെ ശക്തമായ നടപടികള് സ്വീകരിക്കണമെന്ന് ബിജെപി അധികൃതരോട് ആവശ്യപ്പെട്ടു.
