പിആര്‍ രാമവര്‍മ്മ രാജ സ്മാരക പുരസ്‌കാരനം കൈതപ്രം ദാമോദരന്‍ നമ്പൂതിരിക്ക് ഇന്ന് നല്‍കും അരങ്ങം ഹിന്ദുമേള ഇന്ന് സമാപിക്കും

ആലക്കോട്: വിവിധ ഹൈന്ദവ സംഘടനകളുടെ ആഭിമുഖ്യത്തില്‍ ആലക്കോട് നടത്തിവരുന്ന പതിനൊന്നാമത് അരങ്ങം ഹിന്ദുമേള ഇന്ന് സമാപിക്കും. ഇന്നലെ രാവിലെ മുതല്‍ നാരായണീയ പാരായണം, തുടര്‍ന്ന് കേരളത്തിന്റെ വിവിധ ഭാഗങ്ങളില്‍ നിന്നായി എത്തിയ 15 ഓളം ടീമുകള്‍ പങ്കെടുത്ത ആതിരയരങ്ങ്-തിരുവാതിരക്കളി മത്സരം എന്നിവ നടന്നു. മത്സരത്തില്‍ മൂകാംബിക തിരുവാതിരക്കളി സംഘം കരിവെള്ളൂര്‍ ഒന്നാം സ്ഥാനം നേടി. അമൃതാ സുധാകരന്റെ നേതൃത്വത്തില്‍ കേരളനടനം, തുടര്‍ന്ന് മാതൃ സംഗമം എന്നിവ നടന്നു. പി.കെ.ഗിരിജാമണി ഉദ്ഘാടനം ചെയ്തു. സുമാ പ്രഭാകരന്‍ അധ്യക്ഷത വഹിച്ചു. ഡോ.പ്രിയദര്‍ശന്‍ലാല്‍ മുഖ്യപ്രഭാഷണം നടത്തി. വത്സല ഗോപിനാഥ് സ്വാഗതവും കെ.ദേവി നന്ദിയും പറഞ്ഞു. വൈകുന്നേരം ക്ഷീരകര്‍ഷകരെയും വിമുക്തഭടന്‍മാരെയും ആദരിക്കുന്ന ജയ് ജവാന്‍ ജയ് കിസാന്‍ പരിപാടിയില്‍ ശിവശങ്കരന്‍ നായര്‍ അധ്യക്ഷത വഹിച്ചു. ചടങ്ങില്‍ കാശ്മീരില്‍ കൊലചെയ്യപ്പെട്ട കൊടോളിപ്രത്തെ സി.രതീഷിന്റെ വൃദ്ധ മാതാവ് ഓമനയമ്മയെ ആദരിച്ചു. പ്രവീണ്‍ കോടോത്ത് മുഖ്യപ്രഭാഷണവും ആദരിക്കല്‍ ചടങ്ങും നടത്തി. ടി.എന്‍.സദാശിവന്‍ മാസ്റ്റര്‍, പി.വി.ബാലന്‍, സുകുമാരന്‍ നായര്‍ വടക്കനാട്ട്, ബി.ശ്രീകുമാര്‍, പി.സതീഷ് കുമാര്‍, കെ.ജയാനന്ദന്‍ തുടങ്ങിയവര്‍ സംസാരിച്ചു. ശ്രീനാരായണ ഗുരുദേവന്റെ നമുക്ക് ജാതിയില്ല വിളംബരത്തെ ആസ്പദമാക്കി ഡോ.പ്രിയദര്‍ശന്‍ ലാല്‍ പ്രഭാഷണം നടത്തി. കെ.ജയാനന്ദന്‍ സ്വാഗതവും പി.സതീഷ് കുമാര്‍ നന്ദിയും പറഞ്ഞു. തുടര്‍ന്ന് കഥാപ്രസംഗം, നൃത്തനൃത്യങ്ങള്‍ എന്നിവ നടന്നു. സമാപന ദിവസമായ ഇന്ന് രാവിലെ 5 മണിക്ക് അഷ്ടദ്രവ്യഗണപതിഹോമം, 8.30ന് നാരായണീയ പാരായണം എന്നിവ നടക്കും. 9.30 ന് നടക്കുന്ന ആദ്ധ്യത്മിക സദസ്സ് സ്വാമി സാധു വിനോദ് ഉദ്ഘാടനം ചെയ്യും. എം.പി.പ്രഭാകരന്‍ അധ്യക്ഷത വഹിക്കും. ബാലകൃഷ്ണന്‍ പത്തനംതിട്ട പ്രഭാഷണം നടത്തും. ഡോ.ജി.നാഗഭൂഷണം, പി.കെ.പ്രകാശ് തുടങ്ങിയവര്‍ സംസാരിക്കും. 11.30 ന് പ്രൊഫ.ടോണി മാത്യു പ്രഭാഷണം നടത്തും. 2 മണിക്ക് പുല്ലാങ്കുഴല്‍ നാദലയം, വൈകുന്നേരം 3 മണിക്ക് കൈതപ്രം ദാമോദരന്‍ നമ്പൂതിരി നടത്തുന്ന പി.ആര്‍.രാമവര്‍മ്മരാജ അനുസ്മരണ പ്രഭാഷണം എന്നിവ നടക്കും. വൈകുന്നേരം 4 മണിക്ക് നടക്കുന്ന സമാപന സമ്മേളനം അജിത്ത് രാമവര്‍മ്മയുടെ അധ്യക്ഷതയില്‍ രാഹുല്‍ ഈശ്വര്‍ ഉദ്ഘാടനം ചെയ്യും. ഹിന്ദു ഐക്യവേദി സംസ്ഥാന അധ്യക്ഷ കെ.പി.ശശികല ടീച്ചര്‍ മുഖ്യപ്രഭാഷണം നടത്തും. പ്രഥമ പിആര്‍ രാമവര്‍മ്മരാജ സ്മാരക ഹിന്ദുമേള പുരസ്‌കാരം ചടങ്ങില്‍ കൈതപ്രം ദാമോദരന്‍ നമ്പൂതിരിക്ക് നല്‍കും. പ്രമുഖ വ്യക്തികളെ ചടങ്ങില്‍ വി.പി.ദാസന്‍ ആദരിക്കും.