പുന്നപ്ര: ഭിന്നശേഷിക്കാരായ കുട്ടികള്ക്കായി സംഘടിപ്പിച്ച വിനോദയാത്ര അലങ്കോലമാക്കിയ പഞ്ചായത്ത് ഭരണ സമിതി അംഗങ്ങള്ക്കെതിരെ നടപടി എടുക്കാത്തതില് പ്രതിഷേധിച്ച് പ്രതിപക്ഷാംഗങ്ങള് ബജറ്റ് സമ്മേളനം ബഹിഷ്കരിച്ചു. പുന്നപ്ര വടക്കുപഞ്ചായത്തിലാണ് സംഭവം.
ഭിന്നശേഷിക്കാര്ക്കായി നടത്തിയ വിനോദ യാത്രയില് പഞ്ചായത്തംഗങ്ങളും ബന്ധുക്കളും പങ്കാളികളാകുകയും യാത്ര അലങ്കോലപ്പെടുത്തുകയുമായിരുന്നു. ചില പഞ്ചായത്തംഗങ്ങളും സുഹൃത്തുകളും മദ്യപിച്ചതായും ആരോപണം ഉയര്ന്നിരുന്നു. യാത്രയില് പങ്കെടുത്ത കുട്ടിയുടെ അമ്മ സാമൂഹ്യക്ഷേമ ഡയറക്ടര്ക്ക് പരാതിയും നല്കിയിരുന്നു.
എന്നാല് സംഭവത്തെ ലഘൂകരിച്ച് കുറ്റക്കാരെ രക്ഷിക്കാനാണ് സിപിഎം ഭരണ സമിതി ശ്രമിച്ചത്. ഇതില് പ്രതിഷേധിച്ചാണ് ബിജെപി – കോണ്ഗ്രസ് പ്രതിപക്ഷാംഗങ്ങള് ബജറ്റ് ബഹിഷ്കരിച്ചത്.
മെമ്പര്മാരായ എല്.പി. ജയചന്ദ്രന്, ജോണ്കുട്ടി, ഷേര്ലി സാബു, ടിന്റുആന്റണി, മേരി ജാന്സി, എന്. ഗോപിനാഥന് എന്നിവര് പ്രതിഷേധത്തില് പങ്കെടുത്തു.
