കോട്ടയം: ജില്ലയിലെ പൂരപ്രേമികളെയും ഭക്തസഹസ്രങ്ങളെയും ആനന്ദത്തിലാറാടിക്കുന്ന തിരുനക്കര മഹാദേവന്റെ പൂരം നാളെ നടക്കും. പ്രഭാതം മുതല് പൂരത്തിന്റെ ആരവം നാട്ടിലെമ്പാടും അലയടിച്ചുയരും. തിരുനക്കരയ്ക്കു ചുറ്റുമുള്ള പതിനൊന്ന് ക്ഷേത്രങ്ങളില് നിന്ന് ചെറുപൂരങ്ങള് രാവിലെ 11മണിയോടെ മഹാദേവന്റെ തിരുനടയില് എത്തിച്ചേരും.
നാഗമ്പടം മഹാദേവക്ഷേത്രം, തിരുനക്കര ശ്രീകൃഷ്ണസ്വാമി ക്ഷേത്രം, മുട്ടമ്പലം കൊപ്രത്ത് ദേവീക്ഷേത്രം, അമ്പലക്കടവ്, തളിക്കോട്ട, പുത്തനങ്ങാടി, എരുത്തിക്കല്, പള്ളിപ്പുറത്തുകാവ്, മള്ളൂശേരി, മള്ളൂക്കുളങ്ങര, പുതിയതൃക്കോവില്, പാറപ്പാടം എന്നീ പതിനൊന്ന് ക്ഷേത്രങ്ങളില് നിന്നാണ് ചെറുപൂരങ്ങള് തിരുനക്കരയില് എത്തുന്നത്.
ഉച്ചകഴിഞ്ഞ് വെയില് ചായുന്നതോടെ മഹാദേവനെ വന്ദിച്ച് ഗജകേസരികള് ചമയങ്ങളുമണിഞ്ഞ് പൂരപ്പറമ്പിലേക്ക് വരിവരയായി ഇറങ്ങിവരും അപ്പോള് ജനസഹസ്രങ്ങളുടെ കണ്ഠങ്ങളില് നിന്ന് ആര്പ്പുവിളികള് ഉയരും. നാലരമണിയോടെ മഹാദേവന്റെ തിടമ്പുമേറ്റി തൃക്കടവൂര് ശിവരാജു എന്ന ഗജരാജന് തുമ്പി ഉയര്ത്തി ഭഗവാനെ വണങ്ങി പൂരപ്പറമ്പിലേക്ക് എത്തുമ്പോള് ഈ വര്ഷത്തെ പൂരത്തിന് സമാരംഭം കുറിക്കും.
തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രയാര്ഗോപാലകൃഷ്ണന് മേളത്തറയില് ഭദ്രദീപം തെളിയിക്കുന്നതോടെ മേളകുലപതി പത്മശ്രീ പെരുവനം കുട്ടന്മാരാരും സംഘവും ആല്ത്തറ മേളത്തിന് ആരംഭം കുറിക്കും. മേളം കൊട്ടിക്കയറുന്നതിന് അനുസരിച്ച് ഭക്തഹൃദയങ്ങളെ ആനന്ദത്തിലാഴ്ത്തി തൃശൂര് പാറമേക്കാവ് ദേവസ്വവും തിരുവമ്പാടി ദേവസ്വവും കുടമാറ്റത്തിന് നേതൃത്വം നല്കും.
8മണിയോടെ ആകാശത്ത് വര്ണ്ണമഴ ചൊരിഞ്ഞുകൊണ്ട് കരിമരുന്ന് കലാപ്രകടനം നടക്കുന്നതോടെ പൂരത്തിനും പരിസമാപ്തിയാകും.
