കണ്ണൂര്‍: കണ്ണൂര്‍ യൂണിവേഴ്‌സിറ്റി മാങ്ങാട്ടുപറമ്പ് കാമ്പസിലെ ഗണിതശാസ്ത്ര വിഭാഗം തലവന്‍ പീഡിപ്പിച്ചതായ വിദ്യാര്‍ത്ഥിനികളുടെ പരാതി സംബന്ധിച്ച് അന്വേഷണം പോലീസിന് കൈമാറാന്‍ യൂണിവേഴ്‌സിറ്റി സിന്‍ഡിക്കേറ്റിന്റെ തീരുമാനം. ഇന്നലെ ചേര്‍ന്ന സിന്‍ഡിക്കേറ്റ് യോഗമാണ് ഇതു സംബന്ധിച്ച് തീരുമാനം എടുത്തത്. അതേ സമയം യൂണിവേഴ്‌സിറ്റിയുടെ പരമാധികാരിയും ചാന്‍സിലറുമായ ഗവര്‍ണറുടെ നിര്‍ദ്ദേശം മറികടന്നാണ് പുതിയ തീരുമാനമെന്ന ആരോപണം ഉയര്‍ന്നിട്ടുണ്ട്.
പീഡനം സംബന്ധിച്ച് ഗവര്‍ണര്‍ക്ക് വിദ്യാര്‍ത്ഥിനികള്‍ ഗവര്‍ണ്ണര്‍ക്ക് പരാതി നല്‍കുകയും ഇതിന്റെ അടിസ്ഥാനത്തില്‍ റിട്ട. ജഡ്ജിയുടെ നേതൃത്വത്തിലുളള ഏകാംഗ കമ്മീഷന്‍ അന്വേഷിക്കണമെന്ന് ചാന്‍സിലര്‍ക്ക് നിര്‍ദ്ദേശം നല്‍കുകയും ചെയ്തിരുന്നു. ഇതിന്റെ അടിസ്ഥാനത്തില്‍ റിട്ട. ജഡ്ജിയെ കൊണ്ട് അന്വേഷിക്കാന്‍ തീരുമാനിച്ചുകൊണ്ട് വൈസ് ചാന്‍സിലര്‍ തീരുമാനമെടുക്കുകയും ചെയ്തിരുന്നു. എന്നാല്‍ സിപിഎമ്മിന്റെ സമ്മര്‍ദ്ദത്തെ തുടര്‍ന്നാണെന്ന് പറയപ്പെടുന്നു ആരോപിതനായ അധ്യാപകനെ രക്ഷപ്പെടുത്താനാണ് സിന്‍ഡിക്കേറ്റിന്റെ പുതിയ തീരുമാനം എന്നു പറയപ്പെടുന്നു. പരാതി നല്‍കിയ വിദ്യാര്‍ത്ഥിനികളെ കൊണ്ട് പോലീസിനെ ഉപയോഗിച്ച് മൊഴിമാറ്റിച്ച് അധ്യാപകനെ രക്ഷപ്പെടുത്താനാണ് ശ്രമമെന്നാണ് ആരോപണം ഉയര്‍ന്നിരിക്കുന്നത്.
യൂണിവേഴ്‌സിറ്റിക്ക് മാസ്റ്റര്‍ പ്ലാന്‍ ഉണ്ടാക്കാന്‍ ഗവ. അംഗീകൃത ഏജന്‍സികളില്‍ നിന്നും അപേക്ഷ ക്ഷണിക്കാനും ഇന്നലെ ചേര്‍ന്ന സിന്‍ഡിക്കേറ്റ് യോഗം തീരുമാനിച്ചു. നാഷണല്‍ അക്രഡിറ്റേഷന്‍ ആന്റ് അസ്സസ്‌മെന്റ് കൗണ്‍സിലിന് സ്വയം വിലയിരുത്താന്‍ റിപ്പോര്‍ട്ട് നല്‍കുന്നതിന് മൂന്നുമാസത്തെ സമയം അനുവദിക്കണമെന്നു അപേക്ഷിക്കാന്‍ തീരുമാനിച്ചു.
ഡോ.അനില്‍ രാമചന്ദ്രനെ ഐക്യൂഎസി കോര്‍ഡിനേറ്ററായി നിയമിക്കാനും തീരുമാനമായി. സര്‍വ്വകലാശാല പഠനവകുപ്പുകളിലെ താല്‍ക്കാലിക അദ്ധ്യാപികമാര്‍ക്ക് 150 ദിവസത്തെ ശബളമില്ലാത്ത മെറ്റേര്‍ണിറ്റി ലീവ് അനുവദിക്കാനും യോഗം തീരുമാനിച്ചു.
എം.പ്രകാശന്‍, അഡ്വ.പി.സന്തോഷ്‌കുമാര്‍, ഡോ.വി.എ.വിത്സണ്‍, ഡോ.വി.പി.പി.മുസ്തഫ,ഡോ. ജോണ്‍. ജോസഫ്, ഡോ. എന്‍.മിനി, ഡോ. പി. ഓമന, ഡോ.പി.ജെ ജേക്കബ്, ഡോ. വി.പി.സക്കീര്‍ ഹുസൈന്‍, ഡോ. കെ. അജയകുമാര്‍, ശ്രീ. ടി.പി. അഷ്‌റഫ്, എ.നിശാന്ത്, എംസി രാജു എന്നിവര്‍ പങ്കെടുത്തു. പ്രോ. വൈസ് ചാന്‍സലര്‍ ഡോ. ടി.അശോകന്‍, രജിസ്റ്റാര്‍ ഡോ. ബാലചന്ദ്രന്‍ കീഴോത്ത് എന്നിവരും സന്നിഹിതരായിരുന്നു. വൈസ്ചാന്‍സലര്‍ ഡേ. എം.കെ.അബ്ദുള്‍ഖാദര്‍ അദ്ധ്യക്ഷത വഹിച്ചു.
