തോട്ടട: താഴെചൊവ്വ-തോട്ടട-നടാല് റോഡിലെ കലുങ്കുനിര്മ്മാണം പൂര്ത്തിയാക്കണമെന്ന് നാട്ടുകാര് ആവശ്യപ്പെടുന്നു. ഏറെക്കാലമായി തോട്ടടയിലെ പൊതുജനങ്ങള് തോട്ടട വയോജനവേദിയുടെ നേതൃത്വത്തില് നടത്തിവരുന്ന പ്രവര്ത്തനങ്ങളുടെ ഭാഗമായി നല്കിയ നിവേദനങ്ങളുടെ ഫലമായി ഈ റോഡില് നാല് കലുങ്കുകള് രണ്ട് കൊല്ലം മുമ്പ് പണിതുതുടങ്ങിയെങ്കിലും രണ്ട് മാസത്തിന് ശേഷം പണി പാതിവഴിയില് നിര്ത്തിവെക്കുകയായിരുന്നു. ഇത് സംബന്ധിച്ച് തോട്ടട വയോജനവേദിയുടെ പ്രതിനിധികള് പലതവണ നാഷണല് ഹൈവേ എക്സിക്യൂട്ടീവ് എഞ്ചിനിയറെയും അസിസ്റ്റന്റ് എഞ്ചിനിയറെയും സമീപിച്ച് പണി പൂര്ത്തിയാക്കേണ്ടതിന്റെ ആവശ്യകത ബോധ്യപ്പെടുത്തിയിരുന്നുവെങ്കിലും ഇതുവരെ ഒരു നടപടിയും ഉണ്ടായില്ല. ഫണ്ടില്ലെന്നാണ് അധികൃതര് പറയുന്നത്. എന്നാല് പണി പാതിവഴിയില് നിര്ത്തിയതിന്റെ ലാഭം കരാറുകാരനും ഉദ്യോഗസ്ഥര്ക്കുമാണെന്ന് നാട്ടുകാര് ആരോപിക്കുന്നു.
ഇത്ര താമസമെടുത്തുവെങ്കിലും ഇനിയെങ്കിലും ഈ കലുങ്കുകളുടെ നിര്മ്മാണം പൂര്ത്തിയാക്കി പൊതുജനങ്ങളുടെ ദുരിതത്തിന് പരിഹാരം കാണണമെന്നാണ് പൊതുജനങ്ങളുടെ ആവശ്യം.
