ഭരണങ്ങാനം സെന്റ് മേരീസ് ഫൊറോനാ പള്ളിയുടെ സെമിത്തേരി ചട്ടവിരുദ്ധം

കെ.ഡി. ഹരികുമാര്‍

കോട്ടയം: ഭരണങ്ങാനം സെന്റമേരീസ് ഫൊറോന പള്ളി സെമിത്തേരിയുടെ പ്രവര്‍ത്തനം ചട്ടവിരുദ്ധമെന്ന് റിപ്പോര്‍ട്ട്. സെമിത്തേരിയില്‍ നിന്നും മൃതദേഹങ്ങളുടെ ജീര്‍ണ്ണാവസ്ഥയിലുള്ള അവശിഷ്ടങ്ങള്‍ ജലസ്രോതസ്സുകളിലെത്താനുള്ള സാധ്യതകള്‍ തള്ളിക്കളയാനാവില്ലെന്ന് പരാമര്‍ശിക്കുന്നതിനൊപ്പം 1998-ലെ പഞ്ചായത്ത് രാജ് നിയമപ്രകാരം സെമിത്തേരി ചട്ടവിരുദ്ധമാണെന്നും വ്യക്തമാക്കുന്നു.

സെമിത്തേരിയിലെ മാലിന്യങ്ങള്‍ ജല മലിനീകരണത്തിന് കാരണമാകുന്നുവെന്ന് ചൂണ്ടിക്കാട്ടി ഭരണങ്ങാനം മാടപ്പള്ളില്‍ പ്രിന്‍സ് പോള്‍, റോയി ജേക്കബ് എന്നിവര്‍ നല്‍കിയ പരാതിയുടെ അടിസ്ഥാനത്തില്‍ കോട്ടയം ജില്ലാ മെഡിക്കല്‍ ഓഫീസര്‍ നേരിട്ട് നടത്തിയ പരിശോധനയിലാണ് ഈ കണ്ടെത്തല്‍. സെമിത്തേരിക്ക് ജില്ലാ മെഡിക്കല്‍ ഓഫീസറുടെ നിരാക്ഷേപ സാക്ഷ്യപത്രം നല്‍കിയതായി ബോധ്യം വന്നിട്ടില്ലെന്നും ജില്ലാ കളക്ടര്‍ക്ക് നല്‍കിയ റിപ്പോര്‍ട്ടില്‍ ചൂണ്ടിക്കാട്ടുന്നുണ്ട്.

2016 നവം. 25ന് നടത്തിയ പരിശോധനയുടെ റിപ്പോര്‍ട്ട് ഫെബ്രുവരി 6ന് ജില്ലാ കളക്ടര്‍ക്ക് കൈമാറി.

പള്ളിയുമായി ബന്ധപ്പെട്ടവര്‍ അന്വേഷണവുമായി സഹകരിക്കാത്തതിനാല്‍ സെമിത്തേരിയുടെ പഴക്കവും, നിര്‍മ്മാണം സംബന്ധിച്ച അനുമതിയുടെ കാര്യത്തിലും വ്യക്തത വന്നിട്ടില്ലെന്നും റിപ്പോര്‍ട്ട് പറയുന്നു. മുകളില്‍ നിന്ന് തുറക്കാവുന്ന 365 ശവക്കല്ലറകളും വശങ്ങളില്‍ നിന്ന് തുറക്കാവുന്ന 80 അറകളോടുകൂടിയ ശവക്കല്ലറകളുമാണ് ഈ സെമിത്തേരിയിലുള്ളത്.

കോട്ടവഴി റോഡിന്റെ വശത്ത് മൂന്നുമീറ്റര്‍ ഉയത്തില്‍ കരിങ്കല്ലുകൊണ്ട് നിര്‍മ്മിച്ചിരിക്കുന്ന മതിലിന് സിമന്റ് മിശ്രിതം പോലും ഉപയോഗിച്ചിട്ടില്ലെന്നും കണ്ടെത്തിയിട്ടുണ്ട്. സെമിത്തേരിയുടെ വടക്കേ അതിര്‍ത്തിഭാഗത്തുനിന്ന് നീരുറവ ഉത്ഭവിച്ച് ചായ്‌വുള്ള കിഴക്കുഭാഗത്തുകൂടി ഒഴുകി നീര്‍ച്ചാലില്‍ എത്തുന്നുണ്ട്.

സെമിത്തേരിയുടെ നിര്‍മ്മാണം ജലമലിനീകരണത്തിന് കാരണമാകുന്നതാണോ എന്ന് തിട്ടപ്പെടുത്തുന്നതിന് സെമിത്തേരിയുടെ നിര്‍മ്മാണം സംബന്ധിച്ചുള്ള കാര്യങ്ങള്‍ അറിയേണ്ടതുണ്ടെന്നും റിപ്പോര്‍ട്ട് പറയുന്നു.

ശവക്കല്ലറകളുടെ അടിഭാഗവും ചുറ്റുവശങ്ങളും നിശ്ചിത ഘനത്തില്‍ കോണ്‍ക്രീറ്റ് ചെയ്തിട്ടില്ലെങ്കില്‍ ശവശരീരത്തിന്റെ ജീര്‍ണ്ണാവശിഷ്ടങ്ങള്‍ വര്‍ഷകാലത്ത് ശവക്കുഴികളില്‍ രൂപപ്പെടുന്ന ജലത്തില്‍ ലയിച്ച് പുറത്തേക്ക് ഒഴുകും.

ഇത് കിഴക്കു ഭാഗത്തുള്ള ചെറുതോടു വഴി മീനച്ചിലാറ്റില്‍ എത്തിച്ചേരുമെന്നും ഡിഎംഒയുടെ റിപ്പോര്‍ട്ടില്‍ പറയുന്നു. നിലവിലുള്ള ശവക്കുഴികളില്‍ ഒന്നില്‍ കൂടുതല്‍ ശവങ്ങള്‍ മറവുചെയ്തിട്ടുണ്ടെന്ന് ബോധ്യപ്പെട്ടതായും ചൂണ്ടിക്കാണിക്കപ്പെടുന്നു. റിപ്പോര്‍ട്ടിന്റെ പകര്‍പ്പ് പരാതിക്കാര്‍ ക്ക് പുറമേ ഭരണങ്ങാനം ഗ്രാമപഞ്ചായത്ത് സെക്രട്ടറിക്കും നല്‍കിയിട്ടുണ്ട്.