പാലാ: പാലാ നഗരത്തിലും പരിസരപ്രദേശങ്ങളിലും വാഹനങ്ങളില്‍ നിന്ന് സാധനങ്ങള്‍ മോഷണം പോകുന്നത് പതിവാകുന്നു. നഗരസഭ പ്രദേശത്ത് എത്തുന്നവരാണ് കൂടുതലും മോഷണത്തിന് ഇരയാകുന്നത്. ബൈക്കുകളുടെ ഹെല്‍മറ്റ്, കാറുകളിലും മറ്റും സൂക്ഷിച്ചിരിക്കുന്ന ഫയലുകള്‍, ഫോണുകള്‍, പണം, വിലപ്പെട്ട രേഖകള്‍ തുടങ്ങിയവ മോഷണം പോകുന്നത് പതിവാണ്. ഇരുചക്രവാഹനങ്ങളില്‍ ഹെല്‍മറ്റ്‌വച്ച് ആവശ്യങ്ങള്‍ നടത്തി തിരിച്ചുവരുമ്പോള്‍ ഇത് നഷ്ടപ്പെട്ടിരിക്കും. വലിയ വാഹനങ്ങളില്‍ സൂക്ഷിക്കുന്ന പണമടക്കമുള്ള വസ്തുക്കളും നഷ്ടപ്പെടുന്നുണ്ട്. ആരാധനാലയങ്ങളുടെ പാര്‍ക്കിംഗ് ഗ്രൗണ്ടുകളിലാണ് നിര്‍ത്തിയിട്ട വാഹനങ്ങളില്‍ നിന്ന് മോഷണം നടത്തുന്നത്. മോഷ്ടിക്കപ്പെട്ടതെന്ന് കരുതുന്ന ഒരു ബാഗ് നഗരമധ്യത്തിലുളള ആരാധനാലയത്തിന് സമീപത്തുനിന്നും കണ്ടെത്തിയിരുന്നു. കുറച്ച് പേപ്പറുകളും ഭക്ഷണപ്പൊതിയും മാത്രമാണ് അവശേഷിച്ചിരുന്നത്.
ഇതേസ്ഥലത്തുനിന്ന് തന്നെ കാറുകളിലെ പണവും ഫോണും നഷ്ടപ്പെട്ടവര്‍ നിരവധിയാണ്. അധികൃതര്‍ അടിയന്തിര ശ്രദ്ധ പതിക്കണമെന്നും മുന്‍കരുതല്‍ സ്വീകരിക്കണമെന്നും നാട്ടുകാര്‍ ആവശ്യപ്പെട്ടു.
